ನವೆಂಬರ್​ನಲ್ಲಿ ಫೀಲ್ಡ್​ಗೆ ಇಳಿಯುತ್ತಾರಂತೆ ಸಲ್ಮಾನ್​ ಖಾನ್​

ಈ ಡಿಸೆಂಬರ್​ ಬಂದರೆ ಸಲ್ಮಾನ್​ ಖಾನ್​ ಅಭಿನಯದ 'ದಬಾಂಗ್​ 3' ಚಿತ್ರ ಬಿಡುಗಡೆಯಾಗಿ ಒಂದು ವರ್ಷವೇ ಆಗುತ್ತದೆ. ಪ್ರತೀ ವರ್ಷ ಸಲ್ಮಾನ್​ ಅಭಿನಯದ ಎರಡು ಚಿತ್ರಗಳಾದರೂ ಬಿಡುಗಡೆಗೆ ಇದ್ದೇ ಇರುತ್ತದೆ. ಆದರೆ, 'ದಬಾಂಗ್​ 3' ಬಿಡುಗಡೆಯಾಗಿ ಒಂದು ವರ್ಷವಾಗುತ್ತಾ ಬಂದಿದ್ದರೂ ಸಲ್ಮಾನ್​ ಅಭಿನಯದ ಯಾವೊಂದು ಚಿತ್ರ ಬಿಡುಗಡೆಯಾಗಿಲ್ಲ.

ಅದಕ್ಕೆ ಕಾರಣ ಲಾಕ್​ಡೌನ್​. ಈದ್​ ಮಿಲಾದ್​ ಸಂದರ್ಭದಲ್ಲಿ ಸಲ್ಮಾನ್​ ಅಭಿನಯದ 'ರಾಧೇ - ಯುವರ್​ ಮೋಸ್ಟ್​ ವಾಂಟೆಡ್​ ಭಾಯ್​' ಚಿತ್ರ ಬಿಡುಗಡೆಯಾಗಬೇಕಿತ್ತು. ಚಿತ್ರದ ಚಿತ್ರೀಕರಣ ಸಹ ಬಹುತೇಕ ಮುಗಿದಿತ್ತು. ಇನ್ನು ಒಂದು ಹಾಡು ಸೇರಿದಂತೆ ಒಂದಿಷ್ಟು ದಿನಗಳ ಚಿತ್ರೀಕರಣ ಮುಗಿದಿದ್ದರೆ, ಕುಂಬಳಕಾಯಿ ಒಡೆಯಬೇಕಿತ್ತಂತೆ.

ಇದನ್ನೂ ಓದಿ: ಕರೊನಾ: ಎಸ್‌.ಪಿ.ಬಾಲಸುಬ್ರಹ್ಮಣ್ಯಂ ಆಸ್ಪತ್ರೆಗೆ ದಾಖಲು- ವಿಡಿಯೋ ಸಂದೇಶ

ಆದರೆ, ಅಷ್ಟರಲ್ಲಿ ಕರೊನಾ ಹಾವಳಿ ಹೆಚ್ಚಾಗಿ ಲಾಕ್​ಡೌನ್​ ಘೋಷಣೆಯಾಯಿತು. ಮುಗಿಯಬೇಕಿದ್ದ, 'ರಾಧೇ - ಯುವರ್​ ಮೋಸ್ಟ್​ ವಾಂಟೆಡ್​ ಭಾಯ್​' ಚಿತ್ರದ ಬಾಕಿ ಚಿತ್ರೀಕರಣ ನೆನೆಗುದಿಗೆ ಬಿತ್ತು. ಲಾಕ್​ಡೌನ್​ ಸಂದರ್ಭದಲ್ಲಿ ತಮ್ಮ ಪನ್ವೇಲ್​ನ ಫಾರ್ಮ್​​ ಹೌಸ್​ನಲ್ಲೇ ಇದ್ದ ಸಲ್ಮಾನ್​, ಆಗಸ್ಟ್​ನಲ್ಲಿ ಮತ್ತೆ 'ರಾಧೇ - ಯುವರ್​ ಮೋಸ್ಟ್​ ವಾಂಟೆಡ್​ ಭಾಯ್​' ಚಿತ್ರಕ್ಕೆ ಬಾಕಿ ಇರುವ ಚಿತ್ರೀಕರಣದಲ್ಲಿ ಭಾಗವಹಿಸುವುದಾಗಿ ಹೇಳಿದ್ದರು.

ಹಾಗೆ ಹೇಳಿದ್ದ ಸಲ್ಮಾನ್​, ಇದೀಗ ಮನಸ್ಸು ಬದಲಾಯಿಸಿದ್ದಾರೆ. ಕರೊನಾ ಹಾವಳಿ ಇನ್ನೂ ಕಡಿಮೆಯಾಗದಿರುವುದರಿಂದ, ಸುಮ್ಮನೆ ರಿಸ್ಕ್​ ಬೇಡ ಎಂದು ತೀರ್ಮಾನಿಸಿರುವ ಅವರು ನವೆಂಬರ್​ನಿಂದ ಚಿತ್ರೀಕರಣದಲ್ಲಿ ಭಾಗವಹಿಸಲಿದ್ದಾರಂತೆ. ಅಷ್ಟೇ ಅಲ್ಲ, ಚಿತ್ರಕ್ಕೆ ಆ ಹಾಡಿನ ಅವಶ್ಯಕತೆ ಇಲ್ಲದಿರುವ ಕಾರಣ, ಅದನ್ನು ಬಿಟ್ಟು, ಮಿಕ್ಕ ಕೆಲಸಗಳನ್ನು ಮುಗಿಸುವುದಕ್ಕೆ ತೀರ್ಮಾನಿಸಿದರಂತೆ.

ಇದನ್ನೂ ಓದಿ: ಪುನೀತ್​ ರಾಜಕುಮಾರ್ ಕಡೆಯಿಂದ ಮನೆಯ ಕಾರು ಚಾಲಕನಿಗೆ ಸಿಕ್ತು ಸರ್ಪ್ರೈಸ್​ ಉಡುಗೊರೆ!

ಅದರಂತೆ ನವೆಂಬರ್​ನಲ್ಲಿ ಚಿತ್ರೀಕರಣ ಪ್ರಾರಂಭವಾಗಲಿದ್ದು, 2021ರ ರಿಪಬ್ಲಿಕ್​ ಡೇ ಅಂಗವಾಗಿ ಚಿತ್ರ ಬಿಡುಗಡೆ ಮಾಡುವುದಕ್ಕೆ ಅವರು ಯೋಚಿಸುತ್ತಿದ್ದಾರೆ. ಒಂದು ಪಕ್ಷ, ಅಂದುಕೊಂಡಿದ್ದರಲ್ಲಿ ಏರುಪೇರಾದರೆ, ಮುಂದಿನ ಈದ್​ಗೆ ಚಿತ್ರ ಬಿಡುಗಡೆ ಮಾಡುವುದು ಚಿತ್ರತಂಡದ ಸದ್ಯದ ತೀರ್ಮಾನವಾಗಿದೆ.

'ರಾಧೇ - ಯುವರ್​ ಮೋಸ್ಟ್​ ವಾಂಟೆಡ್​ ಭಾಯ್​' ಚಿತ್ರದಲ್ಲಿ ಸಲ್ಮಾನ್​ ಜತೆಗೆ ದಿಶಾ ಪಠಾಣಿ, ಜಾಕಿ ಶ್ರಾಫ್​, ರಣದೀಪ್​ ಹೂಡಾ ಮುಂತಾದವರು ನಟಿಸುತ್ತಿದ್ದು, ಪ್ರಭುದೇವ ನಿರ್ದೇಶನ ಮಾಡುತ್ತಿದ್ದಾರೆ.

https://www.vijayavani.net/ashika-ranganath-birthday-gallery/