ದುರ್ಗಮ ಹಾದಿಯಲ್ಲಿ ದಿಟ್ಟ ಸೇವೆ: ಶಿವಮೊಗ್ಗ ಜಿಲ್ಲೆ ಸಾಗರ ತಾಲೂಕಿನ ಅರಳಗೋಡು ಪ್ರಾಥಮಿಕ ಆರೋಗ್ಯ ಘಟಕದ ಕಿರಿಯ ಮಹಿಳಾ ಆರೋಗ್ಯ ಸಹಾಯಕಿ ಎಸ್.ಪುಷ್ಪಾ ಸೇವೆ ಭಿನ್ನ, ಕಠಿಣ. ಸಮಸ್ಯೆ ಎಂದು ಹೇಳಿದರೆ ರಾತ್ರಿ 12 ಗಂಟೆಯಾಗಿರಲಿ ಅಥವಾ ಬೆಳಗಿನ ಜಾವವಾಗಿರಲಿ ತಮ್ಮ ತಂಡದೊಂದಿಗೆ ಎಂಥ ದುರ್ಗಮ ಹಾದಿಯಾದರೂ ಸರಿ ನೆರವಿಗೆ ಧಾವಿಸುತ್ತಾರೆ. ಮೂರು ವರ್ಷಗಳಿಂದ ಈ ಪ್ರದೇಶದಲ್ಲಿ ಅವರ ನಗುಮೊಗದ ಸೇವೆ ಎಲ್ಲರ ಗಮನ ಸೆಳೆದಿದೆ. ಕೆಲವೊಂದು ಊರಿನಲ್ಲಿ ಒಂದೊಂದೇ ಮನೆ ಇದೆ. 165 ಹಳ್ಳಿ ಇವರ ವ್ಯಾಪ್ತಿಗೆ ಬರುತ್ತವೆ. ಎಲ್ಲ ಗ್ರಾಮಗಳಿಗೂ ಪುಷ್ಪಾ ಸಾರಥ್ಯದ ತಂಡ ಎರಡ್ಮೂರು ಬಾರಿ ಭೇಟಿ ನೀಡಿ ಶುಶ್ರೂಷೆಗೆ ನಿಂತಿದೆ. ಇಲ್ಲಿಯವರೆಗೆ ಮಂಗನ ಕಾಯಿಲೆಗೆ ಸುಮಾರು 2,500 ರೋಗನಿರೋಧಕ ಚುಚ್ಚುಮದ್ದು ನೀಡಿದ್ದಾರೆ. ಬೆಟ್ಟಗುಡ್ಡಗಳ ಮೇಲಿರುವ ಊರುಗಳ ರೋಗಿಗಳಿಗೆ ನೀಡಿದ ಶುಶ್ರೂಷೆಯನ್ನು ಯಾರೂ ಮರೆಯುವಂತಿಲ್ಲ. ಮಂಗನ ಕಾಯಿಲೆ ನಿಯಂತ್ರಣ ಜತೆಗೆ ಕರೊನಾಗೆ ಸಂಬಂಧಿಸಿ ಕ್ವಾರಂಟೈನ್ನಲ್ಲಿರುವವರ ಆರೈಕೆ ಮಾಡುವ ಹೊಣೆಗಾರಿಕೆ ಹೊತ್ತಿದ್ದಾರೆ. ಆದರೆ, ಅರಳಗೋಡು ಪ್ರಾಥಮಿಕ ಆರೋಗ್ಯ ಕೇಂದ್ರದ ಬುಡದಲ್ಲಿರುವ ಇವರ ವಸತಿನಿಲಯ ದುಸ್ಥಿತಿಯಲ್ಲಿದೆ. ಹಾವು, ಇಲಿ ಮುಂತಾದ ಕ್ರಿಮಿಕೀಟಗಳ ಆವಾಸಸ್ಥಾನವಾಗಿದೆ. ಮಳೆ ಬಂದರೆ ಸೋರುತ್ತದೆ.
