ಹೈಕೋರ್ಟ್ ನ್ಯಾಯಮೂರ್ತಿ ವಿ.ಶ್ರೀಶಾನಂದ ಮಾತನಾಡಿ, ಎಲ್ಲ ಧರ್ಮವನ್ನೂ ಸಮಾನವಾಗಿ ಕಾಣುವ ಏಕೈಕ ರಾಷ್ಟ್ರ ಭಾರತ. ಶ್ರೀಕೃಷ್ಣನೇ ಎಲ್ಲರಿಗೂ ನಿಮ್ಮ ಧರ್ಮಾಚರಣೆ ಬಿಡಬೇಡಿ ಎಂದು ಗೀತೆಯಲ್ಲಿ ಸಾರಿದ್ದಾನೆ. ಎಲ್ಲರೂ ತಮ್ಮ ಮನೆಯ ದೇವರ ಕೋಣೆಯಲ್ಲಿ ಆಯಾಯ ಧರ್ಮದ ಗ್ರಂಥ ಇಟ್ಟುಕೊಳ್ಳಬೇಕು. ಮನೆಯ ಹೊಸಲು ದಾಟಿದ ಕೂಡಲೇ ನಮ್ಮನ್ನೆಲ್ಲ ಬದ್ಧಪಡಿಸುವ ಏಕೈಕ ಗ್ರಂಥ ಭಾರತದ ಸಂವಿಧಾನ ಮಾತ್ರ. ಯಾರು ಸರಿಯಾಗಿ ಧರ್ಮ ಹಾಗೂ ಸಂವಿಧಾನ ಅರಿತಿದ್ದಾರೆಯೋ ಅವರ್ಯಾರಿಗೂ ಸಹ ತೊಳಲಾಟ ಎಂದಿಗೂ ಬಂದಿಲ್ಲ, ಬರುವುದೂ ಇಲ್ಲ. ಸಂವಿಧಾನ ರಚನಾ ಸಮಿತಿಯ ಸಭೆ, ಪಾಲ್ಗೊಂಡಿದ್ದ ಗಣ್ಯರು, ಅವರು ಚರ್ಚಿಸಿದ ವಿಚಾರಗಳು, ಸಂವಿಧಾನ ರಚನೆಯ ಮೊದಲು ಮತ್ತು ನಂತರ ಎಲ್ಲೆಲ್ಲಿ ಭಗವದ್ಗೀತೆಯ ಉಲ್ಲೇಖ ಹೇಗಿತ್ತು ಎನ್ನುವುದನ್ನು ತಿಳಿಸಿದರು. ಗೀತೆಯ ಆಧಾರದಲ್ಲಿ ತೀರ್ಪುಗೊಂಡ ಹಲವು ಪ್ರಕರಣಗಳ ವಿಚಾರ ತಿಳಿಸಿದರು. ಗೀತೆ ಪಠಿಸಿದ ನ್ಯಾಯಾಧೀಶರಿಗೆ ಕಟಕಟೆಯಲ್ಲಿರುವ ವ್ಯಕ್ತಿ ಕೇವಲ ಅಪರಾಧಿಯಾಗಷ್ಟೇ ಕಾಣಲು ಸಾಧ್ಯ ಎಂದು ನ್ಯಾಯದಾನದ ವಿವಿಧ ಪ್ರಕ್ರಿಯೆ ವಿವರಿಸಿದರು.
