ಬೀಜಿಂಗ್: ಕರೊನಾ ತವರು ಚೀನಾದಿಂದ ಇದೀಗ ಮಂಕಿ ಬಿ ವೈರಸ್ ಪತ್ತೆಯಾಗಿದೆ. ಮಾರ್ಚ್ ಆರಂಭದಲ್ಲಿ ಮೃತಪಟ್ಟ ಎರಡು ಕೋತಿಗಳನ್ನು ಅಧ್ಯಯನ ನಡೆಸಿದ್ದ ಬೀಜಿಂಗ್ ಮೂಲದ 53 ವರ್ಷದ ಪಶುವೈದ್ಯ ಈ ಸೋಂಕಿಗೆ ಬಲಿಯಾಗಿದ್ದಾರೆ.
1992ರಲ್ಲಿ ಮೊದಲ ಬಾರಿಗೆ ಪತ್ತೆಯಾಗಿದ್ದ ಈ ಸೋಂಕು ಮತ್ತೆ ಕಾಣಿಸಿಕೊಂಡಿದ್ದು, ಇದೀಗ ಇಡೀ ಜಗತ್ತನ್ನೇ ತಲ್ಲಣಗೊಳಿಸುತ್ತಿದೆ. ಕರೊನಾದಂತೆಯೇ ಇಡೀ ವಿಶ್ವವನ್ನು ವ್ಯಾಪಿಸಬಹುದಾದ ಈ "ಮಂಕಿ ಬಿ ವೈರಸ್" ಕುರಿತು ಸಂಶೋಧಕರು ನೀಡಿರುವ ಒಂದಿಷ್ಟು ಮಾಹಿತಿ ಇಲ್ಲಿದೆ.
ಏನಿದು ವೈರಸ್?
ಹಳೆಯ ಕೋತಿಗಳ ಕುಲದಿಂದ ಈ ಸೋಂಕು ಹರಡುವುದು ಸ್ಪಷ್ಟವಾಗಿದೆ. ಅದರಲ್ಲಿಯೂ ಮಕಾಕ್, ಚಿಂಪಾಂಜಿ ಮತ್ತು ಕ್ಯಾಪುಚಿನ್ ಜಾತಿಯ ಕೋತಿಗಳಲ್ಲಿ ಈ ಸೋಂಕು ಪತ್ತೆಯಾಗಿವೆ. ಮಂಕಿ ವೈರಸ್ ಅನ್ನು ಹರ್ಪಿಸ್ ಬಿ, ಮಂಕಿ ಬಿ ವೈರಸ್, ಹರ್ಪಿಸ್ ವೈರಸ್ ಸಿಮಿಯ ಮತ್ತು ಹರ್ಪಿಸ್ ವೈರಸ್ ಬಿ ಎಂದೂ ಕರೆಯುತ್ತಾರೆ. ಅಮೆರಿಕದ ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರ ನೀಡಿರುವ ಮಾಹಿತಿ ಪ್ರಕಾರ, ಈ ಸೋಂಕು ಮನುಷ್ಯರಿಗೆ ಅಂಟಿಕೊಳ್ಳುವುದು ತೀರಾ ವಿರಳ. 1932ರಲ್ಲಿ ಮೊದಲ ಬಾರಿಗೆ ವ್ಯಕ್ತಿಯೊಬ್ಬರಿಗೆ ಇದು ಕಾಣಿಸಿಕೊಂಡಿತ್ತು. ಇವರೆಗೆ 50 ಮಂದಿಯಲ್ಲಿ ಇದು ಕಾಣಿಸಿಕೊಂಡಿದ್ದು 21 ಮಂದಿ ಮೃತಪಟ್ಟಿದ್ದಾರೆ.
ಮಂಗಗಳ ಜತೆ ಸಂಪರ್ಕದಲ್ಲಿದ್ದ ಚೀನಾದ ವೈದ್ಯ ಮೃತಪಟ್ಟಿದ್ದು, ಇವರ ಜತೆಗೆ ಪ್ರಾಥಮಿಕ ಸಂಪರ್ಕ ಹೊಂದಿದ್ದವರನ್ನು ವೈದ್ಯಕೀಯ ತಪಾಸಣೆಗೆ ಒಳಪಡಿಸಲಾಗಿದೆ. ಆದರೆ ಯಾರೊಬ್ಬರಿಗೂ ರೋಗದ ಲಕ್ಷಣ ಕಂಡು ಬಂದಿಲ್ಲ ಎನ್ನಲಾಗಿದೆ.
ಸೋಂಕು ಹರಡುವುದು ಹೇಗೆ?
ಕೋತಿಗಳ ದೇಹದಲ್ಲಿ ಇರುವ ಲಾಲಾರಸ, ಮಲ, ಮೂತ್ರ, ಮೆದುಳು ಅಥವಾ ಬೆನ್ನುಹುರಿ ಅಂಗಾಂಶಗಳು ಹಾಗೂ ಮೇಲ್ಮೈ ಭಾಗಗಳಲ್ಲಿ ಈ ಸೋಂಕು ಇರುತ್ತದೆ. ಇಂಥ ತಳಿಗಳ ಕೋತಿಗಳ ಮೇಲೆ ಪ್ರಯೋಗಾಲಯಗಳಲ್ಲಿ ಕಾರ್ಯ ನಿರ್ವಹಿಸುವವರು, ಪಶುವೈದ್ಯರು ಸೇರಿದಂತೆ ಕೋತಿಗಳಿಗೆ ಚಿಕಿತ್ಸೆ ನೀಡುವ ಕಾರ್ಯದಲ್ಲಿ ತೊಡಗಿರುವವರಲ್ಲಿ ಇದು ತಗಲುತ್ತವೆ. ಇಲ್ಲದಿದ್ದರೆ ಇದು ಹರಡುವುದು ಅಪರೂಪ.
