ಬೆಂಗಳೂರು: ತ್ರಿವಿಕ್ರಮ್ ಸಪಲ್ಯ ನಿರ್ಮಾಣದ, ಸುಧೀರ್ ಅತ್ತಾವರ ನಿರ್ದೇಶನದ ‘ಕೊರಗಜ್ಜ’ ಚಿತ್ರತಂಡವು ಮೈಸೂರು ದಸರಾ ಮೆರವಣಿಗೆಯಲ್ಲಿ ಭಾಗವಹಿಸುವ ಮೂಲಕ ಮೈಲಿಗಲ್ಲು ಸಾಧಿಸಿತ್ತು. ಈಗಾಗಲೇ ಆಡಿಯೋ ರೈಟ್ಸ್, ವಿದೇಶಿ ಒಡಂಬಡಿಕೆ ಸೇರಿ ಹಲವು ವಿಚಾರಗಳಿಂದ ಸುದ್ದಿಯಲ್ಲಿರುವ ‘ಕೊರಗಜ್ಜ’ ತೆರೆಗೆ ಬರಲು ಸಿದ್ಧವಾಗಿದೆ. ಇದೀಗ ಚಿತ್ರತಂಡ ಮತ್ತೊಂದು ಹಂತದ ಪ್ರಚಾರಕ್ಕೆ ಮುಂದಾಗಿದ್ದು, ಇತ್ತೀಚೆಗೆ ಚಿತ್ರದ ಟ್ರೇಲರ್ ಬಿಡುಗಡೆ ಮಾಡಿದೆ. ಇಡೀ ಟ್ರೇಲರ್ ಸಸ್ಪೆನ್ಸ್ ಕಂಟೆಂಟ್ ಜತೆಗೆ ದೃಶ್ಯವೈಭವದೊಂದಿಗೆ ಮೂಡಿಬಂದಿದೆ. ಟ್ರೇಲರ್ 2.34 ನಿಮಿಷವಿದ್ದು, ಉದ್ಯಾವರ ಅರಸರ ಯುದ್ಧದೊಂದಿಗೆ ಆರಂಭವಾಗಿದೆ. ಬಳಿಕ ಅಗೋಚರ ಶಬ್ದದಿಂದಾಗಿ ಕಲಾವಿದರಾದ ಕಬೀರ್ ಬೇಡಿ, ಭವ್ಯಾ ಹಾಗೂ ಶ್ರುತಿ ಮೂವರಿಂದಲೂ ‘ಯಾರು ಆ ಮಾಯಾವಿ’ ಎಂಬ ಪ್ರಶ್ನೆ ಕೇಳಿಬರುತ್ತದೆ. ಪುರಾತನ ನಂಬಿಕೆ, ಸಂಪ್ರದಾಯಗಳು, ಸಾಮಾಜಿಕ ಸಂಘರ್ಷ ಮತ್ತು ಬುಡಕಟ್ಟು ಯುವಕನ ಅಸಾಧಾರಣ ಪಯಣವನ್ನು ಟ್ರೇಲರ್ ಪರಿಚಯಿಸಿದೆ. ಟ್ರೇಲರ್‌ನಲ್ಲಿ ‘ಕೊರಗಜ್ಜ’ಯಾರೆಂಬುದನ್ನು ಗುಟ್ಟು ಬಿಟ್ಟುಕೊಟ್ಟಿಲ್ಲ. ಗೋಪಿ ಸುಂದರ್ ಹಿನ್ನೆಲೆ ಸಂಗೀತ ರೋಮಾಂಚನ ಮೂಡಿಸುತ್ತದೆ. ಕಬೀರ್ ಬೇಡಿ, ಭವ್ಯಾ, ಶ್ರುತಿ, ಸಂದೀಪ್ ಸೋಪಾರ್ಕರ್, ಗಣೇಶ್ ಅಚಾರ್ಯ ಕಲಾಬಳಗದಲ್ಲಿದ್ದಾರೆ.
