Malaika Vasupal - ಬೌಂಡರಿ ಬಾರಿಸಿದ, ಬೌಂಡರಿ ದಾಟಲು ಬಯಸದ ಕಲ್ಟ್​ ಹುಡುಗಿ

Malaika Vasupal - "ಉಪಾಧ್ಯಕ್ಷ' ಮತ್ತು "ವಿದ್ಯಾಪತಿ' ಚಿತ್ರಗಳ ಬಳಿಕ ಮಲೈಕಾ ವಸುಪಾಲ್​ ನಟಿಸಿರುವ ಮೂರನೇ ಚಿತ್ರ "ಕಲ್ಟ್​'. "ಉಪಾಧ್ಯಕ್ಷ' ನಿರ್ದೇಶಕ ಅನಿಲ್​ ಕುಮಾರ್​ ಆ್ಯಕ್ಷನ್​-ಕಟ್​ ಹೇಳಿರುವ ರೊಮ್ಯಾಂಟಿಕ್​ ಡ್ರಾಮಾಗೆ "ಬನಾರಸ್​' ಝೈದ್​ ಖಾನ್​ ನಾಯಕನಾಗಿದ್ದು, ಅವರಿಗೆ ರಚಿತಾ ರಾಮ್​ ಮತ್ತು ಮಲೈಕಾ ಇಬ್ಬರು ನಾಯಕಿಯರು. ಸಿನಿಮಾ ಇದೇ ಶುಕ್ರವಾರ (ಜ. 23) ತೆರೆಗೆ ಬರಲಿದ್ದು, ಅದೇ ಖುಷಿಯಲ್ಲಿ ಮಲೈಕಾ ವಿಜಯವಾಣಿ ಜತೆ ಮಾತಿಗೆ ಸಿಕ್ಕಿದ್ದರು. "ಸಿನಿಮಾ, ಸೀರಿಯಲ್​ನಲ್ಲಿ ಮುದ್ದಾದ, ಬಬ್ಲಿ, ಕ್ಯೂಟ್​ ಪಾತ್ರಗಳಲ್ಲಿ ನಟಿಸಿದ್ದೆ. ಆದರೆ, "ಕಲ್ಟ್​'ನಲ್ಲಿ ನನ್ನ ಕರಿಯರ್​ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯುವ ಪಾತ್ರದಲ್ಲಿ ನಟಿಸಿದ್ದೇನೆ. ಈ ಪಾತ್ರ ಒಪ್ಪಿಕೊಳ್ಳಲು ಈಕೆಗೆ ಎಷ್ಟು ಧೈರ್ಯ ಅಂತ ಜನ ಮೆಚ್ಚುಗೆ ವ್ಯಕ್ತಪಡಿಸಬಹುದು ಅಥವಾ ಬೈಯಲೂಬಹುದು. ಅಂತಹ ಪಾತ್ರ. ಅನಿಲ್​ ಸರ್​ ನನಗೆ ಕಥೆ ಹೇಳುವಾಗ ಕಷ್ಟ ಇರಬಹುದು ಅಂತನ್ನಿಸುತ್ತಿತ್ತು. ಆದರೆ, ಒಮ್ಮೆ ಶೂಟಿಂಗ್​ ಪ್ರಾರಂಭವಾದ ಬಳಿಕ, ಕಷ್ಟ ಅನ್ನಿಸಲಿಲ್ಲ. ನಾನಿಲ್ಲಿ ಎರಡು ಶೇಡ್​ಗಳಲ್ಲಿ ಕಾಣಿಸಿಕೊಳ್ಳಲಿದ್ದೇನೆ. ಲವ್​ಸ್ಟೋರಿಗಳು ಹಲವು ಬಂದಿವೆ. ಆದರೆ, ಬರವಣಿಗೆ, ಕಥೆ ಮತ್ತು ಚಿತ್ರಕಥೆ ಬಹಳ ವಿಭಿನ್ನವಾಗಿರುವುದೇ "ಕಲ್ಟ್​' ವಿಶೇಷ' ಎಂದು ಮಾಹಿತಿ ನೀಡುತ್ತಾರೆ ಮಲೈಕಾ.

ಈಗಾಗಲೇ ಸ್ಟಾರ್​ಡಂ ಇರುವ ನಟಿ ರಚಿತಾ ರಾಮ್​ ಜತೆ ತೆರೆ ಹಂಚಿಕೊಂಡಿದ್ದರ ಬಗ್ಗೆ ಮಲೈಕಾ, "ನಾನು ಈ ವಿಷಯದಲ್ಲಿ ಅನಿಲ್​ ಸರ್​ನ ಸಂಪೂರ್ಣವಾಗಿ ನಂಬಿದ್ದೆ. ಅವರು ರಚಿತಾ, ಝೈದ್​ ಸೇರಿ ನಮ್ಮ ಮೂರು ಜನರ ಪಾತ್ರಗಳಿಗೂ ಸಮನಾಗಿ ಪ್ರಾಮುಖ್ಯ ನೀಡಿದ್ದಾರೆ. ಯಾರಿಗೂ ಹೆಚ್ಚು ಕಡಿಮೆ ಮಾಡಿಲ್ಲ. ನಾನು, ಝೈದ್​ ಮತ್ತು ರಚಿತಾ ಮೂವರೂ ತೆರೆ ಹಂಚಿಕೊಂಡಿರುವ ಸನ್ನಿವೇಶವೂ ಇದೆ. ಆದರೆ, ಅದರಲ್ಲಿ ಸಂಭಾಷಣೆಗಳಿಲ್ಲ. ಮಾತನಾಡದೇ ತುಂಬ ವಿಷಯಗಳು ನಡೆಯುತ್ತಿರುತ್ತವೆ. ರಚಿತಾ ಭಾವನಾತ್ಮಕವಾಗಿ ಕನೆಕ್ಟ್​ ಆಗುತ್ತಾರೆ. ನನ್ನದು ಕಿಕ್​ ಕೊಡುವ ಪಾತ್ರ. ಎದುರು ರಚಿತಾ ರಾಮ್​ ಅಥವಾ ಝೈದ್​ ಯಾರೇ ಇರಲಿ, ನನ್ನ ಕೆಲಸ ನಾನು ಸರಿಯಾಗಿ ಮಾಡಬೇಕು ಎಂಬುದಷ್ಟೇ ನನ್ನ ಗಮನದಲ್ಲಿತ್ತು' ಎನ್ನುತ್ತಾರೆ.

"ಕಲ್ಟ್​' ಫಸ್ಟ್​ ಲುಕ್​ ರಿಲೀಸ್​ ಆದಾಗಿನಿಂದಲೂ, ಇದೊಂದು ಬೋಲ್ಡ್​ ಸಿನಿಮಾ ಇರಬಹುದು ಅಂತ ಹಲವರಿಗೆ ಅನ್ನಿಸಿತ್ತು. ಆದರೆ, "ಇದು ಬೋಲ್ಡ್​ ಚಿತ್ರವಲ್ಲ' ಎನ್ನುವ ಮಲೈಕಾ, "ನಾನು ಸಿನಿಮಾ ಒಪ್ಪಲು ಕಿಸ್ಸಿಂಗ್​ ಸೀನ್​ ಮಾಡುವುದಿಲ್ಲ ಅಂತ ಕಂಡೀಷನ್​ ಹಾಕಿದ್ದೆ. ಅಂತಹ ಸೀನ್​ಗಳಲ್ಲಿ ನಟಿಸಬಾರದು ಅಂತ ನಾನೇ ಬೌಂಡರಿ ಹಾಕಿಕೊಂಡಿದ್ದೇನೆ. ಕನ್ನಡ ಅಂತಲ್ಲ, ಬೇರೆ ಭಾಷೆಗಳ ಸಿನಿಮಾಗಳಲ್ಲಿ ಅವಕಾಶ ಸಿಕ್ಕರೂ ನಾನು ಅಂತಹ ಸೀನ್​ಗಳನ್ನು ಮಾಡುವುದಿಲ್ಲ. ಸಿನಿಮಾಗಾಗಿ ನಮ್ಮ ಸಂಪ್ರದಾಯ, ಸಂಸತಿ ಮೀರಲು ಸಾಧ್ಯವಿಲ್ಲ. ಎಲ್ಲದಕ್ಕೂ ಒಂದು ಬೌಂಡರಿ ಅಂತ ಇರುತ್ತದೆ. ಅದರ ಒಳಗೇ ಸಿನಿಮಾ ಒಪ್ಪಿಕೊಂಡು, ಮಾಡುತ್ತಿದ್ದೇನೆ. ಕಿಸ್ಸಿಂಗ್​ ಸೀನ್​ ಮಾಡಲು ಝೈದ್​ ಕೂಡ ರೆಡಿ ಇರಲಿಲ್ಲ. ಸರಸ-ಸಲ್ಲಾಪದ ದೃಶ್ಯಗಳೂ ಅಷ್ಟೇ, ಸೀಮಿತವಾಗಿರಬೇಕು' ಎಂದು ಹೇಳಿಕೊಳ್ಳುತ್ತಾರೆ.