ವಿದೂಷಕ ರವಿ- ನ. 20ಕ್ಕೆ ರಿಲೀಸ್​ ಆಗಲಿದೆ ಯಶವಂತ್​ ಬಿಜೂರ್​ ನಿರ್ದೇಶನದ ಸಿನಿಮಾ

ಬೆಂಗಳೂರು: ಡಬ್ಬಿಂಗ್​ ಕಲಾವಿದನಾಗಿ, ಕಿರುತೆರೆ ನಟನಾಗಿ ಪರಿಚಿತರಾಗಿರುವ ಯಶವಂತ್​ ಬಿಜೂರ್​ ಕಥೆ, ಚಿತ್ರಕಥೆ ಬರೆದು ಚೊಚ್ಚಲ ಬಾರಿಗೆ ನಿರ್ದೇಶಿಸಿರುವ ಸಿನಿಮಾ "ವಿದೂಷಕ'. ಇದೊಂದು ಕಾಮಿಡಿ ಕ್ರೈಮ್​​ ಥ್ರಿಲ್ಲರ್​ ಜಾನರ್​ ಚಿತ್ರವಾಗಿದ್ದು ರವಿ ಸಾಲಿಯಾನ್​, ಅರವಿಂದ್​ ರಾವ್​ ಮತ್ತು ಅಮೃತ್ತಾ ಉಪ್ಪಾರ್​ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದಾರೆ. ಇತ್ತೀಚೆಗಷ್ಟೆ ಚಿತ್ರದ ಟ್ರೇಲರ್​ ಬಿಡುಗಡೆ ಮಾಡಲಾಯಿತು. ನಿರ್ದೇಶಕ ಯಶವಂತ್​ ಬಿಜೂರ್​, "ಸಿನಿಮಾ ಮಾಡಬೇಕೆಂಬ ಬಹು ವರ್ಷಗಳ ಕನಸು "ವಿದೂಷಕ' ಮೂಲಕ ಈಡೇರಿದೆ. ಈ ಸಿನಿಮಾ ಮೂರು ವರ್ಷಗಳ ಪಯಣ. ಚಿತ್ರೀಕರಣಕ್ಕೂ ಮುನ್ನವೇ ಪ್ರತಿಯೊಂದು ದೃಶ್ಯ, ಬೆಳಕು ಹಾಗೂ ದೃಶ್ಯವಿನ್ಯಾಸದ ಬಗ್ಗೆ ಯೋಜನೆ ರೂಪಿಸಿಕೊಂಡಿದ್ದೆವು. ಗೈನೋಫೋಬಿಯಾ (ಮಹಿಳೆಯರನ್ನು ಕಂಡರೆ ಭಯಪಡುವ) ಕಾಯಿಲೆಯಿಂದ ಬಳಲುವ ನಾಯಕನ ಸುತ್ತ ಕಥೆ ಸಾಗುತ್ತದೆ. ನೈಜ ಟನೆಯಿಂದ ಪ್ರೇರಣೆ ಪಡೆದು ಈ ಕಥೆ ರೂಪಿಸಲಾಗಿದೆ' ಎಂದು ಮಾಹಿತಿ ನೀಡುತ್ತಾರೆ.

ನಾಯಕಿ ಅಮೃತಾ ಉಪ್ಪಾರ್​, "ನಾನು ಮೂಲತಃ ಪತ್ರಕರ್ತೆ. ನಂತರ ಕಿರುತೆರೆಯಲ್ಲಿ ಕೆಲ ಧಾರಾವಾಹಿಗಳಲ್ಲಿ ನಟಿಸಿದೆ. ಇದೀಗ "ವಿದೂಷಕ' ಮೂಲಕ ನಾಯಕಿಯಾಗಿದ್ದೇನೆ' ಎಂದು ಸಂತಸ ಹಂಚಿಕೊಂಡರು. ರವಿ, ಅರವಿಂದ್​, ಅಮೃತಾ ಜತೆ ಹೆದ್ದೂರು ಮಂಜುನಾಥ್​ ಶೆಟ್ಟಿ, ನಿಪುಣ್​, ಸುಹಾಸ್​ ತಾರಾಗಣದಲ್ಲಿದ್ದಾರೆ. ನಾಗೇಂದ್ರ ಅರಸ್​ ಸಂಕಲನ, ಪರಮೇಶ್ವರ್​ ಛಾಯಾಗ್ರಹಣದಲ್ಲಿ ಮೂಡಿಬಂದಿದ್ದು, ಇದೇ 20ರಂದು ಸಿನಿಮಾ ರಿಲೀಸ್​ ಆಗಲಿದೆ.