'ಕೊರಗಜ್ಜ' ಚಿತ್ರ ಪ್ರಚಾರಕ್ಕೆ ಮಮ್ಮೂಟ್ಟಿ ತಂಡ ಬ್ರೇಕ್? ಕನ್ನಡ ಚಿತ್ರಗಳಿಗೂ ಪ್ರೋತ್ಸಾಹ ಸಿಗಲಿ: ಸುಧೀರ್ ಕಿಡಿ

ಬೆಂಗಳೂರು: ಸುಧೀ‌ರ್ ಅತ್ತಾವರ ನಿರ್ದೇಶನದ ಮತ್ತು ತ್ರಿವಿಕ್ರಮ್ ಸಪಲ್ಯ ನಿರ್ಮಾಣದ 'ಕೊರಗಜ್ಜ' ಚಿತ್ರತಂಡವು ರಿಲೀಸ್‌ಗೆ ಸಿದ್ಧವಾಗಿದೆ. ಬಾಲಿವುಡ್ ಹಿರಿಯ ನಟ ಕಬೀರ್ ಬೇಡಿ, ಸಂದೀಪ್ ಸೋಪರ್ಕರ್, ಗಣೇಶ್ ಆಚಾರ್ಯ, ನಟಿಯರಾದ ಶ್ರುತಿ, ಭವ್ಯಾ ತಾರಾಗಣದಲ್ಲಿರುವ ಈ ಚಿತ್ರವು ಸದ್ಯ ಪ್ಯಾನ್ ಇಂಡಿಯಾ ಪ್ರಚಾರಕ್ಕೆ ಮುಂದಾಗಿದೆ. ಆದರೆ, ಇದಕ್ಕೀಗ ಮಾಲಿವುಡ್​ ದಿಗ್ಗಜ ನಟನ ತಂಡದಿಂದ ಅಡಚಣೆ ಉಂಟಾಗಿದೆ.

ಇದೇ ಜ.24ರಂದು ರಾತ್ರಿ 8ಕ್ಕೆ ಕೇರಳದ ಕೊಚ್ಚಿಯಲ್ಲಿ ಚಿತ್ರತಂಡವು ಸುದ್ದಿಗೋಷ್ಠಿ ಆಯೋಜಿಸಿ, ಎಲ್ಲ ಸಿದ್ಧತೆಗಳನ್ನು ಮಾಡಿಕೊಂಡಿತ್ತು. ಹೀಗಿರುವಾಗಲೇ ಅದೇ ಸಮಯಕ್ಕೆ ಮಲಯಾಳಂ ನಟ ಮಮ್ಮೂಟ್ಟಿ ಅವರ 'ಛಾತಾ ಪಾಚ' ಚಿತ್ರದ ಸಕ್ಸಸ್ ಮೀಟ್ ಆಯೋಜಿಸುವ ಮೂಲಕ 'ಕೊರಗಜ್ಜ' ಚಿತ್ರದ ಕಾರ್ಯಕ್ರಮಕ್ಕೆ ಮಲಯಾಳಂ ನಟನ ಚಿತ್ರತಂಡ ಅಡಚಣೆ ಉಂಟುಮಾಡಿತು ಎಂದು ನಿರ್ದೇಶಕ ಸುಧೀರ್ ಅತ್ತಾವರ ಆರೋಪಿಸಿದ್ದಾರೆ.

'ಕೊಚ್ಚಿಯಲ್ಲಿ 'ಕೊರಗಜ್ಜ' ಚಿತ್ರತಂಡವು ಇದೇ 24ರಂದು ಸುದ್ದಿಗೋಷ್ಠಿ ಆಯೋಜಿಸಿತ್ತು. ವಾರದ ಮುಂಚೆಯೇ ಆಹ್ವಾನ ಪತ್ರಿಕೆ ಹೊರಡಿಸಿ, ಕಾರ್ಯಕ್ರಮದ ಸಿದ್ಧತೆ ಮಾಡಿಕೊಂಡಿದ್ದೆವು. ಹಾಗೆಯೇ ತಮ್ಮ ಬಿಜಿ ಶೆಡ್ಯೂಲ್ ಮಧ್ಯೆಯೂ ಬಾಲಿವುಡ್ ಹಿರಿಯ ನಟ ಕಬೀರ್ ಬೇಡಿ ಕಾರ್ಯಕ್ರಮಕ್ಕೆ ಆಗಮಿಸಿದ್ದರು. ಆದರೆ, ನಮ್ಮ ಕಾರ್ಯಕ್ರಮದ ಸಮಯದಲ್ಲಿಯೇ ಮಮ್ಮೂಟ್ಟಿ ಅವರ ಚಿತ್ರತಂಡದಿಂದ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ಅಂತಹ ಜನಪ್ರಿಯ ನಟನ ಕಾರ್ಯಕ್ರಮಕ್ಕೆ ಬಹುತೇಕ ಪತ್ರಕರ್ತರು ತೆರಳುತ್ತಾರೆ. ಇದರಿಂದಾಗಿ ನಮ್ಮ ಕಾರ್ಯಕ್ರಮ ಮುಂದೂಡಬೇಕು ಇಲ್ಲವೇ, ಸಂಜೆ 5ಕ್ಕೆ ಆಯೋಜಿಸಬೇಕು ಎಂಬ ಸೂಚನೆ ನಮ್ಮ ಪಿಅರ್‌ಒ ಸುಧೀರ್ ಮೂಲಕ ಬಂತು. ಈ ಬೆಳವಣಿಗೆಯಿಂದ ನಮ್ಮ ತಂಡಕ್ಕೆ ತುಂಬಾ ಘಾಸಿಯಾಗಿದೆ. ಕೊನೆಗೆ ನಾವು ಸಂಜೆ 5ಕ್ಕೆ ಕಾರ್ಯಕ್ರಮ ಆಯೋಜಿಸಿದೆವು. ಕಾರ್ಯಕ್ರಮದ ಯಶಸ್ಸಿಗೆ ಮಲಯಾಳಂ ನಟ ಮಮ್ಮೂಟ್ಟಿ ಅನುವು ಮಾಡಿಕೊಡಬೇಕಿತ್ತು. ರಾತ್ರಿ 8ಕ್ಕೆ ಅಯೋಜಿಸಿದ್ದ ಕಾರ್ಯಕ್ರಮ ಮುಂದೂಡಿದ್ದರಿಂದ ತಂಡಕ್ಕೆ ಆಗಿರುವ ನಷ್ಟವನ್ನು ಅವರ ತಂಡ ತುಂಬಿ ಕೊಡುವುದೇ?' ಎಂದು ಸುಧೀ‌ರ್ ಅತ್ತಾವರ ಪ್ರಶ್ನಿಸಿದ್ದಾರೆ.

ಕರ್ನಾಟಕದಲ್ಲಿ ಮಾಲಿವುಡ್ ಸಿನಿಮಾಗಳಿಗೆ ಬೆಂಬಲಿಸುವಾಗ ಕೇರಳದಲ್ಲಿ ಕನ್ನಡ ಚಿತ್ರಗಳಿಗೂ ಪ್ರೋತ್ಸಾಹ ಸಿಗಲಿ ಎನ್ನುವ ಸುಧೀರ್ ಅತ್ತಾವರ, 'ಮಮ್ಮೂಟ್ಟಿ ಅಂತಹ ಜನಪ್ರಿಯ ನಟರು ಕಾರ್ಯಕ್ರಮ ಆಯೋಜಿಸುವ ಮುಂಚೆ ಅದೇ ಸಮಯಕ್ಕೆ ಬೇರೆ ಕಾರ್ಯಕ್ರಮ ಇದೆಯೇ? ಎಂಬುದನ್ನು ಗೊತ್ತುಪಡಿಸಿಕೊಳ್ಳಬೇಕಿತ್ತು. ಏಕಾಏಕಿ ಈ ನಿರ್ಧಾರದಿಂದಾಗಿ 'ಕೊರಗಜ್ಜ' ಚಿತ್ರದ ಪ್ರಚಾರಕ್ಕೆ ತೊಡಕಾಗಿದೆ ಎಂದರು.

ಕರ್ನಾಟಕದಲ್ಲಿ ಮಾಲಿವುಡ್ ನಟರ ಸಿನಿಮಾಗಳಿಗೆ ಪ್ರೋತ್ಸಾಹ ನೀಡುವಂತೆ, ಕೇರಳದಲ್ಲಿ ಕನ್ನಡ ಪ್ಯಾನ್ ಇಂಡಿಯಾ ಸಿನಿಮಾಗಳಿಗೆ ಅಲ್ಲಿನ ನಟರು ಬೆಂಬಲವಾಗಿ ನಿಲ್ಲಬೇಕು. ಈ ಘಟನೆ ಕುರಿತಂತೆ ನಟ ಮಮ್ಮೂಟ್ಟಿ ಉತ್ತರಿಸಬೇಕು' ಎಂದು ಸುಧೀರ್ ಆಗ್ರಹಿಸಿದ್ದಾರೆ. ಮಾಲಿವುಡ್​ ಹಿರಿಯ ನಟನ ಚಿತ್ರತಂಡದ ವಿರುದ್ಧ ನಟ ಕಬೀರ್ ಬೇಡಿ ಕೂಡ ಆಕ್ರೋಶ ವ್ಯಕ್ತಪಡಿಸಿದ್ದು, 'ಇದು ದುರಂತ' ಎಂದಿದ್ದಾರೆ.