ಸಂಸತ್ತಿನಲ್ಲಿ ಇಂದು ‘ಆಜಾದ್ ಭಾರತ್’: ರೂಪಾ ಅಯ್ಯರ್ ನಟಿಸಿ, ನಿರ್ದೇಶಿರುವ ದೇಶಭಕ್ತಿ ಸಿನಿಮಾದ ವಿಶೇಷ ಪ್ರದರ್ಶನ! Azad Bharath

ಬೆಂಗಳೂರು : ರೂಪಾ ಅಯ್ಯರ್ ನಟಿಸಿ, ನಿರ್ದೇಶಿಸಿರುವ ನೈಜಘಟನೆಯಾಧಾರಿತ ದೇಶಭಕ್ತಿ ಪ್ರಧಾನ ಹಿಂದಿ ಸಿನಿಮಾ ‘ಆಜಾದ್ ಭಾರತ್’ ( Azad Bharath ). ಕಳೆದ ಜ. 2ರಂದು ದೇಶಾದ್ಯಂತ ಬಿಡುಗಡೆಯಾಗಿದ್ದ ಈ ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆಗಳು ವ್ಯಕ್ತವಾಗಿದ್ದವು. ಇದೀಗ ಸಿನಿಮಾ ಅಪರೂಪದ ಸಾಧನೆಗೆ ಮುಂದಾಗಿದೆ. ಹೌದು, ‘ಆಜಾದ್ ಭಾರತ್’ ಇಂದು (ಏ.1) ಸಂಸತ್‌ನಲ್ಲಿ ಪ್ರದರ್ಶನಗೊಳ್ಳುವ ಮೂಲಕ ಮತ್ತೊಂದು ಹೆಗ್ಗಳಿಕೆಗೆ ಪಾತ್ರವಾಗುತ್ತಿದೆ. ನವದೆಹಲಿಯ ಸಂಸತ್ ಭವನದ ಜಿ. ಎಂ.ಸಿ.ಬಾಲಯೋಗಿ ಸಭಾಂಗಣದಲ್ಲಿ ಇಂದು ಸಂಜೆ 6ಕ್ಕೆ ಸಿನಿಮಾ ಪ್ರದರ್ಶನಗೊಳ್ಳಲಿದೆ.

ಈ ಬಗ್ಗೆ ರೂಪಾ ಅಯ್ಯರ್, ‘ಸ್ವಾತಂತ್ರ್ಯ ಹೋರಾಟಗಾರ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರಿಗೆ ಗೌರವ ಸಲ್ಲಬೇಕು. ಹೀಗಾಗಿ ‘ಆಜಾದ್ ಭಾರತ್’ ಚಿತ್ರವನ್ನು ಸಂಸತ್‌ನಲ್ಲಿ ಪ್ರದರ್ಶಿಸಬೇಕು ಎಂದು ಪಟ್ಟು ಹಿಡಿದಿದ್ದೆ. ಇದೀಗ ಎಂಟು ತಿಂಗಳ ಪರಿಶ್ರಮ, ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ಸಹಕಾರದಿಂದ ಇದು ಸಾಧ್ಯವಾಗಿದೆ. ಕನ್ನಡ ಚಿತ್ರವೊಂದು ಪಾರ್ಲಿಮೆಂಟ್‌ನಲ್ಲಿ ಪ್ರದರ್ಶನಗೊಳ್ಳುವುದು ನಮ್ಮೆಲ್ಲರ ಹೆಮ್ಮೆ ಹಾಗೂ ನನ್ನ ಜೀವನದ ಮೈಲಿಗಲ್ಲು ಎಂದರು.

ಐಎನ್‌ಎ ಮುಖಂಡ 102 ವರ್ಷದ ಮಾಧವನ್, ನೇತಾಜಿ ಮರಿಮೊಮ್ಮಗಳು ರಾಜಶ್ರೀ ಚೌಧರಿ, ಹರಿಯಾಣ, ಛತ್ತೀಸ್‌ಗಡ ಸೇರಿ ದೇಶದ ವಿವಿಧ ಮೂಲೆಗಳಿಂದ ಇಂಡಿಯನ್ ನ್ಯಾಷನಲ್ ಆರ್ಮಿ ಮುಖಂಡರು ಬರುತ್ತಿದ್ದಾರೆ. ಜತೆಗೆ ಕೇಂದ್ರ ಸಚಿವರಾದ ಎಚ್.ಡಿ.ಕುಮಾರಸ್ವಾಮಿ, ಪ್ರಲ್ಹಾದ ಜೋಶಿ, ಸಂಸದರಾದ ಡಾ.ಸಿ.ಎನ್. ಮಂಜುನಾಥ್, ಬಿ.ವೈ.ರಾಘವೇಂದ್ರ, ತೇಜಸ್ವಿ ಸೂರ್ಯ ಸೇರಿ ಹಲವರು ಸಿನಿಮಾ ವೀಕ್ಷಿಸಲಿದ್ದಾರೆ. ಕೇಂದ್ರ ಮಾಜಿ ಸಚಿವೆ ಮೀನಾಕ್ಷಿ ಲೇಖಿ ಸಿನಿಮಾ ಬಗ್ಗೆ ಆಸಕ್ತಿ ವಹಿಸಿದ್ದು, ಅವರು ಸಿಂಗಾಪುರ, ಥಾಯ್ಲೆಂಡ್‌ನಲ್ಲಿ ರಿಲೀಸ್ ಮಾಡಲು ಸಹಕರಿಸುವುದಾಗಿ ಭರವಸೆ ನೀಡಿದ್ದಾರೆ’ ಎಂದು ರೂಪಾ ಅಯ್ಯರ್​ ಮಾಹಿತಿ ನೀಡಿದರು.

‘ಆಜಾದ್ ಭಾರತ್’ ಚಿತ್ರದಲ್ಲಿ ರೂಪಾ ಅಯ್ಯರ್ ಪ್ರಮುಖ ಪಾತ್ರದಲ್ಲಿದ್ದು, ಶ್ರೇಯಸ್ ತಲ್ಪಾಡೆ, ಹಿತಾ ಚಂದ್ರಶೇಖರ್, ಸರಸ್ವತಿ ರಾಜಾಮಣಿ, ಸುರೇಶ್ ಓಬೆರಾಯ್, ಬಿರಾದಾರ್, ಸುಚೇಂದ್ರ ಪ್ರಸಾದ್ ತಾರಾಗಣದಲ್ಲಿದ್ದಾರೆ.

ರೂಪಾ ಅಯ್ಯರ್ ನಿರ್ದೇಶನದ ‘ಆಜಾದ್ ಭಾರತ್’ ನೀರಾ ಆರ್ಯ ಸಾಹಸಗಾಥೆಯ ಬಗ್ಗೆ ಹೇಳುತ್ತದೆ. ಬ್ರಿಟಿಷರ ವಿರುದ್ಧ ಹೋರಾಡಲು ಸ್ವಾತಂತ್ರ್ಯ ಸೇನಾನಿ ಸುಭಾಷ್ ಚಂದ್ರ ಬೋಸ್ ಆರಂಭಿಸಿದ್ದ ‘ಆಜಾದ್ ಹಿಂದ್ ಫೌಜ್’ನ ‘ರಾಣಿ ಝಾನ್ಸಿ ರೆಜಿಮೆಂಟ್’ನಲ್ಲಿ ನೀರಾ ಆರ್ಯ ಕಾರ್ಯನಿರ್ವಹಿಸುತ್ತಿದ್ದರು. ಇಂತಹ ನೀರಾ, ಸಿಐಡಿ ಅಧಿಕಾರಿ ಶ್ರೀಕಾಂತ್ ದಾಸ್ ಎಂಬುವರನ್ನು ಮದುವೆಯಾಗುತ್ತಾರೆ. ಆತ ಸುಭಾಷ್ ಚಂದ್ರ ಬೋಸ್ ಅವರನ್ನೇ ಕೊಲೆ ಮಾಡಲು ಯೋಜನೆ ರೂಪಿಸಿದಾಗ ಸ್ವಂತ ಗಂಡನನ್ನೇ ಹತ್ಯೆ ಮಾಡುತ್ತಾರೆ. ಬಳಿಕ ಆಕೆ ಎದುರಿಸುವ ಸವಾಲುಗಳು, ಬ್ರಿಟಿಷರ ವಿರುದ್ಧದ ಹೋರಾಟದ ಬದುಕಿನ ಸುತ್ತ ಸಿನಿಮಾ ಸಾಗುತ್ತದೆ. ಈ ಚಿತ್ರದಲ್ಲಿ ಒಟ್ಟು ಏಳು ಹಾಡುಗಳಿದ್ದು, ಅದರಲ್ಲಿ ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರ ಪತ್ನಿ ಅಮೃತಾ ಫಡ್ನವೀಸ್ ಒಂದು ಹಾಡು ಹಾಡಿರುವುದು ವಿಶೇಷ. ‘ಆಜಾದ್ ಭಾರತ್’ ಚಿತ್ರದ ಟಿವಿ, ಒಟಿಟಿ ಹಾಗೂ ಮ್ಯೂಸಿಕ್ ಹಕ್ಕುಗಳು ಜೀ ಕಂಪನಿಗೆ ಮಾರಾಟವಾಗಿವೆ.

‘ಆಜಾದ್ ಭಾರತ್’ ಚಿತ್ರಕ್ಕೂ ಮುನ್ನ ಕೆಲ ಬೆರಳೆಣಿಕೆ ಸಿನಿಮಾಗಳು ‘ಸಂಸತ್’ನಲ್ಲಿ ಪ್ರದರ್ಶನಗೊಂಡಿವೆ. ವಿಕ್ರಾಂತ್ ಮಸ್ಸಿ, ರಾಶಿ ಖನ್ನಾ ಅಭಿನಯದ ‘ಸಾಬರಮತಿ ರಿಪೋರ್ಟ್’ (2025) ಮತ್ತು ವಿಕ್ಕಿ ಕೌಶಲ್ ಅಭಿನಯದ ‘ಛಾವಾ’ (2025) ಚಿತ್ರಗಳು ಸಂಸತ್‌ನ ವಿವಿಧ ಸಭಾಂಗಣದಲ್ಲಿ ಪ್ರದರ್ಶನಗೊಂಡಿದ್ದವು. ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಷಾ ಸೇರಿ ಸಂಪುಟ ಸದಸ್ಯರು ಸಿನಿಮಾ ವೀಕ್ಷಿಸಿದ್ದರು. ಇನ್ನು ಕನ್ನಡದ ರಿಷಬ್ ಶೆಟ್ಟಿ ನಟಿಸಿ, ನಿರ್ದೇಶಿಸಿದ್ದ ‘ಕಾಂತಾರ: ಅಧ್ಯಾಯ 1 ಚಿತ್ರವು 2025ರ ಅ.5ರಂದು ರಾಷ್ಟ್ರಪತಿ ಭವನದಲ್ಲಿ ಪ್ರದರ್ಶನಗೊಂಡಿತ್ತು.