ನನ್ನ ಮತ್ತು ಅಪ್ಪು ಸರ್ ಒಡನಾಟ ತುಂಬಾ ದೊಡ್ಡದು. ‘ಅಪ್ಪು’, ‘ಅಭಿ’ ಮತ್ತು ‘ವೀರ ಕನ್ನಡಿಗ’ ಚಿತ್ರಗಳಿಗೆ ಸಹಾಯಕ ನಿರ್ದೇಶಕನಾಗಿ, ‘ಆಕಾಶ್’, ‘ಅರಸು’ ಚಿತ್ರಗಳಿಗೆ ನಿರ್ದೇಶಕನಾಗಿ ಕೆಲಸ ಮಾಡಿದ್ದೇನೆ. ನಮ್ಮ ಒಡನಾಟ ಸಿನಿಮಾಗಳಿಗಷ್ಟೇ ಸೀಮಿತವಾಗಿರಲಿಲ್ಲ. ಅದಕ್ಕೂ ಮಿಗಿಲಾದದು. ಅವರಿಗೆ ನಾನೊಬ್ಬ ಉತ್ತಮ ಸ್ನೇಹಿತನಾಗಿದ್ದೆ. ನನ್ನ ಜತೆ ಲೋಕವಿಹಾರಿಯಾಗಿ ಚರ್ಚಿಸುತ್ತಿದ್ದರು. ಹಾಗಾಗಿ, ಅಪ್ಪು ಜತೆ ಏಳು ವರ್ಷಗಳ ಕಾಲ ಕೆಲಸ ಮಾಡಲು ಸಾಧ್ಯವಾಯಿತು. ‘ಆಕಾಶ್’ ದೊಡ್ಡ ಮಟ್ಟದಲ್ಲಿ ಸಕ್ಸಸ್ ಆದ ಬಳಿಕ ಮುಂದಿನ ಸಿನಿಮಾ ನೀವೆ ನಿರ್ದೇಶಿಸಬೇಕು ಎಂದು ‘ಅರಸು’ ಚಿತ್ರಕ್ಕೆ ಅವಕಾಶ ನೀಡಿದರು. ನನಗೆ ಜೀವನ ನೀಡಿದ್ದು ದೊಡ್ಮನೆ ಕುಟುಂಬ. ಹಾಗಾಗಿ, ನೀವು ಎಷ್ಟು ಸಿನಿಮಾ ಹೇಳಿದರೂ ಖುಷಿಯಿಂದ ಕೆಲಸ ಮಾಡುವೆ ಎಂದಿದ್ದೆ. ಇದೀಗ 21 ವರ್ಷಗಳ ಬಳಿಕ ‘ಆಕಾಶ್’ ರಿ-ರಿಲೀಸ್ ಆಗಿದೆ. ಈಗಲೂ ಚಿತ್ರದ ಕ್ರೇಜ್ ಕಡಿಮೆಯಾಗಿಲ್ಲ.
