ವಿಧಾನಸೌಂಧದ ಮುಂಭಾಗ ಗುರುವಾರ (ಜ. 29) ಆಯೋಜಿಸಲಾಗಿದ್ದ 17ನೇ ಬಿಫ್ಸ್ ಉದ್ಘಾಟನಾ ಸಮಾರಂಭದಲ್ಲಿ ನಟ ಪ್ರಕಾಶ್ ರಾಜ್, "ಬೆಂಗಳೂರು ಚಲನಚಿತ್ರೋತ್ಸವಕ್ಕೆ ರಾಜಕೀಯ ಪ್ರವೇಶಿಸಿದೆ. ಅದ್ಭುತವಾಗಿ ನಡೆಯುತ್ತಿದ್ದ ಚಿತ್ರೋತ್ಸವದಲ್ಲಿ ಈ ವರ್ಷ ಕೇಂದ್ರ ಸರ್ಕಾರ ಪ್ಯಾಲೆಸ್ತೈನ್ ಸಿನಿಮಾಗಳ ಪ್ರದರ್ಶನಕ್ಕೆ ಅವಕಾಶ ನೀಡುತ್ತಿಲ್ಲ. ಇದನ್ನು ಹೇಗೆ ಪ್ರತಿರೋಧಿಸಬೇಕು ಎಂಬುದರ ಬಗ್ಗೆ ರಾಜ್ಯ ಸರ್ಕಾರ, ಸಿಎಂ ನಿಲುವು ತೆಗೆದುಕೊಳ್ಳಬೇಕು. ನಮ್ಮ ನಾಡು, ನಮ್ಮ ಮಣ್ಣಿನ, ಸಂತಸ, ಕಣ್ಣೀರಿನ ಕಥೆಯಾದ "ಹೃದಯದ ಹಣತೆ' ಬೇರೆ ಭಾಷೆಗೆ ತರ್ಜುಮೆಯಾಗಿ ಬೂಕರ್ ಪ್ರಶಸ್ತಿ ಬಂದಾಗ ಸಂಭ್ರಮಿಸುವ ನಾವು, ನಮ್ಮ ನೆಲಕ್ಕೆ ಇನ್ನೊಬ್ಬರ ಕಥೆಗಳನ್ನು ತರಲು ಆಗುವುದಿಲ್ಲ ಎಂಬುದನ್ನು ಹೇಗೆ ಒಪ್ಪುವುದು? ಕೇರಳ ಚಲನಚಿತ್ರೋತ್ಸವದಲ್ಲೂ ಹೀಗೆ ಆಗಿತ್ತು. ಆದರೆ, ಅಲ್ಲಿನ ಸರ್ಕಾರ ಅದನ್ನು ವಿರೋಧಿಸಿ, ಸಿನಿಮಾ ಪ್ರದರ್ಶನಕ್ಕೆ ಅನುವು ಮಾಡಿಕೊಟ್ಟಿತು. ಅಂತಹ ಪ್ರತಿರೋಧ ಇಲ್ಲೂ ಆಗಬೇಕಿದೆ. ಬೆಂಗಳೂರು ಸಿನಿಮೋತ್ಸವದಲ್ಲಿ ನಿಮ್ಮ ರಾಜಕೀಯ ಹುನ್ನಾರ ನಡೆಯುವುದಿಲ್ಲ ಅಂತ ಇಲ್ಲಿನ ಸರ್ಕಾರವಾಗಲಿ ಅಥವಾ ಅಕಾಡೆಮಿಯಾಗಲಿ ಪ್ರತಿರೋಧಿಸಬೇಕು, ಪ್ರತಿಭಟಿಸಬೇಕು ಎಂದು ರಾಯಭಾರಿಯಾಗಿ ನಾನು ಒತ್ತಾಯಿಸುತ್ತಿದ್ದೇನೆ. ನಮ್ಮ ಕಷ್ಟಗಳಿಗೆ, ನಮ್ಮ ನೋವುಗಳಿಗೆ ನಾವು ಸುರಿಸುವ ಕಣ್ಣೀರಿನ ಪರಿಚಯ ನಮ್ಮ ಕೆನ್ನೆಗಿದ್ದರೆ ಸಾಲದು, ಇನ್ನೊಬ್ಬರ ನೋವಿಗೂ ಅಳುವ ಮೂಲಕ ನಮ್ಮ ಕಣ್ಣೀರಿನ ಪರಿಚಯ ಮಾಡಿದರೆ ಮಾತ್ರ ನಾವು ಮನುಷ್ಯರಾಗುವುದು. ನೀವು ಪ್ಯಾಲೆಸ್ತೈನ್ ಸಿನಿಮಾಗಳನ್ನು ಇಲ್ಲಿ ಪ್ರದರ್ಶಿಸಲು ಬಿಡದಿದ್ದರೆ, ಈ ವೇದಿಕೆಯಲ್ಲಿ ನಾನು ಅಲ್ಲಿನ ನೋವಿನ ಪದ್ಯವನ್ನು ಇಲ್ಲಿ ಓದುತ್ತೇನೆ' ಎಂದು ಪ್ಯಾಲೆಸ್ತೈನ್ ಪದ್ಯವನ್ನು ವೇದಿಕೆಯಲ್ಲಿ ಓದಿದರು.
