Raj B Shetty - ನಟ, ನಿರ್ದೇಶಕ, ನಿರ್ಮಾಪಕ ರಾಜ್ ಬಿ. ಶೆಟ್ಟಿ ಇದೀಗ ಈ ಮೂರು ವಿಷಯಗಳಲ್ಲೂ ಎಲ್ಲರ ಗಮನ ಸೆಳೆಯುತ್ತಿದ್ದಾರೆ. "ಸು ಫ್ರಮ್ ಸೋ'ನಲ್ಲಿ ಕಾಮಿಡಿಯನ್ ಕರುಣಾಕರ ಗುರೂಜಿಯಾಗಿ, "45'ನಲ್ಲಿ ಕಾಮನ್ ಮ್ಯಾನ್ ಪಾತ್ರದಲ್ಲಿ, "ಲ್ಯಾಂಡ್ಲಾರ್ಡ್'ನಲ್ಲಿ ಖಡಕ್ ವಿಲನ್ ಆಗಿ, ಇದೀಗ "ರಕ್ಕಸಪುರದೋಳ್'ನಲ್ಲಿ ಗೊಂದಲಮಯ ನಾಯಕನ ಪಾತ್ರದಲ್ಲಿ, ಹೀಗೆ ಭಿನ್ನ-ವಿಭಿನ್ನ ಎಕ್ಸ್ಟ್ರೀಮ್ ಪಾತ್ರಗಳಲ್ಲಿ ಮಿಂಚುತ್ತಿದ್ದಾರೆ. ಹಾಗೇ "ಕರಾವಳಿ' ಚಿತ್ರದಲ್ಲಿ ಮಾಲಿಂಗ ಪಾತ್ರದ ಲುಕ್ ಬಿಡುಗಡೆಯಾಗಿದ್ದು, ಕುತೂಹಲ ಮೂಡಿಸುವಂತಿದೆ. ಇನ್ನು ₹5 ಕೋಟಿ ಬಜೆಟ್ನಲ್ಲಿ "ಸು ಫ್ರಮ್ ಸೋ' ನಿರ್ಮಿಸಿ ₹120 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿಕೊಂಡು ನಿರ್ಮಾಣದಲ್ಲೂ ಸೈ ಎನಿಸಿಕೊಂಡಿದ್ದಾರೆ. ಅದರ ನಡುವೆ ಮಲಯಾಳಂನಲ್ಲೂ ಬ್ಯಾಕ್ ಟು ಬ್ಯಾಕ್ ಮೂರು ಚಿತ್ರಗಳಲ್ಲಿ ನಟಿಸಿದ ರಾಜ್, ಇದೀಗ ತಮಿಳು ಮತ್ತು ಹಿಂದಿಗೂ ಪದಾರ್ಪಣೆ ಮಾಡುತ್ತಿದ್ದಾರೆ. ಜತೆಗೆ ಉತ್ತರ ಕರ್ನಾಟಕದ ಕಥೆಯೊಂದನ್ನು ನಿರ್ಮಿಸಲು, ಮತ್ತೊಂದು ಹೊಸ ಜಾನರ್ ಕಥೆ ನಿರ್ದೇಶಿಸಲು ಸಿದ್ಧತೆ ನಡೆಸಿದ್ದಾರೆ. ಇತ್ತೀಚೆಗಷ್ಟೆ ಈ ಬಗ್ಗೆ ವಿಜಯವಾಣಿ ಜತೆ ಮಾತಿಗೆ ಸಿಕ್ಕಿದ್ದ ರಾಜ್ ಬಿ. ಶೆಟ್ಟಿ, "ನಾನು ಹೊಸತನವನ್ನೇ ಹುಡುಕಲು ಬಯಸುವವನು. ಹೀಗಾಗಿಯೇ "ಸು ಫ್ರಮ್ ಸೋ' ಯಶಸ್ಸಿನ ಬಳಿಕ ಮತ್ತೆ ಕಾಮಿಡಿ ಮಾಡಲ್ಲ ಅಂತ ಹೇಳಿದ್ದು. ಆ ಸಿನಿಮಾ ಸಕ್ಸಸ್ ಬೇರೆ ತಂಡಗಳು ಹೆಚ್ಚು ಕಾಮಿಡಿ ಚಿತ್ರಗಳತ್ತ ಗಮನ ಹರಿಸುವಂತೆ ಮಾಡಿತು. ಒಂದು ಫಾರ್ಮುಲಾ ಹಿಂದೆ ಓಡಲು ನನಗಿಷ್ಟವಿಲ್ಲ. ಈ ವರ್ಷ ಪ್ರಯೋಗಗಳಿಗಷ್ಟೇ ಸೀಮಿತ. ಕನ್ನಡಿಗರಷ್ಟೇ ನೋಡುವ ಸಿನಿಮಾ ಮಾಡುವುದನ್ನು ಬಿಟ್ಟು, ಭಾರತೀಯರು ನೋಡುವ ಸಿನಿಮಾ ಮಾಡಬೇಕು. ಇದು ಕನ್ನಡ ಸಿನಿಮಾ ಅಂತ ಇಡೀ ದೇಶದ ಜನ ಇಷ್ಟಪಟ್ಟು ನೋಡಬೇಕು. ನಮ್ಮ ಸಿನಿಮಾಗಳು ಎಲ್ಲೆಡೆ ಹೋಗಬೇಕು.
