ಮೇಕಪ್ ಆರ್ಟಿಸ್ಟ್ ಟು ಮೆಗಾ ಸ್ಟಾರ್: ವಿಜಯ ಲಕ್ಷ್ಮಿ ಅಲಿಯಾಸ್ ಸಿಲ್ಕ್ ಸ್ಮಿತಾ ಹಿಂದಿನ ಅಸಲಿ ಕತೆ ಗೊತ್ತೇ?.. Silk Smitha

Silk Smitha Biography: ಹಳ್ಳಿ ಮೇಷ್ಟ್ರೇ ಹಳ್ಳಿ ಮೇಷ್ಟ್ರೇ ಎನ್ನುತ್ತಲೇ ಕನ್ನಡಿಗರಿಗೆ ಹೆಚ್ಚಾಗಿ ಚಿರಪರಿಚಿತರಾದ ಸಿಲ್ಕ್​ ಸ್ಮಿತಾ.. ಭಾರತೀಯ ದಕ್ಷಿಣ ಸಿನಿಮಾ ರಂಗದಲ್ಲಿ ಹೀರೋಗಳಷ್ಟೇ ಬೇಡಿಕೆ ಗಿಟ್ಟಿಸಿಕೊಂಡಿದ್ದ ನಟಿ. ಎಂಭತ್ತರ ದಶಕದಲ್ಲಿ  ಆಕೆ ತೆರೆ ಮೇಲೆ ಕಾಣಿಸಿಕೊಂಡರೆ ಸಾಕು, ಚಿತ್ರಮಂದಿರಗಳಲ್ಲಿ ಶಿಳ್ಳೆ-ಚಪ್ಪಾಳೆಗಳ ಸುರಿಮಳೆಯಾಗುತ್ತಿತ್ತು. ರಜನೀಕಾಂತ್​ ಮತ್ತು ಚಿರಂಜೀವಿಯಂತಹ ಸ್ಟಾರ್​ ನಟರೇ ಅವರ ಡೇಟ್​ಗಾಗಿ ಕಾಯಬೇಕಿತ್ತು.  ಒಂದೇ ಒಂದು ಹಾಡಿನಲ್ಲಿ ಕಾಣಿಸಿಕೊಂಡರು ಆ ಸಿನಿಮಾ ಹಿಟ್​​ ಕಾಣುತ್ತಿತ್ತು. ವಿಜಯಲಕ್ಷ್ಮಿ ಅಲಿಯಾಸ್ ಸಿಲ್ಕ್​ ಸ್ಮಿತಾರ ಬಾಳು ಅಷ್ಟು ಸಲೀಸಾಗಿ ಇರಲಿಲ್ಲ ಅವರ ಯಶಸ್ಸಿನ ಹಿಂದೆ ಕಾಡುತ್ತಿದ್ದ ಬಡತನ, ಶೋಷಣೆ ಹಾಗೂ ಏಕಾಂಗಿತನದ ಕರಾಳ ಹಾದಿಯಾಗಿತ್ತು.

ಸಿಲ್ಕ್​ ಸ್ಮಿತಾ ಮೂಲತಃ ಆಂಧ್ರಪ್ರದೇಶದ  ಸಣ್ಣ ಹಳ್ಳಿಯೊಂದರಲ್ಲಿ ಜನಿಸಿದರು. ಅವರ ಮೊದಲ ಹೆಸರು ವಡ್ಲಪಾಟಿ ವಿಜಯಲಕ್ಷ್ಮಿ.  ಕಡು ಬಡತನದಲ್ಲೇ ಹುಟ್ಟಿದ ಅವರು, 4ನೇ ಕ್ಲಾಸ್​ ಓದುತ್ತಿದ್ದಾಗಲೇ ಮನೆಯ ಪರಿಸ್ಥಿತಿ ಅರ್ಥ ಮಾಡಿಕೊಂಡು ಓದನ್ನು ಅರ್ಧಕ್ಕೆ ಬಿಟ್ಟರು. 14ನೇ ವರ್ಷದಾಕೆಯಿದ್ದಾಗ ತನಗಿಂತ ಹೆಚ್ಚು ವಯಸ್ಸಿನ ವ್ಯಕ್ತಿಯನ್ನು ಪೋಷಕರ ಬಲವಂತ ಹಾಗೂ ಮನೆಯ ಆರ್ಥಿಕ ಸ್ಥಿತಿಯಿಂದಾಗಿ ಮದುವೆ ಮಾಡಿಕೊಳ್ಳುವ ಸ್ಥಿತಿ ಇತ್ತು. ವೈವಾಹಿಕ ಜೀವನದಲ್ಲಿಯೂ ಸಿಲ್ಕ್​ ಸ್ಮಿತಾ ಅಷ್ಟೇನೂ ಸುಖವನ್ನು ಕಂಡಿಲ್ಲ. ಪತಿ ಮನೆಯಲ್ಲಿ ನಿತ್ಯವೂ ದೈಹಿಕ ಮತ್ತು ಮಾನಸಿಕ ತೊಳಲಾಟವನ್ನು ಆಕೆ ಅನುಭವಿಸಿದ್ದಳು ಎರಡು ವರ್ಷಗಳಲ್ಲೇ ಮದುವೆ ಮುರಿದುಕೊಂಡು ಅಲ್ಲಿಂದ ದೂರ ಬಂದರು.

ಪೋಷಕರು ನೋಡಿ ಮದುವೆ ಮಾಡಿಸಿದ್ದ ವ್ಯಕ್ತಿಯಿಂದ ದೂರಾಗಿ ಚೆನ್ನೈಗೆ ವಿಜಯಲಕ್ಷ್ಮಿ ಬರುತ್ತಾರೆ. ಗೊತ್ತಿಲ್ಲದ ಊರು, ಜನರ ಮಧ್ಯೆ ಬದುಕು ಅಷ್ಟು ಸುಲಭವಾಗಿರಲಿಲ್ಲ. ಚಿತ್ರರಂಗದಲ್ಲಿ ಕೆಲಸ ಹುಡುಕುತ್ತಾ ಮೇಕಪ್ ಆರ್ಟಿಸ್ಟ್ ಆಗಿ ವೃತ್ತಿ ಆರಂಭಿಸಿದರು. ನಟಿಯರಿಗೆ ಟಚ್-ಅಪ್ ಮಾಡುತ್ತಿದ್ದ ಅವರ ಕಣ್ಣಿನ ಕಾಂತಿಯನ್ನು ಗಮನಿಸಿದವರು ನಿರ್ದೇಶಕ ವಿನು ಚಕ್ರವರ್ತಿ.

 ಚೆನ್ನೈನ ಎವಿಎಂ ಸ್ಟುಡಿಯೋಸ್ ಬಳಿಯ ಹಿಟ್ಟು ಗಿರಣಿಯೊಂದರ ಬಳಿ ಇವರನ್ನು ಕಂಡ ಅವರು, ಇವರಲ್ಲಿ ನಟಿಯಾಗುವ ಎಲ್ಲ ಲಕ್ಷಣಗಳಿವೆ ಎಂದು ಗುರುತಿಸಿ, ನಟನೆ ಮತ್ತು ನೃತ್ಯದ ತರಬೇತಿ ಕೊಡಿಸಿದರು. 

ಆಂಟನಿ ಈಸ್ಟ್‌ಮನ್ ನಿರ್ದೇಶನದ "ಇನಾಯೆ ಥೇಡಿ" ಎನ್ನುವ ಸಿನಿಮಾದಲ್ಲಿ ನಟಿಸಿದರು. ಆದರೆ, ಈ ಸಿನಿಮಾ ರಿಲೀಸ್ ಆಗಲಿಲ್ಲ. ಆದರೆ, ಆಗಲೇ ಅವರು ಮಲಯಾಳಂನಲ್ಲಿ ಭಾರಿ ಫೇಮಸ್​ ಆದರು.

1980ರಲ್ಲಿ ಬಿಡುಗಡೆಯಾದ 'ವಂಡಿಚಕ್ಕರಂ' ಸಿನಿಮಾ ಇವರ ಬದುಕನ್ನು ಬದಲಿಸಿತು. ಅದರಲ್ಲಿ 'ಸಿಲ್ಕ್' ಎಂಬ ಪಾತ್ರ ನಿರ್ವಹಿಸಿದ ನಂತರ ವಿಜಯಲಕ್ಷ್ಮಿ ಅವರು 'ಸಿಲ್ಕ್ ಸ್ಮಿತಾ' ಹೆಸರು ಪಡೆದು ಖ್ಯಾತಿಯಾದರು. 

ನನಗೆ ಕ್ಯಾರೆಕ್ಟರ್​ ಆಗ್ಬೇಕಿತ್ತು...

ನನಗೆ ಗಂಭೀರ ಪಾತ್ರಗಳನ್ನು ಮಾಡುವ ಆಸೆಯಿತ್ತು. ಒಂದು ಕ್ಯಾರೆಕ್ಟರ್​ ಆಗಿ ನಟನೆ ಮಾಡುವುದು ನನ್ನ ಆಶಯವಾಗಿತ್ತು. ಆದರೆ, ಒಂದು ಹಿಟ್​​ನ ನಂತರ ಬಂದ ಎಲ್ಲ ಸಿನಿಮಾಗಳು  ನನ್ನನ್ನು ಗ್ಲಾಮರ್​​ ಗೊಂಬೆಯನ್ನಾಗಿಯೇ ಗುರುತಿಸಿತು, ಪ್ರೇಕ್ಷಕರು ಅದನ್ನು ಇಷ್ಟಪಟ್ಟರು, ಹೀಗಾಗಿ ನಿರ್ಮಾಪಕ-ನಿರ್ದೇಶಕರನ್ನು ನೋಯಿಸಬಾರದೆಂದು ಅಂತಹ ಪಾತ್ರಗಳನ್ನೇ ಒಪ್ಪಿಕೊಳ್ಳಬೇಕಾಯಿತು ಎಂದು ಸಿಲ್ಕ್ ಸ್ಮಿತಾ ಬೇಸರದಿಂದ ಸಂದರ್ಶನವೊಂದರಲ್ಲಿ ಅವರು ಮಾತನಾಡಿದ್ದರು

ಸಿಲ್ಕ್ ಸ್ಮಿತಾ ಅವರ ಜನಪ್ರಿಯತೆ ಎಷ್ಟಿತ್ತೆಂದರೆ, ರಜನಿಕಾಂತ್, ಕಮಲ್ ಹಾಸನ್, ವಿಷ್ಣುವರ್ಧನ್, ಅಂಬರೀಶ್, ಮೋಹನ್​ ಲಾಲ್​​ ಅಂತಹ ಘಟಾನುಘಟಿ ನಟರ ಸಿನಿಮಾಗಳಲ್ಲೂ ಅವರಿಗಾಗಿ ಒಂದು ಪ್ರತ್ಯೇಕ ಸಾಂಗ್ ಇರಲೇಬೇಕಿತ್ತು. ಅವರ ಡೇಟ್​ಗಾಗಿ ನಾಯಕರು ತುಂಬಾನೆ ಕಾಯುತ್ತಿದ್ದರು. ದಕ್ಷಿಣ ಕನ್ನಡದ ಸಿನಿಮಾಗಳಲ್ಲಿ ಹಾಗೂ ಹಿಂದಿ ಸೇರಿದಂತೆ  ಐದು ಭಾಷೆಗಳಲ್ಲಿ 450ಕ್ಕೂ ಹೆಚ್ಚು ಸಿನಿಮಾದಲ್ಲಿ ಮಿಂಚಿದರು. ಸಿಲ್ಕ್​ ಸ್ಮಿತಾರಿಗೆ ಬೇಡಿಕೆ ಎಷ್ಟಿತ್ತೆಂದರೆ 1983 ಒಂದೇ ವರ್ಷದಲ್ಲಿ 44 ಸಿನಿಮಾದಲ್ಲಿ ಅವರು ನಟಿಸಿದ್ದರು. ಅವರು ಒಂದು ಹಾಡಿಗೆ ಪಡೆಯುತ್ತಿದ್ದ ಸಂಭಾವನೆ ಅಂದಿನ ನಾಯಕರಿಗಿಂತ ಹೆಚ್ಚಿತ್ತು

 ಸಿಲ್ಕ್​ ಸ್ಮಿತಾ ಅವರರು ಒಂದು ನೃತ್ಯಕ್ಕೆ ಆ ಕಾಲದಲ್ಲಿಯೇ 50,000 ರೂ. ಗಳಿಸುತ್ತಿದ್ದರು, ಹೀಗೊಮ್ಮೆ ಅವರು ಭಾಗಿಯಾಗಿದ್ದ ಸಂದರ್ಶನದಲ್ಲಿ ಮಾತನಾಡಿ. ನನ್ನ ವೃತ್ತಿಜೀವನ ಬಹಳ ಸಣ್ಣದು ಕೇವಲ 4 ವರ್ಷದಲ್ಲಿ  200 ಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ನಟಿಸಿದ್ದೇನೆ.  ಸ್ವಾಭಾವಿಕವಾಗಿ, ನನ್ನ ಯಶಸ್ಸಿನ ಬಗ್ಗೆ ಅಸೂಯೆ ಪಟ್ಟ ಹಲವಾರು ಜನರು ಇರಬೇಕು.   ನನ್ನ ಖ್ಯಾತಿಗೆ ಹಾನಿ ಮಾಡಲು ಕೆಲವರು ಯತ್ನಿಸುತ್ತಿದ್ದಾರೆ ಎಂದಿದ್ದರು. 

ಸಿಲ್ಕ್​ ಸ್ಮಿತಾ ಜೀವನದಲ್ಲಿ ಎಲ್ಲವೂ ಇತ್ತು..ಹಣ ಅಂತಸ್ತು ಆಸ್ತಿ ಎಲ್ಲ. ಆದರೆ...90ರ ದಶಕದ ಅಂತ್ಯದಲ್ಲಿ ಅವರ ವೃತ್ತಿ ಜೀವನಕ್ಕೆ ಸಮಸ್ಯೆಯಾಯಿತು. ಸಿನಿಮಾ ನಿರ್ಮಾಣಕ್ಕೆ ಕೈ ಹಾಕಿ ನಷ್ಟ ಅನುಭವಿಸಿದರು. ಹಲವರು ಅವರಿಗೆ ಮೋಸ ಮಾಡಿದರು. ಕಷ್ಟ ಕಾಲದಲ್ಲಿ ಸಹಾಯಕ್ಕೆ ಯಾರು ಬರಲೇ ಇಲ್ಲ. ಹೀಗೆ ಇರಬೇಕಾದರೆ  1996 ಸೆಪ್ಟೆಂಬರ್ 23 ಚೆನ್ನೈನ ತಮ್ಮ ನಿವಾಸದಲ್ಲಿ ಸಿಲ್ಕ್ ಸ್ಮಿತಾ ಶವವಾಗಿ ಪತ್ತೆಯಾದರು. 

ಸಾವಿಗೂ ಮುನ್ನ ಸಿನಿಮಾ ರಂಗದ ಆಪ್ತರಾದ ರವಿಚಂದ್ರನ್​ ಮತ್ತು ಅನುರಾಧ ಅವರಿಗೆ ಕರೆ ಮಾಡಲು ಯತ್ನಿಸಿದ್ದಾರೆ. ಆದರೆ ಯಾರೂ ಸಿಗಲಿಲ್ಲ. ಅವರ ಮನೆಯಲ್ಲಿ ಸಿಕ್ಕ ಡೆತ್ ನೋಟ್‌ನಲ್ಲಿ ಹೀಗೆ ಬರೆದಿತ್ತು: "ನಾನು ಈ ಮಟ್ಟಕ್ಕೆ ಬೆಳೆಯಲು ಎಷ್ಟು ಕಷ್ಟಪಟ್ಟಿದ್ದೇನೆ ಎಂಬುದು ನನಗೆ ಮಾತ್ರ ಗೊತ್ತು. ಯಾರೂ ನನ್ನನ್ನು ಪ್ರೀತಿಸಲಿಲ್ಲ, ಎಲ್ಲರೂ ನನ್ನ ದುಡಿಮೆಯನ್ನು ಬಳಸಿಕೊಂಡರು ಅಷ್ಟೇ. ಎಂದಿತ್ತು.ಕೇವಲ 35 ವರ್ಷಕ್ಕೆ ಇಹಲೋಕ ತ್ಯಜಿಸಿ ದಂತಕತೆಯಾಗಿ ಉಳಿದರು. ಅವರ ಬದುಕಿನ ಆಧಾರದ ಮೇಲೆ ವಿದ್ಯಾ ಬಾಲನ್ ನಟನೆಯ 'ದಿ ಡರ್ಟಿ ಪಿಕ್ಚರ್' ಸಿನಿಮಾ ಕೂಡ ತೆರೆಕಂಡು ಯಶಸ್ವಿಯಾಯಿತು, (ಏಜೆನ್ಸೀಸ್).