ಇದಾದ ಬಳಿಕ ಇತ್ತೀಚೆಗೆ ಬಾಲಿವುಡ್ ಖ್ಯಾತ ನಿರ್ದೇಶಕ ಹಾಗೂ ನಿರ್ಮಾಪಕ ಕರಣ್ ಜೋಹರ್ ನಡೆಸಿಕೊಡುವ ಕಾಫಿ ವಿತ್ ಕರಣ್ ಕಾರ್ಯಕ್ರಮದ 7ನೇ ಸೀಸನ್ನ 3ನೇ ಎಪಿಸೋಡ್ನಲ್ಲಿ ಕಾಣಿಸಿಕೊಂಡಿದ್ದ ಸಮಂತಾ ಕರಣ್ ಕೇಳಿರುವ ಪ್ರಶ್ನೆಗೆ ಮಾಜಿ ಪತಿ ನಾಗಚೈತನ್ಯ ಜೊತೆಗಿನ ತನ್ನ ಸಂಬಂಧ ಹಾಗೂ ಕೆಲವು ವದಂತಿಗಳ ಬಗ್ಗೆ ಮಾತನಾಡಿದ್ದರು. ಕರಣ್ ಜೋಹರ್, ನಾಗಚೈತನ್ಯರನ್ನು ನಿಮ್ಮ ಪತಿ ಎಂದು ಸಂಭೋದಿಸಿದಾಗ ತಕ್ಷಣ ಅದನ್ನು ಸರಿಪಡಿಸಿದ ಸಮಂತಾ ಪತಿಯಲ್ಲ, ಮಾಜಿ ಪತಿ ಎಂದರು. ಅದನ್ನು ಸರಿಪಡಿಸಿಕೊಂಡ ಬಳಿಕ ಸಮಂತಾರನ್ನು ಉದ್ದೇಶಿಸಿ, ನೀವು ಮತ್ತು ನಾಗಚೈತನ್ಯ ಸೌಹಾರ್ದಯುತವಾಗಿದ್ದೀರಾ? ಎಂದು ಪ್ರಶ್ನಿಸಿದರು. ಇದಕ್ಕೆ ಉತ್ತರಿಸಿದ್ದ ಸಮಂತಾ, ನೀವು ನಮ್ಮಿಬ್ಬರನ್ನೂ ಒಂದು ಕೋಣೆಯಲ್ಲಿ ಇರಿಸಿದರೆ, ನೀವು ಚೂಪಾದ ವಸ್ತುಗಳನ್ನು ಮರೆಮಾಡಬೇಕು ಎಂಬುದು ನಿಮ್ಮ ಮಾತಿನ ಅರ್ಥವೇ? ಸದ್ಯದ ಪರಿಸ್ಥಿತಿಯಲ್ಲಿ ಇದು ಹೌದು ಎಂದಿದ್ದರು. ಕೂಡಲೇ ಬಹುಶಃ ಭವಿಷ್ಯದಲ್ಲಿ ನೀವು ಹೇಳಿದ್ದು ಆಗಬಹುದು ಎಂದಿದ್ದರು.
