ಕಿಚ್ಚನ 'ಮಾರ್ಕ್', ಹೆಚ್ಚಿದ 'ಸ್ಪಾರ್ಕ್'​! ಫ್ಯಾನ್ಸ್​ ವಾರ್​ ನಡುವೆಯೇ ಹೆಚ್ಚಾಯ್ತು ಸ್ಯಾಂಡಲ್​ವುಡ್​ ಮೇಲಿನ ನಿರೀಕ್ಷೆ

ಬೆಂಗಳೂರು: ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್​ ( Kichcha Sudeepa ​) ಅಭಿನಯದ ಬಹುನಿರೀಕ್ಷಿತ 'ಮಾರ್ಕ್'​ ಇದೇ ಡಿಸೆಂಬರ್​ 25ಕ್ಕೆ ಬಹುತೇಕ ಚಿತ್ರಮಂದಿರಗಳಲ್ಲಿ ತೆರೆಕಾಣಲಿದೆ. ಈ ಮಧ್ಯೆ, ಮಾರ್ಕ್​ ಚಿತ್ರದ ಪ್ರಚಾರ ಬಿರುಸಿನಿಂದ ಸಾಗುತ್ತಿದೆ. ಇನ್ನು ಇದೇ ದಿನ ಅರ್ಜುನ್ ಜನ್ಯ ನಿರ್ದೇಶನದ, ಉಪೇಂದ್ರ, ರಾಜ್​ ಬಿ.ಶೆಟ್ಟಿ ಮತ್ತು ಶಿವರಾಜ್​ಕುಮಾರ್ ನಟಿಸಿರುವ '45' ಕೂಡ ರಿಲೀಸ್​ಗೆ ಸಜ್ಜಾಗಿದೆ. ಈ ಮೂಲಕ ಬಾಕ್ಸ್ ಆಫೀಸ್​ನಲ್ಲಿ ಭರ್ಜರಿ ಪೈಪೋಟಿಗೆ ಕನ್ನಡ ಚಿತ್ರಗಳು ಇಳಿದಿವೆ. ಇದು ತೀವ್ರ ಕುತೂಹಲ ಕೆರಳಿಸಿದೆ ನಿಜ. ಆದರೆ, ಇದೆಲ್ಲದರ ಮಧ್ಯೆ ಫ್ಯಾನ್ಸ್​ಗಳ ಸಮರ ಜೋರಾಗಿರುವುದು ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಸಂಚಲನ ಹುಟ್ಟುಹಾಕಿದೆ.

ಮಾರ್ಕ್​ ಸಿನಿಮಾದ ಪ್ರಚಾರದ ವೇಳೆ ನಟ ಸುದೀಪ್ ಅವರು ಹೇಳಿದ ಮಾತು ಈ ಫ್ಯಾನ್ಸ್ ವಾರ್​ಗೆ ಕಾರಣವಾಗಿದೆ. ಬಹುದೊಡ್ಡ ವೇದಿಕೆಯಲ್ಲೇ ಯುದ್ಧಕ್ಕೆ ರೆಡಿ ಎಂದಿದ್ದೇಕೆ ಕಿಚ್ಚ? ಕಿಚ್ಚನ ಹೇಳಿಕೆಯಿಂದ ಹುಟ್ಟಿಕೊಳ್ತಾ ಸ್ಟಾರ್​ ವಾರ್​​? ಮಾರ್ಕ್​ ಸಿನಿಮಾ ವಿರುದ್ಧ ನಡೆಯುತ್ತಿದೆಯಾ ಪಿತೂರಿ? ಕಿಚ್ಚನ ಮಾತಿನ ಮರ್ಮವೇನು? ಎಂಬ ಹತ್ತು ಹಲವು ಪ್ರಶ್ನೆಗಳು ಸಿನಿಪ್ರಿಯರ ತಲೆಯನ್ನು ಕೆಡಿಸಿದೆ ಮತ್ತು ತೀರ ಗೊಂದಲಕ್ಕೆ ದೂಡಿದೆ.

ಅಷ್ಟಕ್ಕೂ ಕಿಚ್ಚ ಹೇಳಿದ್ದೇನು ಎಂದು ನೋಡುವುದಾದರೆ, ನಾನು ಇಲ್ಲಿಯವರೆಗೂ ನಮ್ಮ ಅಭಿಮಾನಿಗಳಿಗೆ ಏನೂ ಮಾತನಾಡದೇ ಸುಮ್ಮನಿದ್ದೇನೆ. ನಾನು ಸುಮ್ಮನಿದ್ದ ಮಾತ್ರಕ್ಕೆ ನನ್ನಿಂದು ಏನು ಆಗಲ್ಲ ಅಂತಲ್ಲ. ತಾಳ್ಮೆಗೂ ಒಂದು ಮಿತಿ ಇದೆ. ಎಲ್ಲವನ್ನು ಸಹಿಸಿಕೊಂಡು ಇರಲಾಗದು. ಇದೇ ಡಿ.25ಕ್ಕೆ ಒಂದು ಸಿನಿಮಾ ಬರುತ್ತಿದೆ. ಇನ್ನೊಂದೆಡೆ ಒಂದು ಪಡೆ ಯುದ್ಧಕ್ಕೆ ರೆಡಿಯಾಗುತ್ತಿದೆ. ಆ ಯುದ್ಧಕ್ಕೆ ನಾವು ರೆಡಿಯಾಗಿದ್ದೇವೆ. ಏಕೆಂದರೆ, ನಾವು ನಮ್ಮ ಮಾತಿಗೆ ಬದ್ದ ಎಂದು ಸುದೀಪ್​ ಹೇಳಿದರು. ಇದೊಂದು ಹೇಳಿಕೆಗೆ ಕಿಚ್ಚನ ವಿರುದ್ಧ ನಟ ದರ್ಶನ್​ ಅಭಿಮಾನಿಗಳು ಇನ್ನಷ್ಟು ಕೆರಳಿದ್ದಾರೆ. ಇದಕ್ಕೆ ಪುಷ್ಠಿ ಎನ್ನುವಂತೆ ದರ್ಶನ್ ಪತ್ನಿ ವಿಜಯಲಕ್ಷ್ಮಿ ಅವರ ಇತ್ತೀಚಿನ ಹೇಳಿಕೆಗಳು ಪರೋಕ್ಷವಾಗಿ ಸುದೀಪ್​ ಅವರಿಗೆ ಟಾಂಗ್ ನೀಡಿದರು ಎಂಬಂತೆ ಬಿಂಬಿಸುತ್ತಿವೆ.

ಈ ತಿಂಗಳು ಮೂರು ಸಿನಿಮಾಗಳು ಚಿತ್ರರಸಿಕರಲ್ಲಿ ಭಾರೀ ನಿರೀಕ್ಷೆ ಮೂಡಿಸಿವೆ. ಆ ಪೈಕಿ 'ಡೆವಿಲ್'​ ಈಗಾಗಲೇ ತೆರೆಕಂಡು, ಚಿತ್ರಮಂದಿರಗಳಲ್ಲಿ ಮಂದಗತಿಯಲ್ಲಿ ಸಾಗುತ್ತಿದೆ. ಇನ್ನೂ ಬಾಕಿ ಉಳಿದಿರುವುದು ಕಿಚ್ಚ ಸುದೀಪ್ ಅಭಿನಯದ 'ಮಾರ್ಕ್' ಮತ್ತು ಶಿವರಾಜ್​ಕುಮಾರ್​, ರಾಜ್​ ಬಿ.ಶೆಟ್ಟಿ ಮತ್ತು ಉಪೇಂದ್ರ ನಟಿಸಿರುವ '45' ಸಿನಿಮಾಗಳು. ಈ ಎರಡು ಚಿತ್ರಗಳು ಸದ್ಯ ಸಖತ್​ ಹೈಪ್​ ಮೂಡಿಸಿದ್ದು, ಟ್ರೇಲರ್​ನಿಂದಲೇ ನೋಡುಗರ ನಿರೀಕ್ಷೆಗಳನ್ನು ಡಬಲ್ ಮಾಡಿವೆ. ಒಂದೇ ದಿನ ತೆರೆಕಾಣಲಿರುವ ಈ ಚಿತ್ರಗಳು ಹೇಗೆ ಕಮಾಲ್​ ಮಾಡಲಿವೆ ಎಂಬುದನ್ನು ಕಾದು ನೋಡಬೇಕಿದೆ.