ದೇವರೇ ಎಂದು ಮನಸ್ಸಿನಲ್ಲೇ ಕೊರಗುತ್ತಿದ್ದೆ... 'ರಣಧೀರ' ಶೂಟಿಂಗ್​ನಲ್ಲಿ ಕ್ರೇಜಿಸ್ಟಾರ್​ ಸಹಾಯ ನೆನೆದ ಜಗ್ಗೇಶ್​ | Jaggesh

ಬೆಂಗಳೂರು: ಕನ್ನಡ ಚಿತ್ರರಂಗದಲ್ಲಿ ತಮ್ಮದೇ ವಿಭಿನ್ನ ಮ್ಯಾನರೀಸಂ, ಚಾಪು ಮೂಡಿಸಿರುವ 'ನವರಸ' ನಾಯಕ ಜಗ್ಗೇಶ್​, ತಮ್ಮ ಸಿನಿ ಪಯಣದ ಜೊತೆಗೆ ರಾಜಕೀಯದಲ್ಲಿ ಸಕ್ರಿಯರಾಗಿದ್ದಾರೆ. ದೇವರ ಮೇಲೆ ಅಪಾರ ನಂಬಿಕೆಯಿಟ್ಟಿರುವ ಜಗ್ಗೇಶ್​, ಕ್ರೇಜಿಸ್ಟಾರ್​ ವಿ. ರವಿಚಂದ್ರನ್ ಅವರ ಸೂಪರ್​ಹಿಟ್​ 'ರಣಧೀರ' ಚಿತ್ರದಲ್ಲಿ 'ಸರಿಗಮಪ' ಪಾತ್ರಧಾರಿಗಳಲ್ಲಿ ಒಬ್ಬರಾಗಿ ಮಿಂಚಿದ್ದು ಇಂದಿಗೂ ಚಿತ್ರಪ್ರೇಮಿಗಳಿಗೆ ನೆನಪಿದೆ. ಅಂದು ಈ ಚಿತ್ರದ ಶೂಟಿಂಗ್ ಸಮಯದಲ್ಲಿ ನಡೆದ ಒಂದು ಘಟನೆ ಬಗ್ಗೆ ಹಿರಿಯ ನಟ ತಮ್ಮ ಮನದಾಳದ ಮಾತನ್ನು ಮುಕ್ತವಾಗಿ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಳ್ಳುವ ಮೂಲಕ ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದ್ದಾರೆ.

ನಲವತ್ತು ವರ್ಷದಿಂದ ದೇವರ ಪೂಜೆಯನ್ನು ಮಾಡುತ್ತೇನೆ. ಎಂದಿಗೂ ನಾನು ಆ ಒಂದು ಕಾರ್ಯವನ್ನು ಮರೆಯೋದೆ ಇಲ್ಲ. ನನ್ನ ನೆಮ್ಮದಿಗೆ ಮೂಲ ಕಾರಣ ಅಂದ್ರೇನೆ ದೇವರಕೋಣೆ. 1986ರಲ್ಲಿ, ನಾನು ಮೊದಲು ಮನೆ ಮಾಡಿದ್ದು. ಆಗ ದೇವರ ಕೋಣೆ ಕಟ್ಟಿಸಿರಲಿಲ್ಲ. ಮಲ್ಲೇಶ್ವರಂನ 8ನೇ ಕ್ರಾಸ್​ನಲ್ಲಿ 40ರೂ ಕೊಟ್ಟು ಗಣಪ ಹಾಗು ರಾಯರ ಮಣ್ಣಿನ ವಿಗ್ರಹ ಕೊಂಡುಕೊಂಡಿದ್ದೆ. ನನ್ನ ಸಿನಿಮಾದ ಕಷ್ಟದ ದಿನಗಳಲ್ಲಿ ಈ ದೇವರ ವಿಗ್ರಹಗಳ ಮುಂದೆ ಅದೆಷ್ಟು ಕಣ್ಣೀರು ಹರಿಸಿದ್ದೇನೋ ತಿಳಿಯದು ಎಂದರು.

ನಾನು ನನ್ನ ಕಾಲಿನ ಮೇಲೆ ನಿಲ್ಲಲು ಬೇಡಿಕೊಂಡಿದ್ದೆ. ನನಗಾಗುತ್ತಿದ್ದ ಅದೆಷ್ಟು ಅವಮಾನಗಳನ್ನು ಈ ವಿಗ್ರಹಗಳಗೆ ಅರ್ಪಿಸುತ್ತಿದ್ದೆ ಎಂದು ತಮ್ಮ ಭಕ್ತಿ ಬಗೆಗೆ ಬರೆದುಕೊಂಡಿದ್ದಾರೆ. ರಣಧೀರ ಸಿನಿಮಾ ಶೂಟಿಂಗ್ ನೆನೆದ ಜಗ್ಗೇಶ್, ಹಂಚಿಕೊಂಡ ಫೋಟೋ ಕೆಳಗೆ, `1987ರ ಚತುರ್ಥಿಯ ದಿನ. ಸಂಜೆ 'ರಣಧೀರ' ಚಿತ್ರೀಕರಣ ಮುಗಿದಮೇಲೆ ಬಂದು ಪೂಜೆ ಮಾಡುವ ಎಂದು ಹೋದೆ, ನೋಡಿದರೆ ಕ್ರೈಮ್ಯಾಕ್ಸ್ ಚಿತ್ರೀಕರಣ ರಾತ್ರಿ 2 ಗಂಟೆಯಾದರೂ ಮುಗಿಯುತ್ತಿಲ್ಲ. ಏನು ಮಾಡುವುದು ದೇವರೇ ಎಂದು ಮನಸ್ಸಿನಲ್ಲೇ ಕೊರಗುತ್ತಿದ್ದೆ. 2.40ಕ್ಕೆ ಶೂಟಿಂಗೇನೋ ಮುಗಿಯಿತು ಆದರೆ ಕೈಯಲ್ಲಿ ಬಿಡಿಗಾಸಿಲ್ಲ. ಧೈರ್ಯ ಮಾಡಿ ರವಿಚಂದ್ರನ್​ರವರ ಬಳಿ ಹೋದೆ. 'ಸಾರ್' ಎಂದೆ. ಅದಾಗಲೇ ದಣಿದಿದ್ದ ಅವರು 'ಏನೋ..?' ಎಂದರು.

"ಸಾರ್ ಪೂಜೆಗೆ ಕಾಸಿಲ್ಲಾ.. 200ರೂ ಕೊಡಿ ಎಂದೆ. ಆಗ ರವಿ ಸಾರ್, ಅವರ ಮ್ಯಾನೇಜರ್ ಬಾಬು ಕರೆದು, 'ಇವನಿಗೆ 500 ರೂ. ಕೊಡು' ಎಂದರು. ನನ್ನ ಸಂತೋಷ ಹೇಳತೀರದು. ರವಿಚಂದ್ರನ್ ಅವರು ಎಷ್ಟು ಹೃದಯವಂತ. ಈ ದಿನ ನಾನು ಎಷ್ಟೇ ಬೆಳದಿದ್ದರು, ಅವರ ಮೇಲೆ ವಿಶೇಷ ಗೌರವ ಇನ್ನೂ ಇದೆ. ಇದೇ ಕಾರಣಕ್ಕೆ ನಾನು 'ಭಂಡ ನನ್ನ ಗಂಡ' ಚಿತ್ರದ ಹಾಡಿನಲ್ಲಿ 'ಹತ್ತಿದ್ದ ಏಣಿನಾ ಒದಿಬ್ಯಾಡ' ಎಂದು ಸಾಲು ಬರೆಸಿದ್ದು. ನಾನು ಸದಾ ನಿಮ್ಮನ್ನು ಪ್ರೀತಿಸುವೆ ಸರ್" ಎಂದಿದ್ದಾರೆ.

"ಶೂಟಿಂಗ್ ಮುಗಿಸಿ ಅಂದು ಅಲ್ಲಿಂದ ಬೈಕ್ ಹತ್ತಿ ಮಲ್ಲೇಶ್ವರ ಮಾರುಕಟ್ಟೆಗೆ ಬಂದು ಹೂವು-ಹಣ್ಣು ಖರೀದಿಸಿ, ಬೆಳಗಿನ ಜಾವ 5 ಗಂಟೆಗೆ ಪೂಜೆ ಮಾಡಿ ಮುಗಿಸಿ, ಮಲಗಿದೆ. ತಮಿಳು ಕವಿ ಭಾರತೀಯಾರ್ ಒಂದು ಸಾಲು ಹೇಳಿದ್ದಾರೆ. "ನಂಬಿದವನಿಗೆ ಕೆಡುಕಿಲ್ಲಾ, ಗೆದ್ದೇ ಗೆಲ್ಲುತ್ತಾನೆ. ಅದಕ್ಕೆ ನಾಲ್ಕು ಬಾರಿ ತೀರ್ಪು" ಎಂದು. ಇಂದಿಗೂ ನನ್ನ ಭಕ್ತಿ ಕುಂದಿಲ್ಲ. ಮುಂದುವರಿದು ಯಾವುದೇ ಆಲಯವಾಗಲಿ ಕಸಗುಡಿಸಿ ಸೇವೆ ಮಾಡುವೆ. ಕಾರಣ ನನ್ನಲ್ಲಿ ಅಹಂಕಾರ ಹತ್ತಿರ ಸುಳಿಯಬಾರದು ಎಂದು. ಇದು ನನ್ನ ಯೌವ್ವನದಲ್ಲಿ ಒಬ್ಬ ಆಧ್ಯಾತ್ಮಿಕ ಗುರು ಹೇಳಿಕೊಟ್ಟ ಶ್ರೇಷ್ಠ ಪಾಠವಿದು" ಎಂದು ಜಗ್ಗೇಶ್​ ತಮ್ಮ ಭಾವುಕ ಕ್ಷಣವನ್ನು ಬರೆಹದ ಮೂಲಕ ಹಂಚಿಕೊಂಡಿದ್ದಾರೆ.