Rakshit Shetty Fined: ನಟ ರಕ್ಷಿತ್ ಶೆಟ್ಟಿಗೆ ಹೈಕೋರ್ಟ್‌ನಿಂದ 25 ಲಕ್ಷ ರೂ. ದಂಡ! ಏನಿದು ವಿವಾದ?

2012ರಲ್ಲಿ ತೆರೆಕಂಡ 'ಬ್ಯಾಚುಲರ್ ಪಾರ್ಟಿ' (Bachelor Party) ಸಿನಿಮಾದಲ್ಲಿ MTR ಮ್ಯೂಸಿಕ್ ಸಂಸ್ಥೆಗೆ ಸೇರಿದ ಹಾಡನ್ನು ಅನುಮತಿ ಇಲ್ಲದೆ ಬಳಸಲಾಗಿದೆ ಎಂಬುದು ಈ ವಿವಾದದ ಮೂಲ. ಚಿತ್ರದ ನಿರ್ಮಾಪಕರಾಗಿದ್ದ ರಕ್ಷಿತ್ ಶೆಟ್ಟಿ ಅವರು ತಮ್ಮ ಸಂಸ್ಥೆಯ ಅಡಿಯಲ್ಲಿ ಹಾಡನ್ನು ಬಳಸುವಾಗ ಮೂಲ ಸಂಸ್ಥೆಯಿಂದ ಯಾವುದೇ ಪರವಾನಗಿ ಪಡೆದಿರಲಿಲ್ಲ ಎಂದು ಎಂಟಿಆರ್ ಮ್ಯೂಸಿಕ್ ಸಂಸ್ಥೆ ದೆಹಲಿ ಹೈಕೋರ್ಟ್‌ನಲ್ಲಿ ದಾವೆ ಹೂಡಿತ್ತು.

ವಿಚಾರಣೆ ವೇಳೆ ರಕ್ಷಿತ್ ಶೆಟ್ಟಿ ಅವರ ಪರ ವಕೀಲರು, "ಸಿನಿಮಾದಲ್ಲಿ ಹಾಡನ್ನು ಅತ್ಯಂತ ಕಡಿಮೆ ಅವಧಿಗೆ ಮಾತ್ರ ಬಳಸಲಾಗಿದೆ, ಇದು ದೊಡ್ಡ ಅಪರಾಧವಲ್ಲ" ಎಂದು ವಾದ ಮಂಡಿಸಿದ್ದರು. ಆದರೆ ಈ ವಾದವನ್ನು ದೆಹಲಿ ಹೈಕೋರ್ಟ್ ತಳ್ಳಿಹಾಕಿದೆ.

"ಯಾವುದೇ ಸಿನಿಮಾದಿಂದ ಅಥವಾ ಮ್ಯೂಸಿಕ್ ಸಂಸ್ಥೆಯಿಂದ ಒಂದು ಚಿಕ್ಕ ತುಣುಕು ಅಥವಾ ದೃಶ್ಯವನ್ನು ಕಾಪಿ ಮಾಡಿದರೂ ಅದು ಹಕ್ಕುಸ್ವಾಮ್ಯ (Copyright) ಉಲ್ಲಂಘನೆಯೇ ಆಗುತ್ತದೆ" ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ. ಈ ಹಿನ್ನೆಲೆಯಲ್ಲಿ 25 ಲಕ್ಷ ರೂ. ದಂಡ ಪಾವತಿಸಲು ಆದೇಶಿಸಿದೆ.

ಎಂಟಿಆರ್ ಮ್ಯೂಸಿಕ್ ಸಂಸ್ಥೆ ಬೆಂಗಳೂರಿನದ್ದೇ ಆಗಿದ್ದರೂ ದೆಹಲಿ ಹೈಕೋರ್ಟ್‌ನಲ್ಲಿ ಕೇಸ್ ದಾಖಲಿಸಲು ಬಲವಾದ ಕಾರಣವಿದೆ. ಈ ಸಂಸ್ಥೆಯ ಲೀಗಲ್ ಟೀಮ್ ಮತ್ತು ಕಾನೂನು ವ್ಯವಹಾರಗಳನ್ನು ನೋಡಿಕೊಳ್ಳುವ ಕಚೇರಿ ಇರುವುದು ದೆಹಲಿಯಲ್ಲಿ. ಈ ಮೊದಲೇ ಬೆಂಗಳೂರಿನಲ್ಲಿ ಎಫ್‌ಐಆರ್ ದಾಖಲಾಗಿದ್ದರೂ, ಕಾನೂನು ಹೋರಾಟವನ್ನು ದೆಹಲಿಯಿಂದಲೇ ಮುಂದುವರಿಸಲು ಸಂಸ್ಥೆ ನಿರ್ಧರಿಸಿತ್ತು.

ಎಂಟಿಆರ್ ಮ್ಯೂಸಿಕ್ ಸಂಸ್ಥೆಯು ಸದ್ಯ ಸ್ಯಾಂಡಲ್‌ವುಡ್‌ನ ದೊಡ್ಡ ಮ್ಯೂಸಿಕ್ ಕಂಪನಿಗಳಲ್ಲಿ ಒಂದಾಗಿ ಬೆಳೆದಿದೆ. ಯಶ್ ಅಭಿನಯದ ಕೆಜಿಎಫ್-2 ಸೇರಿದಂತೆ ಹಲವು ಹಿಟ್ ಸಿನಿಮಾಗಳ ಮ್ಯೂಸಿಕ್ ರೈಟ್ಸ್ ಈ ಸಂಸ್ಥೆಯ ಬಳಿಯಿದೆ.

ರಾಹುಲ್ ಗಾಂಧಿ ವಿರುದ್ಧವೂ ಕೇಸ್: 2022ರಲ್ಲಿ 'ಭಾರತ್ ಜೋಡೋ' ಯಾತ್ರೆಯ ವಿಡಿಯೋಗಳಲ್ಲಿ ಕೆಜಿಎಫ್-2 ಹಾಡು ಬಳಸಿದ್ದಕ್ಕಾಗಿ ಕಾಂಗ್ರೆಸ್ ನಾಯಕರಾದ ರಾಹುಲ್ ಗಾಂಧಿ, ಜೈರಾಮ್ ರಮೇಶ್ ವಿರುದ್ಧವೂ ಇದೇ ಸಂಸ್ಥೆ ಕಾಪಿರೈಟ್ ಕೇಸ್ ಹಾಕಿ ಸುದ್ದಿಯಾಗಿತ್ತು.

ಈಗ ರಕ್ಷಿತ್ ಶೆಟ್ಟಿ ಅವರಿಗೆ ಬಿದ್ದಿರುವ ಈ ಭಾರಿ ದಂಡದ ಮೊತ್ತವು ಸಣ್ಣ ಮತ್ತು ದೊಡ್ಡ ನಿರ್ಮಾಣ ಸಂಸ್ಥೆಗಳಿಗೆ ಎಚ್ಚರಿಕೆಯ ಗಂಟೆಯಾಗಿದೆ ಎಂದು ವಿಶ್ಲೇಷಣೆ ಮಾಡಲಾಗುತ್ತಿದೆ,(ಏಜೆನ್ಸೀಸ್).