ಅದು ಸ್ಟಾರ್ಟ್​ ಆಗಿದ್ದೇ ಅಲ್ಲಿಂದ.... ಪೈರಸಿ ವಿಚಾರಕ್ಕೆ ಕಿಚ್ಚನ ಖಡಕ್​ ನುಡಿ, ಎಚ್ಚರಿಕೆಯ 'ಮಾರ್ಕ್​' | Kichcha Sudeep

ಬೆಂಗಳೂರು: ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್​ ( Kichcha Sudeepa ​) ಅಭಿನಯದ ಬಹುನಿರೀಕ್ಷಿತ 'ಮಾರ್ಕ್'​ ನಾಳೆ (ಡಿ.25) ಬಹುತೇಕ ಚಿತ್ರಮಂದಿರಗಳಲ್ಲಿ ಭರ್ಜರಿ ಓಪನಿಂಗ್​ಗೆ ಸಜ್ಜಾಗಿದೆ. ಈ ಮಧ್ಯೆ, ಚಿತ್ರದ ಪ್ರಚಾರ ಕೆಲಸಗಳಲ್ಲಿ ಸಖತ್ ಬಿಜಿಯಾಗಿರುವ ಸುದೀಪ್​, ವಿಜಯವಾಣಿ ನಡೆಸಿದ ಸಂದರ್ಶನದಲ್ಲಿ ಭಾಗಿಯಾಗಿ, ತಮ್ಮ ಸಿನಿಮಾಗೆ ಸಂಬಂಧಿಸಿದಂತೆ ಹಲವು ಕುತೂಹಲಕಾರಿ ವಿಷಯಗಳನ್ನು ಹಂಚಿಕೊಂಡರು.

'ಮಾರ್ಕ್​' ಚಿತ್ರದ ದಿನವೇ ಕನ್ನಡದ ಮತ್ತೊಂದು ಬಹುನಿರೀಕ್ಷಿತ ಚಿತ್ರವಾದ ಅರ್ಜುನ್ ಜನ್ಯ ನಿರ್ದೇಶನದ, ಉಪೇಂದ್ರ, ರಾಜ್​ ಬಿ.ಶೆಟ್ಟಿ ಮತ್ತು ಶಿವರಾಜ್​ಕುಮಾರ್ ನಟಿಸಿರುವ '45' ಕೂಡ ತೆರೆ ಕಾಣುತ್ತಿದೆ. ಈ ಮೂಲಕ ಬಾಕ್ಸ್ ಆಫೀಸ್​ನಲ್ಲಿ ಭರ್ಜರಿ ಪೈಪೋಟಿಗೆ ಕನ್ನಡ ಚಿತ್ರಗಳು ಇಳಿದಿವೆ. ಇದು ತೀವ್ರ ಕುತೂಹಲ ಕೆರಳಿಸಿದೆ ನಿಜ. ಆದರೆ, ಇದೆಲ್ಲದರ ಮಧ್ಯೆ ಫ್ಯಾನ್ಸ್​ಗಳ ಸಮರ ಜೋರಾಗಿದೆ.

ಈ ಎಲ್ಲ ಬೆಳವಣಿಗೆಗಳು ಸದ್ಯ ಸ್ಟಾರ್​ ವಾರ್​ ಜತೆಗೆ ಫ್ಯಾನ್ಸ್ ವಾರ್​ಗೂ ಸಾಕ್ಷಿಯಾಗಿದೆ. ಮತ್ತೊಂದೆಡೆ, ರಾಜ್​ ಬಿ.ಶೆಟ್ಟಿ, ಉಪೇಂದ್ರ ಮತ್ತು ಶಿವರಾಜ್​ಕುಮಾರ್​ ಅವರ ತ್ರಿಮೂರ್ತಿಗಳ ಸಂಗಮ '45' ಕೂಡ ಮಾರ್ಕ್​ ದಿನವೇ ರಿಲೀಸ್​ ಆಗುತ್ತಿರುವುದು ಕನ್ನಡ ಸಿನಿಪ್ರೇಕ್ಷಕರಿಗೆ ಮನರಂಜನೆಯ ರಸದೌತಣ ನೀಡಲಿವೆ. ಇದು ಇತರೆ ಚಿತ್ರರಂಗದ ಗಮನ ಸೆಳೆದಿದ್ದು, ಕನ್ನಡ ಸಿನಿಮಾಗಳ ಮೇಲೆ ಕಣ್ಣಾಯಿಸುವಂತೆ ಮಾಡಿದೆ. ಪ್ರತಿಬಾರಿ ನಮ್ಮ ಚಿತ್ರಗಳು ಅನ್ಯ ಭಾಷೆಯ ಫಿಲಂಗಳೊಂದಿಗೆ ಪೈಪೋಟಿ ನೀಡಬೇಕಿತ್ತು. ಆದರೀಗ, ನಮ್ಮದೇ ಚಿತ್ರಗಳು ಒಂದೇ ತಿಂಗಳಲ್ಲಿ, ಒಂದೇ ದಿನ ಜಿದ್ದಾಜಿದ್ದಿಗೆ ಬಿದ್ದಿರುವುದು ನಿಜಕ್ಕೂ ಗಮನಾರ್ಹ.