ಹೌಸ್​ವೈಫ್​ ಎಂದರೆ ಮೂದಲಿಕೆ ಏಕೆ? ಅವರ ಶ್ರಮಕ್ಕೆ ಮನ್ನಣೆ ನೀಡೋದನ್ನು ಕಲಿಯಿರಿ ಸುಪ್ರೀಂ ಕೋರ್ಟ್

ನವದೆಹಲಿ: ಹೆಂಗಸು ಮನೆಯಲ್ಲಿ ಮಾಡುವ ಕೆಲಸದ ಬೆಲೆ ಆಫೀಸಿಗೆ ಹೋಗುವ ಗಂಡನ ಕೆಲಸಕ್ಕಿಂತ ಕಡಿಮೆ ಏನಲ್ಲ ಎಂದು ಸುಪ್ರೀಂ ಕೋರ್ಟ್​ ಅಭಿಪ್ರಾಯಪಟ್ಟಿದೆ. ಹೌಸ್​ವೈಫ್​ಗಳು ದುಡಿಯುವುದಿಲ್ಲ ಅಥವಾ ಮನೆಗೆ ಆರ್ಥಿಕ ಕೊಡುಗೆ ನೀಡುವುದಿಲ್ಲ ಎಂಬ ಪರಿಕಲ್ಪನೆಯನ್ನು ತಿದ್ದಿಕೊಳ್ಳಬೇಕು ಎಂದಿದೆ, ನ್ಯಾಯಾಲಯ.

ಮಂಗಳವಾರ ಇತ್ಯರ್ಥಗೊಳಿಸಿದ ಅಪಘಾತ ಪ್ರಕರಣವೊಂದರಲ್ಲಿ ಸತ್ತ ಮಹಿಳೆಯ ಸಂಬಂಧಿಕರಿಗೆ ಸಲ್ಲಬೇಕಾದ ಪರಿಹಾರ ಮೊತ್ತವನ್ನು ಹೆಚ್ಚಿಸಿದ ನ್ಯಾಯಮೂರ್ತಿ ಎನ್.ವಿ.ರಮಣ ನೇತ್ರತ್ವದ ತ್ರಿಸದಸ್ಯ ಪೀಠ, ಈ ಅಭಿಪ್ರಾಯ ವ್ಯಕ್ತಪಡಿಸಿದೆ. ಸಮಾನತೆಗಾಗಿ ಎಷ್ಟೇ ಹೋರಾಡಿದರೂ ಮನೆಯಲ್ಲಿ ಬೆಳಿಗ್ಗೆಯಿಂದ ರಾತ್ರಿವರೆಗೆ ದುಡಿಯುವ ಮಹಿಳೆಯರಿಗೆ ಸೂಕ್ತ ಮಾನ್ಯತೆ ಸಿಗದ ಇಂದಿನ ಪರಿಸ್ಥಿತಿಯಲ್ಲಿ ನ್ಯಾಯಾಲಯದ ಈ ಮಾತು ಮಹಿಳಾ ಸಬಲೀಕರಣಕ್ಕೆ ಹೊಸ ಆಯಾಮ ನೀಡಿದೆ.

2014ರ ಏಪ್ರಿಲ್​ನಲ್ಲಿ ನವದೆಹಲಿಯಲ್ಲಿ ಸ್ಕೂಟರ್​ನಲ್ಲಿ ಪಯಣಿಸುತ್ತಿದ್ದ ದಂಪತಿಯು ಕಾರು ಡಿಕ್ಕಿ ಹೊಡೆದ ಪರಿಣಾಮ ಮೃತಪಟ್ಟರು. ಸತ್ತವರ ಸಂಬಂಧಿಕರಿಗೆ ನೀಡುವ ಪರಿಹಾರ ಮೊತ್ತವನ್ನು ನಿಗದಿ ಪಡಿಸುವಾಗ ದೆಹಲಿ ಉಚ್ಛ ನ್ಯಾಯಾಲಯವು ಮಹಿಳೆಯು ಹೌಸ್​ವೈಫ್​ ಎಂಬ ಕಾರಣಕ್ಕೆ ಅವಳ ಆದಾಯ ಪರಿಗಣನೆಯನ್ನು ಕಡಿಮೆ ಮಾಡಿ 11.20 ಲಕ್ಷ ರೂಪಾಯಿ ಪರಿಹಾರ ಆದೇಶಿಸಿತ್ತು. ಈ ನಿರ್ಣಯವನ್ನು ಬದಲಿಸಿದ ಸುಪ್ರೀಂ, ವಿಮಾ ಕಂಪೆನಿಯು ನೀಡಬೇಕಾದ ಪರಿಹಾರ ಮೊತ್ತವನ್ನು 33.20 ಲಕ್ಷ ರೂಪಾಯಿಗೆ ಹೆಚ್ಚಿಸಿತು.

ಈ ಕುರಿತು ಪ್ರತ್ಯೇಕ ಆದೇಶವೊಂದನ್ನು ನೀಡಿದ ನ್ಯಾಯಮೂರ್ತಿ ರಮಣ ಅವರು, ರಾಷ್ಟ್ರೀಯ ಅಂಕಿಸಂಖ್ಯೆ ಕಾರ್ಯಾಲಯದ 'ಟೈಮ್ ಯೂಸ್ ಇನ್ ಇಂಡಿಯಾ-2019' ಎಂಬ ಶೀರ್ಷಿಕೆಯ ವರದಿಯನ್ನು ಉಲ್ಲೇಖಿಸಿದ್ದಾರೆ. ವರದಿಯಲ್ಲಿ ಮಹಿಳೆಯರು ಒಂದು ದಿನಕ್ಕೆ ಸರಿಸುಮಾರು 299 ನಿಮಿಷಗಳನ್ನು ತಮ್ಮ ಕುಟುಂಬದ ಸದಸ್ಯರಿಗಾಗಿ ಸಂಬಳವಿಲ್ಲದೆ ಗೃಹಸೇವೆಗಳನ್ನು ಮಾಡಲು ವ್ಯಯಿಸುತ್ತಾರೆ, ಅದೇ ಗಂಡಸರು ಬರೀ 97 ನಿಮಿಷಗಳನ್ನು ವ್ಯಯ ಮಾಡುತ್ತಾರೆ ಎಂದು ಹೇಳಲಾಗಿದೆ.

2011 ರ ಜನಗಣನೆಯ ಪ್ರಕಾರ ಭಾರತದಲ್ಲಿ 159.89 ಮಿಲಿಯನ್ ಮಹಿಳೆಯರು "ಮನೆ ಕೆಲಸ" ಮಾಡುತ್ತಾರೆ. "ಮಹಿಳೆಯು ಆಹಾರ ತಯಾರಿಸುತ್ತಾಳೆ, ದಿನಸಿಸಾಮಾನು ಇತರ ಖರೀದಿಗಳನ್ನು ನೋಡಿಕೊಳ್ಳುತ್ತಾಳೆ, ಮನೆಯನ್ನು - ಅದರ ಆವರಣವನ್ನು ಸ್ವಚ್ಛಗೊಳಿಸುತ್ತಾಳೆ, ಅಲಂಕರಿಸುತ್ತಾಳೆ, ರಿಪೇರಿ-ನಿರ್ವಹಣೆ ಮಾಡುತ್ತಾಳೆ ಮತ್ತು ಮಕ್ಕಳನ್ನು - ವಯಸ್ಸಾದವರನ್ನು ಆರೈಕೆ ಮಾಡುತ್ತಾಳೆ" ಎಂದು ವಿವರಿಸಿರುವ ನ್ಯಾಯಮೂರ್ತಿ ಎನ್.ವಿರಮಣ ಅವರು, "ಇಷ್ಟೆಲ್ಲ ಮಾಡಿದರೂ ಹೋಮ್​ಮೇಕರ್​ಗಳು ಕೆಲಸ ಮಾಡುವುದಿಲ್ಲ ಅಥವಾ ಮನೆಗೆ ಆರ್ಥಿಕವಾಗಿ ಕೊಡುಗೆ ನೀಡುವುದಿಲ್ಲ ಎಂಬ ಪರಿಕಲ್ಪನೆ ಇಟ್ಟುಕೊಂಡಿರುವುದು ಸಮಸ್ಯಾತ್ಮಕವಾಗಿದೆ. ಇದನ್ನು ನಿವಾರಿಸಬೇಕಿದೆ" ಎಂದಿದ್ದಾರೆ.

https://www.vijayavani.net/s-3d-advertisement-with-5g-technology/

https://www.vijayavani.net/s-cm-ibrahim-on-muslim-old-gaadi/

https://www.vijayavani.net/s-cm-ibrahim-about-yogi-adityanatha/