Nisha Ravikrishnan - ಹೊಸ ಪಾತ್ರದಲ್ಲಿ ನಿಶಾ ದರ್ಶನ

ನಿಶಾ ಸದ್ಯ ಕನ್ನಡದಲ್ಲಿ "ಅಣ್ಣಯ್ಯ' ಧಾರಾವಾಹಿಯಲ್ಲಿ ನಟಿಸುತ್ತಿದ್ದಾರೆ. ಜತೆಗೆ ಸಿನಿಮಾಗಳತ್ತ ಹೆಚ್ಚು ಗಮನ ಹರಿಸಲು ನಿರ್ಧರಿಸಿದ್ದು, "ಮೊದಲೇ ಒಪ್ಪಿದ್ದ ಪ್ರಾಜೆಕ್ಟ್​ಗಳನ್ನು ಪೂರ್ಣಗೊಳಿಸಬೇಕಿದ್ದ ಕಾರಣ ಇದುವರೆಗೆ ಹೆಚ್ಚು ಸಿನಿಮಾದತ್ತ ಗಮನ ಹರಿಸಲು ಸಾಧ್ಯವಾಗಿರಲಿಲ್ಲ. ಇನ್ನುಮುಂದೆ ಹೆಚ್ಚು ಸಮಯ ಸಿನಿಮಾಗೆ ನೀಡಲಿದ್ದೇನೆ. ಸದ್ಯ ಧಾರಾವಾಹಿ ಮತ್ತು ಸಿನಿಮಾ ಎರಡನ್ನೂ ನಿಭಾಯಿಸುತ್ತಿದ್ದೇನೆ. ನಾನು ತುಂಬ ಇಷ್ಟಪಟ್ಟು ಬಂದ ವೃತ್ತಿ ನಟನೆ. ಟಿವಿ, ಸಿನಿಮಾ ಎಲ್ಲಾದರೂ ಸರಿ ನಟಿಸುತ್ತಿರಬೇಕು. ಎರಡು, ಮೂರು ವರ್ಷ ಒಂದೇ ಪಾತ್ರದಲ್ಲಿ ನಟಿಸುವುದೂ ಸವಾಲು. ಹಾಗೇ ಸಿನಿಮಾಗಳಲ್ಲಿ 20, 30 ದಿನ ಒಂದು ಪಾತ್ರದಲ್ಲಿ ನಟಿಸುವುದೂ ಸಹ ಒಂದು ಚಾಲೆಂಜ್​. ನನಗೆ ಎರಡೂ ಸವಾಲುಗಳು ಇಷ್ಟ. ಉತ್ತಮ ಅವಕಾಶ ಎಲ್ಲಿ ಸಿಗುತ್ತದೆಯೋ ಅಲ್ಲಿ ನಟಿಸುತ್ತೇನೆ. ಆದರೆ, ಬೆಳ್ಳಿತೆರೆಯ ಮೇಲೆ ಕಾಣಿಸಿಕೊಳ್ಳುವ ಆಸೆ ಎಲ್ಲರಿಗೂ ಇರುತ್ತದೆ. ಹೀಗಾಗಿ ಸದ್ಯಕ್ಕೆ ಸಿನಿಮಾಗಳಿಗೆ ಹೆಚ್ಚು ಸಮಯ ನೀಡಲಿದ್ದೇನೆ' ಎಂದು ಹೇಳಿಕೊಳ್ಳುತ್ತಾರೆ.

"ಈಗ ತುಂಬ ಕಥೆಗಳು ಬರುತ್ತಿವೆ' ಎನ್ನುವ ನಿಶಾ, ತೆಲುಗಿನಲ್ಲೂ ಒಂದು ಕಥೆ ಕೇಳಿದ್ದಾರಂತೆ. ಆದರೆ, ಯಾವುದನ್ನೂ ಸೈನ್​ ಮಾಡಿಲ್ಲ. "ವೈವಿಧ್ಯಮಯ ಪಾತ್ರಗಳನ್ನು ಮಾಡಬೇಕು. ಪ್ರಯೋಗ ಮಾಡುತ್ತಿರಬೇಕು. ನನಗೆ ಬಾಲಿವುಡ್​ ನಟಿ ರಾಣಿ ಮುಖರ್ಜಿಯವರ "ಮರ್ದಾನಿ'ಯಂತಹ ಗಟ್ಟಿ, ಪವರ್​ಫುಲ್​ ಮಹಿಳೆಯ ಪಾತ್ರದಲ್ಲಿ ನಟಿಸಲು ತುಂಬ ಇಷ್ಟ. ಕನ್ನಡದಲ್ಲಿ ಅಂತಹ ಸಿನಿಮಾ ಅಥವಾ ವೆಬ್​ಸರಣಿಯಲ್ಲಿ ಅವಕಾಶ ಸಿಕ್ಕರೆ ಖಂಡಿತ ಮಾಡುತ್ತೇನೆ' ಎನ್ನುತ್ತಾರೆ ನಟಿ ನಿಶಾ ರವಿಕೃಷ್ಣನ್​.