JC movie review: ‘ಜೈಲು ಹಕ್ಕಿ’ಯ ಹಿಂದಣ... ಮುಂದಣ...

ನಿರ್ದೇಶನ: ಚೇತನ್ ಜಯರಾಮ್

ತಾರಾಗಣ: ಸೂರ್ಯ ಪ್ರಖ್ಯಾತ್, ಭಾವನಾ ರೆಡ್ಡಿ, ಥ್ರಿಲ್ಲರ್ ಮಂಜು, ರಂಗಾಯಣ ರಘು, ಹಂಸ ಮತ್ತಿತರರು.

‘ಮನುಷ್ಯ ಒಂದೇ ಜೀವನ ಅಂತಾ ಬದುಕ್ತಿರ್ತಾನೆ, ಎಲ್ಲ ಮುಗಿದ ಮೇಲೆ ಗೊತ್ತಾಗೋದು ಇನ್ನೊಂದು ಜೀವನ ಇದೆ ಅಂತಾ’ ಎಂಬ ಡೈಲಾಗ್ ‘ಜೆಸಿ: ದ ಯೂನಿವರ್ಸಿಟಿ’ ಚಿತ್ರದ ಒನ್‌ಲೈನ್ ಸ್ಟೋರಿ. ಇದು ಬಿಸಿರಕ್ತದ ಯುವಕನ ಪ್ರತೀಕಾರದ ಕಥೆಯಾಗಿದ್ದು, ಕ್ಲೈಮ್ಯಾಕ್ಸ್ ಹೊರತುಪಡಿಸಿ ಇಡೀ ಸಿನಿಮಾ ರಿವೇಂಜ್ ಸ್ಟೋರಿ ಎಂಬಂತೆ ಮೂಡಿಬಂದಿದೆ.

ಗಾಯಕ ಕೃಷ್ಣಮೂರ್ತಿ (ರಂಗಾಯಣ ರಘು) ಮುದ್ದಿನ ಮಗ ಮಧುಸೂದನ್ (ಪ್ರಖ್ಯಾತ್). ಕಾಲೇಜಿನ ಸಹಪಾಠಿ ಮೇಘನಾ (ಭಾವನಾ) ಜತೆ ಸ್ನೇಹ-ಪ್ರೀತಿ. ಒಮ್ಮೆ ಮಧುಸೂದನ್ ಗೆಳೆಯ ಲೋಕಲ್ ರೌಡಿಗಳ ಜತೆ ಗಲಾಟೆ ಮಾಡಿಕೊಳ್ಳುತ್ತಾನೆ. ಆತನಿಗೆ ಹೊಡೆದು, ಫೋನ್ ಕಿತ್ತುಕೊಂಡು ಹೋಗುವ ಟ್ವಿನ್ಸ್ ಎಂಬುವವರು ಮೇಘನಾ ನಂಬರ್ ತೆಗೆದುಕೊಂಡು ಉಪಟಳ ನೀಡುತ್ತಾರೆ. ಇದು ಮಧುಸೂದನ್ ಸಿಟ್ಟಿಗೆ ಕಾರಣವಾಗಿ, ಅವರನ್ನು ವಿಚಾರಿಸಿಕೊಳ್ಳಲು ಹೋಗಿ, ಅವನ ಬಾಸ್ ರಾಕಾ ಬಳಿ ಏಟು ತಿಂದು ಬರುತ್ತಾನೆ. ಆ ಅವಮಾನ ಸಹಿಸದ ಮಧು ಮುಂದೆ ರಾಕಾ ಟೀಂ ಜತೆ ಹೊಡೆದಾಡಿ ಜೈಲು ಪಾಲಾಗುತ್ತಾನೆ. ಎರಡೇ ದಿನಕ್ಕೆ ಹೊರಬರುವ ಆತ, ಪ್ರತೀಕಾರ ತೀರಿಸಿಕೊಳ್ಳಲೇಬೇಕು ಅಂತ ಮ್ಯಾಡಿ ಆಗಿ ಬದಲಾಗುತ್ತಾನೆ. ಕೊನೆಗೆ ರಾಕಾ ಬದಲು ಇನ್ನೊಬ್ಬ ಪ್ರಮುಖ ವ್ಯಕ್ತಿಯನ್ನೇ ಹತ್ಯೆ ಮಾಡುತ್ತಾನೆ. ತದನಂತರ ನಡೆಯುವ ಮ್ಯಾಡಿ-ರಾಕಾ ಕಾಳಗವೇ ‘ಜೆಸಿ’ ಮುಂದುವರಿದ ಕಥೆ.

ಮಾಸ್ ಎಲಿಮೆಂಟ್ ಜತೆಗೆ ಸ್ನೇಹ, ಪ್ರೀತಿ, ತಂದೆ-ಮಗನ ಬಾಂಧವ್ಯಗಳ ಮೂಲಕ ನಿರ್ದೇಶಕ ಚೇತನ್ ಕಥೆ ನಿರೂಪಿಸಿದ್ದಾರೆ. ಅಮೂಲ್ ಬೇಬಿಯಂತ ಹುಡುಗನ ಪ್ರೀತಿ, ಬಳಿಕ ದ್ವೇಷ, ಪ್ರತೀಕಾರ ಕೊನೆಗೆ ಕಾಡುವ ಪಶ್ಚತ್ತಾಪವನ್ನು ನಾನ್ ಲೀನಿಯರ್ ಆಗಿ ಹೇಳಿದ್ದಾರೆ. ಆರಂಭದಿಂದ ಕ್ಲೈಮ್ಯಾಕ್ಸ್‌ವರೆಗೆ ಸಿನಿಮಾ ನೋಡಿಸಿಕೊಂಡು ಹೋಗುತ್ತದೆ. ಆದರೆ, ಕ್ಲೈಮ್ಯಾಕ್ಸ್‌ನಲ್ಲಿ ಪ್ರತೀಕಾರಕ್ಕೆ ಮುಂದಾದಾಗ ತಂದೆ-ಮಗನ ಬಾಂಧವ್ಯ ವಿಚಾರ ಮುನ್ನೆಲೆಗೆ ತಂದಿದ್ದು, ಮೊದಲಿದ್ದ ದ್ವೇಷದ ಬಿಸಿ ಆರುತ್ತದೆ. ಅಲ್ಲಿ ರಿವೇಂಜ್‌ಗೆ ಗಮನಹರಿಸಿದ್ದರೆ ಚೇತನ್ ಫುಲ್ ಮಾರ್ಕ್ಸ್ ಪಡೆಯುತ್ತಿದ್ದರು. ಸೂರ್ಯ ಪ್ರಖ್ಯಾತ್ ಮಾಸ್ ಆಗಿ ಗಮನ ಸೆಳೆಯುತ್ತಾರೆ. ಭಾವನಾ ಅಚ್ಚುಕಟ್ಟಾಗಿ ನಟಿಸಿದ್ದಾರೆ. ರಂಗಾಯಣ ರಘು, ಥ್ರಿಲ್ಲರ್ ಮಂಜು ಕೊಟ್ಟ ಜವಾಬ್ದಾರಿ ನಿರ್ವಹಿಸಿದ್ದಾರೆ. ಪ್ರಮುಖ ವಿಲನ್ ಪಾತ್ರ ಸೇರಿ ಹಲವರು ಹೊಸಬರಿದ್ದು ಎಲ್ಲರೂ ಇಷ್ಟವಾಗುತ್ತಾರೆ.