ನಿತೇಶ್ ತಿವಾರಿ ನಿರ್ದೇಶನದ, ರಣಬೀರ್ ಕಪೂರ್, ಯಶ್, ಸಾಯಿ ಪಲ್ಲವಿ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ ಬಹುನಿರೀಕ್ಷಿತ ‘ರಾಮಾಯಣ: ಭಾಗ 1’ ಇಂದು ವಿಶ್ವಾದ್ಯಂತ ತೆರೆ ಕಾಣಲಿದೆ. ರಿಲೀಸ್‌ಗೂ ಮುನ್ನವೇ ಸಿನಿಮಾ ಭಾರತೀಯ ಚಿತ್ರರಂಗ ಸೇರಿ ವಿಶ್ವಮಟ್ಟದಲ್ಲಿ ಹಲವು ಮೈಲಿಗಲ್ಲುಗಳಿಗೆ ಸಾಕ್ಷಿಯಾಗಿದೆ. ಭಾರತದಲ್ಲಿ ಅಂದಾಜು 10 ಸಾವಿರ ಸೇರಿ ವಿಶ್ವಾದ್ಯಂತ ಅಂದಾಜು 60 ಸಾವಿರಕ್ಕೂ ಅಧಿಕ ಸ್ಕ್ರೀನ್‌ಗಳಲ್ಲಿ ಚಿತ್ರ ಬಿಡುಗಡೆಯಾಗಲಿದೆ. ಭಾರತೀಯ ಸಿನಿಮಾ ಈ ದಾಖಲೆ ಮಟ್ಟದಲ್ಲಿ ರಿಲೀಸ್ ಆಗುತ್ತಿರುವುದು ಇದೇ ಮೊದಲು. ಆ ಮೂಲಕ ‘ರಾಮಾಯಣ’ ದೀಪಾವಳಿ ಹಬ್ಬದ ಸಡಗರವನ್ನು ಮತ್ತಷ್ಟು ಹೆಚ್ಚಿಸಿದೆ. ಈಗಾಗಲೇ ಅಮೆರಿಕದ ಲಾಸ್ ಏಂಜಲೀಸ್, ಲಂಡನ್ ಹಾಗೂ ಮುಂಬೈ ಸೇರಿ ಹಲವೆಡೆ ಪ್ರೀಮಿಯರ್ ಶೋ ನಡೆದಿದ್ದು, ಜಾಗತಿಕವಾಗಿಯೂ ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಈ ಹಿನ್ನೆಲೆಯಲ್ಲಿ ಮೊದಲ ದಿನವೇ ಚಿತ್ರ ಗಳಿಕೆಯಲ್ಲಿ ದಾಖಲೆ ಬರೆಯುವ ನಿರೀಕ್ಷೆಯಿದೆ. ದಕ್ಷಿಣ, ಉತ್ತರ ಭಾರತದ ಕಲಾವಿದರ ಜತೆಗೆ ರಾಷ್ಟ್ರೀಯ- ಅಂತಾರಾಷ್ಟ್ರೀಯ ಮಟ್ಟದ ತಂತ್ರಜ್ಞರು ಕೆಲಸ ಮಾಡಿರುವುದೇ ‘ರಾಮಾಯಣ’ ಚಿತ್ರದ ಹೈಲೈಟ್. ರಣಬೀರ್ ಕಪೂರ್ (ರಾಮ), ಸಾಯಿ ಪಲ್ಲವಿ (ಸೀತೆ), ಯಶ್ (ರಾವಣ) ಜತೆಗೆ ರವಿ ದುಬೆ (ಲಕ್ಷ್ಮಣ), ಸನ್ನಿ ಡಿಯೋಲ್ (ಹನುಮಂತ), ಲಾರಾ ದತ್ತಾ (ಕೈಕೇಯಿ), ವಿವೇಕ್ ಓಬೆರಾಯ್ (ವಿದ್ಯುತ್ಜೀವ), ಕಾಜಲ್ ಅಗರ್ವಾಲ್ (ಮಂಡೋದರಿ), ಅರುಣ್ ಗೋವಿಲ್ (ದಶರಥ), ರಕುಲ್ ಪ್ರೀತ್ ಸಿಂಗ್ (ಶೂರ್ಪನಖಿ) ಸೇರಿ ಹಲವರು ತಾರಾಗಣದಲ್ಲಿದ್ದಾರೆ. ಇನ್ನು ಅಂದಾಜು 4000 ಕೋಟಿ ರೂ. ಬಜೆಟ್‌ನಲ್ಲಿ ನಿರ್ಮಾಪಕ ನಮಿತ್ ಮಲ್ಹೋತ್ರಾ ಮತ್ತು ಯಶ್ ಹಾಲಿವುಡ್ ರೇಂಜಿಗೆ ‘ರಾಮಾಯಣ’ವನ್ನು ಎರಡು ಭಾಗಗಳಲ್ಲಿ ತೆರೆಗೆ ತರುತ್ತಿದ್ದಾರೆ. ಕನ್ನಡ, ಹಿಂದಿ, ತೆಲುಗು, ತಮಿಳು, ಮಲಯಾಳಂ, ಇಂಗ್ಲಿಷ್ ಸೇರಿ ಬಹುಭಾಷೆಗಳಲ್ಲಿ ಸಿನಿಮಾ ರಿಲೀಸ್ ಆಗುತ್ತಿದೆ. -ಏಜೆನ್ಸೀಸ್
ರಿಲೀಸ್‌ಗೂ ಮುನ್ನವೇ 110 ಕೋಟಿ ರೂ. ಗಳಿಕೆ
ದಸರಾ ಹಬ್ಬದಿಂದಲೇ ‘ರಾಮಾಯಣ: ಭಾಗ 1’ ಚಿತ್ರದ ಅಡ್ವಾನ್ಸ್ ಬುಕಿಂಗ್ ಆರಂಭವಾಗಿತ್ತು. ಇದೀಗ ಮುಂಗಡ ಟಿಕೆಟ್ ಬುಕಿಂಗ್‌ನಲ್ಲೂ ಸಿನಿಮಾ ದಾಖಲೆ ಬರೆದಿದೆ. ವಿಶ್ವಾದ್ಯಂತ ಸುಮಾರು 83,032 ಶೋಗಳ ಅಂದಾಜು 27 ಲಕ್ಷಕ್ಕೂ ಹೆಚ್ಚು ಟಿಕೆಟ್‌ಗಳು ಮಾರಾಟವಾಗಿವೆ. ಆ ಮೂಲಕ ಅಡ್ವಾನ್ಸ್ ಬುಕಿಂಗ್‌ನಿಂದ ₹110 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿಕೊಂಡಿದೆ. ಹಿಂದಿ ವರ್ಷನ್‌ನಿಂದ ಸುಮಾರು 50 ಕೋಟಿ ರೂ. ಅಡ್ವಾನ್ಸ್ ಕಲೆಕ್ಷನ್ ಆಗಿದೆ. ಇನ್ನು ಕರ್ನಾಟಕದಲ್ಲೂ ‘ರಾಮಾಯಣ’ ಕ್ರೇಜ್ ಇದ್ದು, ಮುಂಗಡವಾಗಿಯೇ 5 ಕೋಟಿ ರೂ. ಗಳಿಕೆಯಾಗಿದೆ. ತೆಲುಗಿನಿಂದ 3 ಕೋಟಿ ಮತ್ತು ತಮಿಳು, ಮಲಯಾಳಂನಿಂದ ತಲಾ 1.25 ಕೋಟಿ ರೂ. ಕಲೆಕ್ಷನ್ ಆಗಿದೆ ಎನ್ನಲಾಗಿದೆ. ಇದು ಭಾರತದ ಲೆಕ್ಕವಾದರೆ, ವಿದೇಶದಲ್ಲಿ ‘ರಾಮಾಯಣ’ ರಿಲೀಸ್‌ಗೂ ಮುನ್ನವೇ 50 ಕೋಟಿ ರೂ. ಕಮಾಯಿ ಮಾಡಿದೆ. ಬೆಂಗಳೂರು ಸೇರಿ ಹಲವು ಮಹಾನಗರಗಳಲ್ಲಿ ಬೆಳಗ್ಗೆ 6ರಿಂದಲೇ ಶೋಗಳು ಆರಂಭವಾಗುತ್ತಿವೆ. ಭಾರತ, ಅಮೆರಿಕ, ಇಂಗ್ಲೆಂಡ್, ಆಸ್ಟ್ರೇಲಿಯಾ ಸೇರಿ 100ಕ್ಕೂ ಅಧಿಕ ದೇಶಗಳಲ್ಲಿ ‘ರಾಮಾಯಣ’ ತೆರೆ ಕಾಣುತ್ತಿದೆ. ಮೊದಲ ದಿನವೇ ಅಂದಾಜು 250 ರೂ. ಕೋಟಿ ಅಧಿಕ ಗಳಿಕೆ ಮಾಡಬಹುದು ಎಂಬ ನಿರೀಕ್ಷೆಯಿದೆ.
