ಪ್ರಿ-ಪೋನ್, ಪೋಸ್ಟ್-ಪೋನ್ ಆಟದಲ್ಲಿ...: ‘ಧುರಂಧರ್ 2’, ‘ಟಾಕ್ಸಿಕ್’ ಪರಿಣಾಮ ಸಿನಿಮಾ ಬಿಡುಗಡೆಯ ಹಾವು-ಏಣಿ ಆಟ

‘ಟಾಕ್ಸಿಕ್’ ಬಿಡುಗಡೆ ದಿನಾಂಕ ಮುಂದೂಡಿರುವುದರಿಂದ ಮಾ.19ರ ಯುಗಾದಿ ಹಬ್ಬದ ಲಾಭ ಗಳಿಸಲು ಎರಡು ಸಿನಿಮಾಗಳು ರಿಲೀಸ್ ಡೇಟ್ ಪ್ರಿಪೋನ್ ಮಾಡಿಕೊಂಡಿವೆ. ಡಾರ್ಲಿಂಗ್ ಕೃಷ್ಣ ನಟಿಸಿ, ನಿರ್ದೇಶಿಸಿರುವ ‘ಲವ್ ಮಾಕ್ಟೇಲ್ 3’ ಮೊದಲು ಏ.10ಕ್ಕೆ ತೆರೆ ಮೇಲೆ ಬರುವುದಾಗಿ ಘೋಷಿಸಿತ್ತು. ಯಾವಾಗ ‘ಟಾಕ್ಸಿಕ್’ ಮುಂದೆ ಹೋಯಿತೋ ಜಾಣತನ ತೋರಿದ ಕೃಷ್ಣ ಮಾ.19ಕ್ಕೆ ಬರುವುದಾಗಿ ಘೋಷಿಸಿದ್ದಾರೆ. ಹಾಗೆಯೇ ಪವನ್ ಕಲ್ಯಾಣ್ ಅಭಿನಯದ ‘ಉಸ್ತಾದ್ ಭಗತ್ ಸಿಂಗ್’ ಕೂಡ ಮಾ.26ರಿಂದ ಮಾ.19ಕ್ಕೆ ಪ್ರಿ-ಪೋನ್ ಮಾಡಿಕೊಂಡಿದೆ. ಆ ಮೂಲಕ ಯುಗಾದಿಗೆ ‘ಧುರಂಧರ್ 2’ಗೆ ಟಕ್ಕರ್ ಕೊಡಲು ದಕ್ಷಿಣದ ಎರಡು ಸಿನಿಮಾಗಳು ಸಿದ್ಧತೆ ನಡೆಸಿವೆ.

ಸದ್ಯ ಭಾರತೀಯ ಚಿತ್ರರಂಗದಲ್ಲಿ ಆದಿತ್ಯ ಧರ್ ನಿರ್ದೇಶನದ ‘ಧುರಂಧರ್: ದ ರಿವೆಂಜ್’ ಚಿತ್ರ ಸೃಷ್ಟಿಸಿರುವ ಹವಾ ತುಂಬಾ ದೊಡ್ಡದು. ಈಗಾಗಲೇ ಪ್ರಿ-ಬುಕಿಂಗ್ ಆರಂಭವಾಗಿದ್ದು, ಮಾ. 18ರ ಪೇಯ್ಡ ಪ್ರೀಮಿಯರ್ ಶೋಗಳು ಬಹುತೇಕ ಹೌಸ್‌ಫುಲ್ ಆಗಿವೆ. ಮೊದಲ ವಾರದ ಟಿಕೆಟ್ ದರ 2400ವರೆಗೂ ಹೆಚ್ಚಿಸಲಾಗಿದೆ. ಈ ಚಿತ್ರ ಸೃಷ್ಟಿಸಿರುವ ಭಯಕ್ಕೆ ಹಲವು ಚಿತ್ರಗಳು ಮುಂದಕ್ಕೆ ಹೋಗಿವೆ. ಏ.17ಕ್ಕೆ ರಿಲೀಸ್ ಆಗಬೇಕಿದ್ದ ಆಲಿಯಾ ಭಟ್ ನಟಿಸಿರುವ ‘ಆಲ್ಫಾ’ ಚಿತ್ರ ಜುಲೈ 10ಕ್ಕೆ ತೆರೆಗೆ ಬರಲು ನಿರ್ಧರಿಸಿದೆ. ಅಕ್ಷಯ್ ಕುಮಾರ್ ನಟನೆಯ ‘ಭೂತ್ ಬಂಗ್ಲಾ’ ಚಿತ್ರ ಈವರೆಗೆ ಮೂರು ಬಾರಿ ರಿಲೀಸ್ ಡೇಟ್ ಬದಲಾಯಿಸಿದೆ. ಮೊದಲು ಮೇ 15ಕ್ಕೆ ಬರುವುದಾಗಿ ೋಷಿಸಿದ್ದ ಚಿತ್ರ ಬಳಿಕ ‘ಧುರಂಧರ್’, ‘ಟಾಕ್ಸಿಕ್’ ಯಾರೇ ಬಂದರೂ ಹೆದರಲ್ಲ ಎಂದು, ಏ.2ಕ್ಕೆ ರಿಲೀಸ್ ಮಾಡುವುದಾಗಿ ಒಂದು ತಿಂಗಳು ಹಿಂದೆ ಬಂದಿದ್ದರು. ಆದರೆ, ಇದೀಗ ಮತ್ತೆ ಒಂದು ವಾರ ಮುಂದಕ್ಕೆ ಹೋಗಿರುವ ಚಿತ್ರತಂಡ ಏ.10 ರಿಲೀಸ್ ಡೇಟ್ ಫೈನಲ್ ಮಾಡಿದೆ. ಇದಕ್ಕೂ ಮುನ್ನ ‘ಧುರಂಧರ್ 2’ ಮತ್ತು ‘ಟಾಕ್ಸಿಕ್’ ಕ್ರೇಜ್‌ನಲ್ಲಿ ಕಳೆದುಹೋಗಬಾರದು ಎಂದು ರಾವಚರಣ್ ತೇಜ ನಟನೆಯ ‘ಪೆದ್ದಿ’ (ಏ.30), ಅಡಿವಿ ಶೇಷ್ ಅಭಿನಯದ ‘ಡಕಾಯಿತ್’ (ಏ.10) ಮತ್ತು ನಾನಿಯ ‘ಪ್ಯಾರಡೈಸ್’ ಆ.21ಕ್ಕೆ ಬರಲು ನಿರ್ಧರಿಸಿವೆ.

ರಿಲೀಸ್ ಡೇಟ್ ಮುಂದೂಡಿದರೂ ಯಶ್ ನಟನೆಯ ‘ಟಾಕ್ಸಿಕ್’ ಸೃಷ್ಟಿಸಿರುವ ಸಂಚಲನ ಬಹುದೊಡ್ಡದು. ಇದೀಗ ಜೂನ್ 4ಕ್ಕೆ ತೆರೆ ಬರಲು ಸಿದ್ಧವಾಗಿರುವಾಗಲೇ ‘ಟಾಕ್ಸಿಕ್’ಗೆ ಭಯಗೊಂಡು ಹಿಂದಿ ಚಿತ್ರವೊಂದು ಒಂದು ವಾರಕ್ಕೆ ಪೋಸ್ಟ್ -ಪೋನ್ ಮಾಡಿದೆ. ವರುಣ್ ಧವನ್, ಪೂಜಾ ಹೆಗ್ಡೆ, ಮೃಣಾಲ್ ಠಾಕೂರ್ ಕಲಾ ಬಳಗದಲ್ಲಿರುವ ‘ಹೈ ಜವಾನಿ ತೋ ಇಷ್ಕ್ ಹೋನಾ ಹೈ’ ಜೂ.5ಕ್ಕೆ ರಿಲೀಸ್ ಆಗುವುದಿತ್ತು. ಇದೀಗ ಅದಕ್ಕೂ ಒಂದು ದಿನ ಮುಂಚೆ ‘ಟಾಕ್ಸಿಕ್’ ಬರುವುದರಿಂದ ಜೂ.12ಕ್ಕೆ ರಿಲೀಸ್ ಮಾಡಲು ಚಿತ್ರತಂಡ ನಿರ್ಧರಿಸಿದೆ.