ಕರೊನಾ ಸೈಡ್​ ಎಫೆಕ್ಟ್​: ಮಹಾರಾಷ್ಟ್ರದಲ್ಲಿ ಸರ್ಕಾರಿ ನೌಕರರ ಸಂಬಳಕ್ಕೆ ಕುತ್ತು: ಶೇ.25 ರಿಂದ ಶೇ.60ರವರೆಗೆ ಕಡಿತ

ಮುಂಬೈ: ದೇಶದಲ್ಲಿ ಕರೊನಾದಿಂದಾಗಿ ತೀವ್ರ ಸಂಕಷ್ಟಕ್ಕೀಡಾಗಿರುವ ಮಹಾರಾಷ್ಟ್ರ ತನ್ನ ಉದ್ಯೋಗಿಗಳ ಸಂಬಳದಲ್ಲಿ ಭಾರಿ ಕಡಿತ ಘೋಷಿಸಿದೆ.

ಮಂಗಳವಾರ (ಮಾರ್ಚ್​ 31) ಡಿಸಿಎಂ ಅಜಿತ್​ ಪವಾರ್​ ಸರ್ಕಾರದ ನಿರ್ಧಾರವನ್ನು ಪ್ರಕಟಿಸಿದರು. 2019-20 ನೇ ಸಾಲಿನ ಆದಾಯದಲ್ಲಿ ತೀವ್ರ ಕುಸಿತ ಉಂಟಾಗಿರುವ ಕಾರಣ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಆರ್ಥಿಕ ಸಂಕಷ್ಟವನ್ನು ಕೊಂಚಮಟ್ಟಿಗೆ ಸರಿದೂಗಿಸಲು ಈ ಕ್ರಮಕ್ಕೆ ಮುಂದಾಗಲಾಗಿದೆ. ಮಾರ್ಚ್​ ತಿಂಗಳಿನಿಂದಲೇ ಅನ್ವಯವಾಗುವಂತೆ ಸಂಬಳ ಕಡಿತ ಜಾರಿಗೆ ಬರಲಿದೆ ಎಂದು ಹೇಳಿದ್ದಾರೆ.

ಸಿಎಂ, ಡಿಸಿಎಂ, ಸಚಿವರು, ಶಾಸಕರು ಸೇರಿ ಗ್ರಾಮಪಂಚಾಯತ್ ವರೆಗಿನ ಎಲ್ಲ ಜನಪ್ರತಿನಿಧಿಗಳ ಸಂಬಳದಲ್ಲಿ ಶೇ.60 ಕಡಿತ ಮಾಡಲಾಗಿದೆ. ಇವರಿಗೆ ಇನ್ನುಳಿದ ಶೇ.40 ಸಂಬಳವನ್ನು ಮಾತ್ರ ನೀಡಲಾಗುತ್ತದೆ. ಇನ್ನು, ಗ್ರುಪ್​ ಎ ಮತ್ತು ಬಿ ಹುದ್ದೆಗಳ ಅಧಿಕಾರಿಗಳ ವೇತನದಲ್ಲಿ ಅರ್ಧದಷ್ಟುಮಾತ್ರ ಬಟವಾಡೆ ಮಾಡಲಾಗುವುದು. ಕಾರ್ಯದರ್ಶಿಗಳಿಂದ ಹಿಡಿದು ಸಹಾಯಕ ದರ್ಜೆ ಅಧಿಕಾರಿಗಳು ಇದರಲ್ಲಿ ಸೇರಿದ್ದಾರೆ. ಗ್ರೂಪ್​ ಸಿ ಅಂದರೆ ಗುಮಾಸ್ತ ಸಿಬ್ಬಂದಿಗೆ ಶೇ.75 ಸಂಬಳ ನೀಡಲಾಗುವುದು.

ಗ್ರೂಪ್​ ಡಿ ನೌಕರರಿಗೆ ಪೂರ್ಣ ಸಂಬಳ: ಸರ್ಕಾರಿ ಉದ್ಯೋಗಿಗಳಲ್ಲಿ ಕೊನೆಯ ಹಂತದಲ್ಲಿರುವ ಗ್ರೂಪ್​ ಡಿ ನೌಕರರ ಸಂಬಳದಲ್ಲಿ ಯಾವುದೇ ಕಡಿತ ಇರುವುದಿಲ್ಲ. ಅಂದರೆ. ಜವಾನರು, ಕಚೇರಿ ಸಹಾಯಕರ ವೇತನವನ್ನು ಪೂರ್ಣವಾಘಿ ಪಾವತಿಸಲಾಗುವುದು ಎಂದು ಅಜಿತ್​ ಪವಾರ್​ ತಿಳಿಸಿದ್ದಾರೆ.

ಸರ್ಕಾರಿ ನೌಕರರ ವಿವಿಧ ಸಂಘಟನೆಗಳೊಂದಿಗೆ ಚರ್ಚೆ ನಡೆಸಿದ ಬಳಿಕ ಈ ನಿರ್ಧಾರ ಪ್ರಕಟಿಸಲಾಗಿದೆ ಎಂದು ಡಿಸಿಎಂ ಮಾಹಿತಿ ನೀಡಿದರು.

ಇದೇ ವೇಳೆ, ರಾಜ್ಯದ ವಿವಿಧ ರಾಜಕೀಯ ಪಕ್ಷಗಳು ತಮ್ಮ ಸದಸ್ಯರ ಒಂದು ತಿಂಗಳ ಸಂಬಳವನ್ನು ಸರ್ಕಾರದ ಪರಿಹಾರದ ನಿಧಿಗೆ ನೀಡುವುದಾಗಿ ಘೋಷಿಸಿವೆ.

https://www.vijayavani.net/health-minister-b-sriramulu-published-dist-covid19-helpline/