ಈ ವಿಷಯದಲ್ಲಿ ರಕ್ಷಿತ್ ಶೆಟ್ಟಿ ಚಿತ್ರ ಮತ್ತು 'ಧುರಂಧರ್'​ ಇತರೆ ಚಿತ್ರರಂಗಕ್ಕೆ ಮಾದರಿ! ಇದನ್ನೇ ಸಿನಿಪ್ರಿಯರು ಬಯಸೋದು

ಬೆಂಗಳೂರು: ಇದೇ ಮಾ.19ರಂದು ಆದಿತ್ಯ ಧರ್​ ನಿರ್ದೇಶನದ ಹಾಗೂ ರಣವೀರ್​ ಸಿಂಗ್ ಅಭಿನಯದ ಬಾಲಿವುಡ್​ನ ಬಹುನಿರೀಕ್ಷಿತ ಸಿನಿಮಾ 'ಧುರಂಧರ್​ 2: ದಿ ರಿವೆಂಜ್​' ಜಾಗತಿಕವಾಗಿ ತೆರೆಕಾಣಲು ಸಜ್ಜಾಗಿದೆ. ಈ ಚಿತ್ರದ ಸೀಕ್ವೆಲ್​ ರಿಲೀಸ್​ಗೆ ಸದ್ಯ ಚಿತ್ರಪ್ರೇಮಿಗಳು ತೀವ್ರ ಕುತೂಹಲ ವ್ಯಕ್ತಪಡಿಸಿದ್ದಾರೆ. ಕಾರಣ, ಮೊದಲ ಭಾಗ ಕೆರಳಿಸಿದ ಕೌತುಕ ಮತ್ತು ಕಥೆಯನ್ನು ವಿವರಿಸಿದ ಪರಿ. ಬಾಕ್ಸ್ ಆಫೀಸ್​ ಧೂಳೆಬ್ಬಿಸಿದ ಬ್ಲಾಕ್​ಬಸ್ಟರ್​ ಚಿತ್ರದ ಎರಡನೇ ಭಾಗ ಬಿಡುಗಡೆ ಆಗ್ತಿರುವುದು ಕೇವಲ 3 ತಿಂಗಳ ಅಂತರದಲ್ಲಿ ಎಂಬುದು ಇಲ್ಲಿ ಗಮನಾರ್ಹ ಸಂಗತಿ.

ಟ್ರೇಲರ್​ನಲ್ಲಿ ಒಂದಷ್ಟು ಝಲಕ್​ ಇಡುವ ಚಿತ್ರತಂಡ, ಬಾಕಿ ಸಿನಿಮಾ ಚಿತ್ರಮಂದಿರದಲ್ಲಿದೆ. ದಯವಿಟ್ಟು ಚಿತ್ರವನ್ನು ಥಿಯೇಟರ್​ನಲ್ಲಿ ನೋಡಿ ಎನ್ನುವುದು ಸಾಮಾನ್ಯ. ಒಂದು ಭಾಗದಲ್ಲೇ ಕಥೆ ಮುಗಿಸುವಂತ ಚಿತ್ರಗಳು ಓಕೆ. ಆದರೆ, ಸೀಕ್ವೆಲ್ ಸಿನಿಮಾಗಳು ಮೂಡಿ ಬಂದಾಗ ​ಪ್ರೇಕ್ಷಕರಿಗೆ ಸುಲಭವಾಗಿ ಆಯಾ ಚಿತ್ರದ ಕನೆಕ್ಟಿವಿಟಿ ಸಿಗೋದು ಬಹಳ ಕಡಿಮೆ. ಕಾರಣ, ಲಾಂಗ್​ ಗ್ಯಾಪ್​ ರಿಲೀಸ್​ಗಳು. ಇದು ಮೊದಲ ಭಾಗವನ್ನು ನೋಡಿ ಥ್ರಿಲ್​ ಆದ ಸಿನಿಪ್ರಿಯರಿಗೆ, ಎರಡನೇ ಭಾಗ ನೋಡುವ ಕುತೂಹಲವನ್ನು ದುಪ್ಪಟ್ಟು ಮಾಡಿರುತ್ತದೆ. ಆದರೆ, ಒಂದಷ್ಟು ವರ್ಷಗಳ ತಡ ರಿಲೀಸ್​ನಿಂದ ಆ ಕನೆಕ್ಷನ್​ ಸುಲಭವಾಗಿ ಸಿಗದಿರುವ ಸಾಧ್ಯತೆಗಳು ಹೆಚ್ಚಿವೆ.

ಈ ನಿಟ್ಟಿನಲ್ಲಿ ಗಮನಿಸಿ ನೋಡುವುದಾದರೆ, ಆದಿತ್ಯ ಧರ್​ ನಿರ್ದೇಶನದ 'ಧುರಂಧರ್' ಮೊದಲ ಭಾಗ ಸೂಪರ್​ಹಿಟ್​ ಆಗಿದೆ. 3 ಗಂಟೆಗಳ ಕಾಲ ಸಿನಿಪ್ರಿಯರನ್ನು ಸೀಟಿನಲ್ಲಿ ಅಲುಗಾಡದಂತೆ ಕೂರಿಸಿದ ಚಿತ್ರದ ಎರಡನೇ ಭಾಗವನ್ನು ಹೆಚ್ಚು ಕಾಲ ವಿಳಂಬ ಮಾಡದೆ, ಕೇವಲ ಮೂರು ತಿಂಗಳ ಅವಧಿಯಲ್ಲಿ ತೆರೆಗೆ ತರುತ್ತಿರುವ ನಿರ್ದೇಶಕರು, ಮತ್ತೊಂದು ಬ್ಲಾಕ್​ಬಸ್ಟರ್​ ನೋಡಲು ನಿರೀಕ್ಷಿಸುವುದರ ಜೊತೆಗೆ ಚಿತ್ರಪ್ರೇಮಿಗಳಿಗೆ ಕಥೆಯ ಕನೆಕ್ಟಿವಿಟಿಯನ್ನು ನೀಡುತ್ತಿರುವುದು ಮೆಚ್ಚುವಂತದ್ದು.

ತಮ್ಮ ವಿಭಿನ್ನ ಕಥೆ ಹೇಳುವ ಶೈಲಿ, ಸರಳವಾಗಿ ತೋರಿಸುವ, ಅರ್ಥೈಸುವ 'ಸಿಂಪಲ್​ ಸ್ಟಾರ್​' ರಕ್ಷಿತ್ ಶೆಟ್ಟಿ ಅವರ ಸಿನಿಮಾಗಳು ಕನ್ನಡಿಗರಿಗೆ ಚೆನ್ನಾಗಿ ನೆನಪಿದೆ. ಜೊತೆಗೆ ಇಷ್ಟವು ಹೌದು. ನೋಡುಗರಿಗೆ ಒಂದು ಸಿನಿಮಾವನ್ನು ಅದ್ಭುತವಾಗಿ ಕಟ್ಟಿಕೊಡುವ ರಕ್ಷಿತ್​, ಧುರಂಧರ್​ ನಿರ್ದೇಶಕರು ಮಾಡಿದ ಕೆಲಸವನ್ನು ಈ ಮೊದಲೇ ತಮ್ಮ ಹೃದಯಸ್ಪರ್ಶಿ 'ಸಪ್ತಸಾಗರದಾಚೆ ಎಲ್ಲೋ' ಎ ಮತ್ತು ಬಿ ಸೈಡ್​ ಚಿತ್ರಗಳಲ್ಲಿ ಮಾಡಿ ತೋರಿಸಿದ್ದಾರೆ.

ಸೆ.01, 2023ರಂದು ರಕ್ಷಿತ್ ಶೆಟ್ಟಿ, ರುಕ್ಮಿಣಿ ವಸಂತ್​ ಮತ್ತು ಚೈತ್ರಾ ಆಚಾರ್​ ಮುಖ್ಯಭೂಮಿಕೆಯಲ್ಲಿ ನಟಿಸಿದ 'ಸಪ್ತಸಾಗರದಾಚೆ ಎಲ್ಲೋ' ಸೈಡ್​ ಎ ತೆರೆಕಂಡಿತು. ಈ ಸಿನಿಮಾ ಪ್ರೇಕ್ಷಕರ ಮೇಲೆ ಮಾಡಿದ ಮೋಡಿ 'ಸೈಡ್​ ಬಿ'ಗೆ ಕಾಯುವಂತಿತ್ತು. ಅಂತೆಯೇ, ಎರಡನೇ ಭಾಗದ ಎಳೆಯನ್ನು ಮೊದಲ ಭಾಗದಲ್ಲೇ ಸಣ್ಣದಾಗಿ ಬಿಟ್ಟುಕೊಟ್ಟ ನಿರ್ದೇಶಕರು, ಅದೇ ವರ್ಷದ ನ.17ರಂದು ಸೈಡ್​ ಬಿ ರಿಲೀಸ್​ ಮಾಡಿದರು. ಇದು ನೋಡುಗರಿಗೆ ಎರಡು ಕಥೆಯನ್ನು ಸರಳವಾಗಿ, ಸುಲಭವಾಗಿ ಕನೆಕ್ಟ್​ ಮಾಡಿತು. ಹೆಚ್ಚು ಸಮಯ ತೆಗೆದುಕೊಳ್ಳದೆ ಮುಂಚಿತವಾಗಿಯೇ ಅಂದುಕೊಂಡಂತೆ ತಮ್ಮ ಸಿನಿಮಾಗಳನ್ನು ತೆರೆಗೆ ತರುವ ಮೂಲಕ ರಕ್ಷಿತ್​ ನಿರೀಕ್ಷಿಸಿದ ಯಶಸ್ಸನ್ನು ಕಂಡರು. ಈಗ ಧುರಂಧರ್​ ಚಿತ್ರವು ಇದೇ ಹಾದಿಯಲ್ಲಿ ಸಾಗುತ್ತಿರುವುದು ಇತರೆ ಚಿತ್ರರಂಗಕ್ಕೆ ಮಾದರಿಯಾಗಲಿ.