ಬಿಡುಗಡೆಯಾದ ಎರಡೇ ದಿನಕ್ಕೆ ಮಾರ್ಕ್​ ಸಿನಿಮಾಗೆ ಪೈರಸಿ ಕಾಟ: ಕಿಚ್ಚ ಹೇಳಿದ ಪಡೆ ಆ್ಯಕ್ಟೀವ್​ ಆಯ್ತಾ? Kichcha Sudeepa

ಬೆಂಗಳೂರು : ಕುಂಬಾರನಿಗೆ ವರುಷ ದೊಣ್ಣೆಗೆ ನಿಮಿಷ ಎಂಬ ಗಾದೆ ಮಾತು ಸಿನಿಮಾ ರಂಗದಲ್ಲಿ ಪೈರಸಿ ವಿಚಾರಕ್ಕೆ ಬಹಳ ಸೂಕ್ತವಾಗಿದೆ. ಕೋಟಿಗಟ್ಟಲೆ ಹಣ ವ್ಯಯಿಸಿ, ತಿಂಗಳುಗಟ್ಟಲೇ ದೇಶ-ವಿದೇಶ ಅಲೆದು ನಿರ್ಮಾಪಕರು ಸಿನಿಮಾವನ್ನು ನಿರ್ಮಾಣ ಮಾಡುತ್ತಾರೆ. ಆದರೆ, ಕೆಲ ಕಿಡಿಗೇಡಿಗಳು ಕೇವಲ ಒಂದೇ ದಿನದಲ್ಲಿ ಚಿತ್ರವನ್ನು ರೆಕಾರ್ಡ್​ ಮಾಡಿ ಅದರ ಲಿಂಕ್​ ಅನ್ನು ಸಾಮಾಜಿಕ ಜಾಲತಾಣದಲ್ಲಿ ಶೇರ್​ ಮಾಡುವ ಮೂಲಕ ನಿರ್ಮಾಪಕರ ಜೇಬಿಗೆ ಕತ್ತರಿ ಹಾಕಿಬಿಡುತ್ತಾರೆ. ಇದೀಗ ಈ ಪೈರಸಿ ಕಾಟವನ್ನು ನಿನ್ನೆಯಷ್ಟೇ ಬಿಡುಗಡೆಯಾದ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ( Kichcha Sudeepa  )​ ನಟನೆಯ ಮಾರ್ಕ್​ ಸಿನಿಮಾ ಎದುರಿಸುತ್ತಿದೆ.

ಕ್ರಿಸ್​ಮಸ್​ (ಡಿ.25) ಹಬ್ಬದಂದೇ ಸುದೀಪ್​ ನಟನೆಯ ಮಾರ್ಕ್​ ಸಿನಿಮಾ ಬೆಳ್ಳಿ ತೆರೆಗೆ ಅಪ್ಪಳಿಸಿದೆ. ಸುದೀಪ್​ ಅವರು ಮತ್ತೊಮ್ಮೆ ಮಾಸ್​ ಅವತಾರದಲ್ಲಿ ಕಾಣಸಿಕೊಂಡಿದ್ದು, ಅಭಿಮಾನಿಗಳಿಗೆ ಮನರಂಜನೆಯ ರಸದೌತಣವೇ ಸಿಕ್ಕಿದೆ. ಭರ್ಜರಿ ಆ್ಯಕ್ಸನ್​ ಸೀನ್​, ಸುದೀಪ್​ ಅವರ ಸ್ವ್ಯಾಗ್ ಎಲ್ಲೂ ಬೋರ್​ ಹೊಡೆಯದ ಕತೆ ಹಾಗೂ ವೇಗದ ಸ್ಕ್ರೀನ್​ಪ್ಲೇ​ನೊಂದಿಗೆ ಮಾರ್ಕ್​ ಸಿನಿಮಾ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ಮೊದಲ ದಿನದ ಭರ್ಜರಿ ಓಟವನ್ನು ಮುಗಿಸಿ, ಎರಡನೇ ದಿನಕ್ಕೆ ಕಾಲಿಟ್ಟಿದೆ.

ಆದರೆ, ಎರಡನೇ ದಿನವೇ ಮಾರ್ಕ್​ ಸಿನಿಮಾ ಪೈರಸಿ ಕಾಪಿ ಸಾಮಾಜಿಕ ಜಾಲತಾಣದಲ್ಲಿ ಸೋರಿಕೆಯಾಗಿದೆ. ಪೈರಸಿ ಲಿಂಕ್​ಗಳನ್ನು ಟೆಲಿಗ್ರಾಮ್​ಗಳಲ್ಲಿ ಹರಿಬಿಡಲಾಗಿದೆ. ಇದರಿಂದಾಗಿ ಸಿನಿಮಾ ಮೇಲೆ ಹೊಡೆತ ಬೀಳಲಿದೆ. ಪೈರಸಿ ಮಾಡುವವರ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳುತ್ತೇವೆ ಎಂದು ಮಾರ್ಕ್​ ಸಿನಿಮಾ ತಂಡ ಖಡಕ್​ ಎಚ್ಚರಿಕೆ ನೀಡಿದರು ಸಹ ಕಿಡಿಗೇಡಿಗಳು ತಮ್ಮ ದುಷ್ಕೃತ್ಯವನ್ನು ನಿಲ್ಲಿಸಿಲ್ಲ. ಇದೀಗ ಸಿನಿಮಾ ತಂಡ ಈ ಪೈರಸಿ ವಿರುದ್ಧ ಯಾವ ರೀತಿ ಹೋರಾಡುತ್ತದೆ ಎಂದು ಕಾದು ನೋಡಬೇಕಿದೆ. 

ಕೆಲವರು #SaveProducersFromSudeep ಎಂಬ ಹ್ಯಾಶ್​ಟ್ಯಾಗ್​ ಅಡಿಯಲ್ಲಿ ಮಾರ್ಕ್​ ಸಿನಿಮಾದ ವಿರುದ್ಧ ಅಪಪ್ರಚಾರ ಮಾಡುತ್ತಿದ್ದಾರೆ. ಖಾಲಿ ಥಿಯೇಟರ್​ಗಳನ್ನು ಎಡಿಟ್​ ಮಾಡಿ ಮಾರ್ಕ್​ ಸಿನಿಮಾಗೆ ಜನರು ಯಾರೂ ಬರುತ್ತಿಲ್ಲ ಎಂದು ಬಿಂಬಿಸುತ್ತಿದ್ದಾರೆ. ಅಲ್ಲದೆ, ಬೇರೆ ಸಿನಿಮಾಗಳಿಗೆ ಜನರು ನೀಡಿದ ರಿವ್ಯೂಗಳನ್ನು ಮಾರ್ಕ್​ ಸಿನಿಮಾಗೆ ನೀಡಿದ್ದಾರೆ ಎನ್ನುವಂತೆ ಎಡಿಟ್​ ಮಾಡಿ ಹರಿಬಿಡುತ್ತಿದ್ದಾರೆ. ಇನ್ನು ಕೆಲವರು ನ್ಯೂಸ್​ ಚಾನೆಲ್​ಗಳ ಲೋಗೋವನ್ನು ದುರ್ಬಳಕೆ ಮಾಡಿಕೊಂಡು ಬೇರೆ ಸಿನಿಮಾಗಳಿಗೆ ನೀಡಿದ ಕೆಟ್ಟ ರಿವ್ಯೂಗಳನ್ನು ಹರಿಬಿಡುತ್ತಿದ್ದಾರೆ. ಸುದೀಪ್​ ಅವರ ನಿರ್ಮಾಪಕ ಹಿಮಾಲಯಕ್ಕೆ ಹೋಗುವುದು ಗ್ಯಾರಂಟಿ, ಸುದೀಪ್​ ಅವರಿಂದ ನಿರ್ಮಾಪಕರನ್ನು ಕಾಪಾಡಿ ಎಂದೆಲ್ಲ ಕಾಮೆಂಟ್​ಗಳನ್ನು ಮಾಡುವ ಮೂಲಕ ಮಾರ್ಕ್​ ಸಿನಿಮಾ ವಿರುದ್ಧ ನೆಗೆಟಿವ್​ ಟ್ರೆಂಡ್​ ಮಾಡುತ್ತಿದ್ದಾರೆ. 

ನೆಗೆಟಿವ್​ ಟ್ರೆಂಡ್​ ಮತ್ತು ಪೈರಸಿ ಲಿಂಕ್​ ಬೆಳವಣಿಗೆ ನೋಡಿದರೆ ಸುದೀಪ್​ ಅವರು ಹುಬ್ಬಳ್ಳಿಯಲ್ಲಿ ನಡೆದ ಪ್ರೀರಿಲೀಸ್​ ಈವೆಂಟ್​ ವೇಳೆ ಹೇಳಿದ ಮಾತುಗಳು ನೆನೆಪಿಗೆ ಬರುತ್ತಿದೆ. ಡಿ.25ಕ್ಕೆ ಒಂದು ಸಿನಿಮಾ (ಮಾರ್ಕ್​) ಬಿಡುಗಡೆಯಾಗುತ್ತದೆ. ಅದೇ ಸಮಯದಲ್ಲಿ ಒಂದು ಪಡೆ ಯುದ್ಧಕ್ಕೆ ಸಿದ್ಧವಾಗಿದೆ ಎಂದಿದ್ದರು. ಬಹುಶಃ ಮಾರ್ಕ್​ ಸಿನಿಮಾ ವಿರುದ್ಧ ನೆಗೆಟಿವ್​ ಟ್ರೆಂಡ್ ಹಾಗೂ ಪೈರಸಿ​ ಮಾಡಲೆಂದು ಒಂದು ಪಡೆ ಕಾರ್ಯನಿರತವಾಗಿದೆ ಅನ್ನೋದು ಈ ಬೆಳವಣಿಗೆಯಿಂದ ಗೊತ್ತಾಗುತ್ತಿದೆ.

ಆದರೆ, ಮಾರ್ಕ್​ ಸಿನಿಮಾ ಒಳ್ಳೆಯ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ. ಸಿನಿಮಾ ನೋಡಿದವರು ಉತ್ತಮ ಮನರಂಜನಾ ಸಿನಿಮಾ ಎಂಬ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ಅಭಿಮಾನಿಗಳು ಕೂಡ ಸಿನಿಮಾವನ್ನು ಮೆಚ್ಚಿಕೊಂಡಿದ್ದಾರೆ. ಇದರ ನಡುವೆ ಕೆಲವರು ನೆಗೆಟಿವ್​ ಟ್ರೆಂಡ್​ ಶುರು ಮಾಡಿರುವುದನ್ನು ನೋಡಿದರೆ, ಕಾಣದ ಕೈಗಳ ಕೈವಾಡ ಇದರಲ್ಲಿದೆ ಎಂಬ ಅನುಮಾನ ಹೊಗೆಯಾಡತೊಡಗಿದೆ.