ಕೋಟಿಗೊಬ್ಬ ಬೆಳ್ಳಿಹಬ್ಬ : ಕರ್ನಾಟಕ ರತ್ನ ಡಾ.ವಿಷ್ಣುವರ್ಧನ್ ನೆನಪುಗಳ ಸವಾರಿಯಲ್ಲಿ ಸ್ಯಾಂಡಲ್‌ವುಡ್ ಗಣ್ಯರು

ನಟ ಗಣೇಶ್, ‘ನಾನು ವಿಷ್ಣು ಸರ್ ದೊಡ್ಡ ಅಭಿಮಾನಿ. ಅವರ ಹಾಗೇ ಕೈಯಲ್ಲಿ ಕಡಗ ಹಾಕಿಕೊಂಡಿದ್ದೇನೆ. ವಿಷ್ಣು ಸರ್ ಸಿನಿಮಾಗಳನ್ನು ಬ್ಲಾಕ್ ಟಿಕೆಟ್ ತೆಗೆದುಕೊಂಡು ನೋಡುತ್ತಿದ್ದೆ. ಯಾವಾಗಲೂ ಸಂತೋಷವಾಗಿರುವಂತೆ ಇರಬೇಡ, ಸಂತೋಷವಾಗಿರು ಎಂದು ನನಗೆ ಸಲಹೆ ನೀಡುತ್ತಿದ್ದರು’ ಎಂದು ನೆನಪುಗಳನ್ನು ಹಂಚಿಕೊಂಡರು.

ನಟ ದೇವರಾಜ್, ವಿಷ್ಣು ಜತೆಗಿನ ಒಡನಾಟ ನೆನೆದು, ‘ಯಾವಾಗ ಮನೆಗೆ ಹೋದರೂ ನನ್ನನ್ನು ತಮ್ಮನ ತರ ಆತ್ಮೀಯತೆಯಿಂದ ಬರಮಾಡಿಕೊಂಡು, ಮನೆಯ ತೂಗುಯ್ಯಲೆಯಲ್ಲಿ ಕೂರಿಸಿಕೊಳ್ಳುತ್ತಿದ್ದರು. ಅಲ್ಲಿ ಭಾರತಿ ಕೈತುತ್ತು ನೀಡುತ್ತಿದ್ದರು. ವಿಷ್ಣು ಶಿಸ್ತು, ಸಂಯಮಗಳನ್ನೇ ನನ್ನ ಜೀವನದಲ್ಲಿ ಅಳವಡಿಸಿಕೊಂಡಿದ್ದೇನೆ. ಮುಂಬೈನಲ್ಲಿ ಈ ಚಿತ್ರದ ಶೂಟಿಂಗ್‌ಗಾಗಿ 30 ದಿನಗಳ ಕಾಲ ಅವರ ಜತೆ ಕಾಲ ಕಳೆದಿದ್ದು, ಮರೆಯಲಾಗದು. ‘ಸೂರಪ್ಪ’ ಚಿತ್ರದಲ್ಲಿ ನಾನು ಅವರ ವಿಗ್ರಹ ಒಡೆದು ಹಾಕುವ ಸನ್ನಿವೇಶವಿದ್ದರಿಂದ ಪಾತ್ರ ಮಾಡಲು ಒಪ್ಪಿಕೊಳ್ಳಲಿಲ್ಲ. ಆದರೆ, ‘ಕೋಟಿಗೊಬ್ಬ’ ಚಿತ್ರಕ್ಕೆ ಕರೆ ಬಂದಾಗ ಬ್ಯುಸಿ ಇದ್ದರೂ ತಕ್ಷಣ ಒಪ್ಪಿ, ಇನ್‌ಸ್ಪೆಕ್ಟರ್ ಪಾತ್ರ ಮಾಡಿದೆ’ ಎಂದು ಮೆಲುಕು ಹಾಕಿದರು.