ಈ ವರ್ಷ ಸಿನಿ ಕ್ಷೇತ್ರದಲ್ಲಿ ಕನ್ನಡವೇ ನಂಬರ್​ 1... ಇವೇ ನೋಡಿ 2025ರಲ್ಲಿ ಅತಿ ಹೆಚ್ಚು ಗಳಿಕೆ ಮಾಡಿದ ಸಿನಿಮಾಗಳು! Highest Grossing Films Of 2025

ಬೆಂಗಳೂರು: ಇಡೀ ಜಗತ್ತು 2026ರ ಹೊಸ ವರ್ಷವನ್ನು ಆತ್ಮೀಯವಾಗಿ ಬರಮಾಡಿಕೊಳ್ಳಲು ತುದಿಗಾಲಲ್ಲಿ ನಿಂತಿದೆ. ಅದೇ ಸಮಯದಲ್ಲಿ ನಮ್ಮಿಂದ ದೂರವಾಗಿ ಇತಿಹಾಸ ಪುಟ ಸೇರಲಿರುವ 2025ನೇ ವರ್ಷವನ್ನು ನೆನೆದು ಅನೇಕರು ಭಾವುಕ ವಿದಾಯ ಹೇಳಲು ಸಜ್ಜಾಗಿದ್ದಾರೆ. ಈ ವರ್ಷ ಸಾಕಷ್ಟು ಘಟನೆಗಳು ನಡೆದಿವೆ. ಪ್ರತಿ ಕ್ಷೇತ್ರದಲ್ಲೂ ಮರೆಯುವಂತಹ ಹಾಗೂ ಮರೆಯಲಾರದಂತಹ ಎಷ್ಟೋ ಕ್ಷಣಗಳು ಘಟಿಸಿವೆ. ಅದರಲ್ಲಿ ಸಿನಿಮಾ ಕ್ಷೇತ್ರವೂ ಒಂದು. ಪ್ರತಿವರ್ಷ ಸಾವಿರಾರು ಸಿನಿಮಾಗಳು ಬಿಡುಗಡೆಯಾಗುತ್ತವೆ. ಆದರೆ, ಕೆಲವೇ ಕೆಲವು ಸಿನಿಮಾಗಳು ಮಾತ್ರ ನಮ್ಮ ಮನಸ್ಸಿನಲ್ಲಿ ಉಳಿಯುತ್ತವೆ. ಅದಕ್ಕೆ ಕಾರಣ ಆ ಚಿತ್ರದ ಯಶಸ್ಸು ಮತ್ತು ಬಾಕ್ಸ್​ಆಫೀಸ್​ನಲ್ಲಿ ಆ ಸಿನಿಮಾ ಬರೆಯುವ ದಾಖಲೆ. ಹೀಗಾಗಿ 2026ನೇ ಹೊಸ ವರ್ಷಕ್ಕೆ ಕಾಲಿಡುವ ಮುನ್ನ 2025ರಲ್ಲಿ ಯಾವೆಲ್ಲ ಸಿನಿಮಾಗಳು ನಮ್ಮ ಮನಸ್ಸಿನಲ್ಲಿ ಅಚ್ಚು ಹೊತ್ತಿದವು ಮತ್ತು ಬಾಕ್ಸ್​ಆಫೀಸ್​ನಲ್ಲಿ ಧೂಳೆಬ್ಬಿಸಿದವು ( Highest Grossing Films Of 2025) ಎಂಬುದನ್ನು ನಾವೀಗ ಮೆಲಕು ಹಾಕೋಣ. 

ಈ ವರ್ಷ ಅತಿ ಹೆಚ್ಚು ಕಲೆಕ್ಷನ್​ ಮಾಡಿದ ಭಾರತದ ಸಿನಿಮಾಗಳ ಪಟ್ಟಿಯಲ್ಲಿ ನಮ್ಮ ಕನ್ನಡ ಸಿನಿಮಾ ಮೊದಲ ಸ್ಥಾನದಲ್ಲಿ ಇರುವುದು ನಿಜಕ್ಕೂ ಖುಷಿಯ ಸಂಗತಿ. ಹೌದು, ರಿಷಬ್​ ಶೆಟ್ಟಿ ನಿರ್ದೇಶಿಸಿ, ನಟಿಸಿದ ಕಾಂತಾರ ಚಾಪ್ಟರ್​ 1 ಸಿನಿಮಾ ಈ ವರ್ಷದ ಅತಿ ಹೆಚ್ಚು ಕಲೆಕ್ಷನ್​ ಮಾಡಿದ ಭಾರತದ ಸಿನಿಮಾ ಆಗಿದೆ. ಅಕ್ಟೋಬರ್ 2ರಂದು ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ಬಿಡುಗಡೆಯಾದ ಈ ಸಿನಿಮಾ ಗಲ್ಲಾಪೆಟ್ಟಿಗೆಯಲ್ಲಿ​ ಸುಮಾರು 851 ರಿಂದ 853 ಕೋಟಿ (ವರ್ಲ್ಡ್‌ ವೈಡ್ ಗ್ರಾಸ್) ರೂಪಾಯಿ ಗಳಿಸಿತು. ಈ ಮೂಲಕ ಅನೇಕ ದಾಖಲೆಗಳನ್ನು ತನ್ನದಾಗಿಸಿಕೊಂಡಿತು. ಕನ್ನಡ ಸಿನಿಮಾ ಇಂಡಸ್ಟ್ರಿಯಲ್ಲಂತೂ ಹೊಸ ಅಲೆಯನ್ನೇ ಈ ಸಿನಿಮಾ ಸೃಷ್ಟಿ ಮಾಡಿತು. ರಿಷಬ್​ ನಿರ್ದೇಶಿಸಿದ ಈ ಸಿನಿಮಾಗೆ ಹೊಂಬಾಳೆ ಫಿಲ್ಸ್ಮ್​ ಬಂಡವಾಳ ಹೂಡಿತು.

ನಟ ವಿಕ್ಕಿ ಕುಶಾಲ್​ ಹಾಗೂ ನ್ಯಾಷನಲ್​ ಕ್ರಶ್​ ರಶ್ಮಿಕಾ ಮಂದಣ್ಣ ನಟಿಸಿರುವ ಐತಿಹಾಸಿಕ ಛಾವಾ ಸಿನಿಮಾ 2025, ಫೆಬ್ರವರಿ 14ರಂದು ಬಿಡುಗಡೆಯಾಯಿತು. ಬಾಕ್ಸ್​ಆಫೀಸ್​ನಲ್ಲಿ ಬಿರುಗಾಳಿ ಸೃಷ್ಟಿಸಿದ ಈ ಸಿನಿಮಾ ಸುಮಾರು 808 ರಿಂದ 809 ಕೋಟಿ ರೂಪಾಯಿ ಗಳಿಕೆ ಮಾಡಿತು. 

ಇತ್ತೀಚೆಗಷ್ಟೇ ತೆರೆಕಂಡ ಬಾಲಿವುಡ್​ ಸ್ಟಾರ್​ ನಟ ರಣವೀರ್ ಸಿಂಗ್ ನಟನೆಯ ಧುರಂಧರ್​ ಸಿನಿಮಾ ಇನ್ನೂ ಥಿಯೇಟರ್‌ಗಳಲ್ಲಿ ಓಡುತ್ತಿದೆ. ಡಿಸೆಂಬರ್​ 5ರಂದು ಬಿಡುಗಡೆಯಾದ ಈ ಸಿನಿಮಾ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದ್ದು, ಥಿಯೇಟರ್​ಗಳಲ್ಲಿ ತನ್ನ ಗೆಲುವಿನ ಓಟವನ್ನು ಮುಂದುವರಿಸಿದೆ. ಈವರೆಗೂ 790 ರಿಂದ 795 ಕೋಟಿ ರೂಪಾಯಿ ಸಂಗ್ರಹಿಸಿದೆ. ಈ ಗಳಿಕೆ ಇಲ್ಲಿಗೆ ನಿಂತಿಲ್ಲ. ಈಗಲೂ ಧುರಂಧರ್​ ಸಿನಿಮಾ ಪ್ರೇಕ್ಷಕರನ್ನು ಸೆಳೆಯುತ್ತಿದ್ದು, ಅದರ ಗಳಿಕೆ ಮತ್ತಷ್ಟು ಹೆಚ್ಚಾಗುವ ನಿರೀಕ್ಷೆಯಿದೆ. ಈ ವರ್ಷ ಅತಿ ಹೆಚ್ಚು ಗಳಿಸಿದ ಸಿನಿಮಾ ಎಂಬ ಹೆಗ್ಗಳಿಗೆಕೆ ಪಾತ್ರವಾಗುತ್ತ ಧುರಂಧರ್​ ಸಿನಿಮಾ ದಾಪುಗಾಲು ಇಟ್ಟಿದೆ. 

ಬಾಲಿವುಡ್​ನಲ್ಲಿ ಇದೇ ವರ್ಷ ಜುಲೈ 18ರಂದು ರಿಲೀಸ್​ ಆದ ಸೈಯಾರಾ ಸಿನಿಮಾ ಸುಮಾರು 570 ರಿಂದ 575 ಕೋಟಿ ಗಳಿಕೆ ಮಾಡಿತು. ಈ ಸಿನಿಮಾ ಹೊಸಬರ ಸಿನಿಮಾ ಆಗಿದ್ದರೂ ಕೂಡ ಚಿತ್ರಕತೆ ಎಲ್ಲರಿಗೆ ಇಷ್ಟವಾದ ಹಿನ್ನೆಲೆಯಲ್ಲಿ ಬಾಕ್ಸ್​ಆಫೀಸ್​ನಲ್ಲಿ ಉತ್ತಮ ಗಳಿಕೆ ಮಾಡಿದ್ದು, ಅತಿ ಹೆಚ್ಚು ಗಳಿಕೆ ಮಾಡಿದ ಪಟ್ಟಿಗೆ ಈ ಸಿನಿಮಾ ಕೂಡ ಸೇರಿಕೊಂಡಿದೆ. 

ಸೂಪರ್​ಸ್ಟಾರ್​​ ರಜಿನಿಕಾಂತ್​ ಹಾಗೂ ಸ್ಟಾರ್​ ನಿರ್ದೇಶಕ ಲೋಕೇಶ್​ ಕನಗರಾಜ್​ ಜುಗಲ್​ಬಂಧಿಯಲ್ಲಿ ಮೂಡಿಬಂದ ಕೂಲಿ ಸಿನಿಮಾ ಬಾಕ್ಸ್​ಆಫೀಸ್​ನಲ್ಲಿ ಭರ್ಜರಿ ಕಲೆಕ್ಷನ್​ ಮಾಡಿತು. ಈ ಸಿನಿಮಾ ಸುಮಾರು 514 ರಿಂದ 675 ಕೋಟಿ ರೂಪಾಯಿಯನ್ನು ಗಳಿಕೆ ಮಾಡಿತು.

ಉಳಿದಂತೆ ಹೊಂಬಾಳೆ ಫಿಲ್ಮ್ಸ್​ ನಿರ್ಮಾಣದ ಅಡಿಯಲ್ಲಿ ಮೂಡಿಬಂದ ಅನಿಮೇಟೆಡ್​ ಮಹಾವತಾರ ನರಸಿಂಹ ಸಿನಿಮಾ 325 ಕೋಟಿ ರೂ. ಗಳಿಸಿದರೆ, ನಟ ದುಲ್ಕರ್​ ಸಲ್ಮಾನ್​ ನಿರ್ಮಾಣದ ಹಾಗೂ ನಟಿ ಪ್ರಿಯದರ್ಶಿನಿ ಅಭಿನಯದ ಲೋಕಹ್ ಚಾಪ್ಟರ್ 1 ಸಿನಿಮ ಸುಮಾರು 303-304 ಕೋಟಿ ರೂ. ಗಳಿಕೆ ಮಾಡಿತು. 

ಕನ್ನಡ ಚಿತ್ರರಂಗದ ವಿಚಾರಕ್ಕೆ ಬಂದರೆ, ಸ್ಯಾಂಡಲ್​ವುಡ್​ನಲ್ಲಿ ಈ ವರ್ಷ ಐತಿಹಾಸಿಕ ದಾಖಲೆಗಳು ನಿರ್ಮಾಣವಾಗಿವೆ. ರಿಷಬ್ ಶೆಟ್ಟಿ ನಿರ್ದೇಶಿಸಿ, ನಟಿಸಿರುವ ಕಾಂತಾರ ಚಾಪ್ಟರ್​ 1 ಸಿನಿಮಾ ಸುಮಾರು 850 ರಿಂದ 900 ಕೋಟಿ ಗಳಿಸಿ ಈ ವರ್ಷದ ಭಾರತದ ಅತಿ ಹೆಚ್ಚು ಗಳಿಕೆಯ ಸಿನಿಮಾಗಳಲ್ಲಿ ಒಂದಾಗಿದೆ. ಮಹಾವತಾರ ನರಸಿಂಹ, ಅನಿಮೇಟೆಡ್ ಸಿನಿಮಾವಾಗಿದ್ದರೂ, ಸುಮಾರು 325 ಕೋಟಿ ಗಳಿಸಿ ದೊಡ್ಡ ಯಶಸ್ಸು ಕಂಡಿದೆ. ಇನ್ನು ಕಡಿಮೆ ಬಜೆಟ್​ನಲ್ಲಿ ಮೂಡಿಬಂದ ಸು ಫ್ರಮ್ ಸೋ ಸಿನಿಮಾ ಸ್ಯಾಂಡಲ್​ವುಡ್​ ಬಾಕ್ಸ್​ ಆಫೀಸ್​ನಲ್ಲಿ ಬಿರುಗಾಳಿ ಸೃಷ್ಟಿಸಿತು. ರಾಜ್ ಬಿ ಶೆಟ್ಟಿ ನಟನೆಯ ಈ ಸಿನಿಮಾ ಕೇವಲ 5 ಕೋಟಿ ರೂ. ಬಜೆಟ್‌ನಲ್ಲಿ ನಿರ್ಮಾಣವಾಗಿ 125 ಕೋಟಿ ರೂ. ಗಳಿಸುವ ಮೂಲಕ 'ಬ್ಲಾಕ್‌ಬಸ್ಟರ್' ಎನಿಸಿಕೊಂಡಿದೆ.

ಅಂದಹಾಗೆ, ಈ ಮೇಲಿನ ಮಾಹಿತಿ 2025, ಡಿಸೆಂಬರ್ 22ರವರೆಗಿನ ಅಂದಾಜು ವಿಶ್ವವ್ಯಾಪಿ ಗ್ರಾಸ್ ಕಲೆಕ್ಷನ್ ಆಧರಿಸಿದೆ. ಈ ಸುದ್ದಿಯು IMDb, Sacnilk, Wikipedia ಮತ್ತು ಇತರ ಬಾಕ್ಸ್ ಆಫೀಸ್ ಟ್ರ್ಯಾಕರ್‌ಗಳನ್ನು ಆಧರಿಸಿದೆ. ಇನ್ನೂ ಕೆಲ ಚಿತ್ರಗಳು ಥಿಯೇಟರ್‌ಗಳಲ್ಲಿ ಓಡುತ್ತಿರುವುದರಿಂದ ಈ ಅಂಕಿ-ಅಂಶಗಳು ಬದಲಾವಣೆಗೆ ಒಳಪಡಬಹುದು, (ಏಜೆನ್ಸೀಸ್​).