VIDEO: ಐಸ್​ಕ್ರೀಂ ಹಿಡಿದುಕೊಂಡೇ ದರೋಡೆಕೋರರತ್ತ ಗುಂಡುಹಾರಿಸಿ ಅರೆಸ್ಟ್ ಮಾಡಿದ ಪೊಲೀಸ್​​!

ಉರುಗ್ವೆ (ಅಮೆರಿಕ): ಕೆಲವು ಅಧಿಕಾರಿಗಳು 24 ಗಂಟೆಯೂ ಅಲರ್ಟ್​ ಆಗಿರಬೇಕಾಗುತ್ತದೆ. ಆದರೆ ಕರ್ತವ್ಯ ನಿಷ್ಠೆ ಮೆರೆಯುವ ಅಧಿಕಾರಿಗಳು ಈ ನಿಯಮವನ್ನು ಚಾಚೂತಪ್ಪದೇ ಪಾಲಿಸುತ್ತಾರೆ. ಎಷ್ಟೋ ವೇಳೆ ಅವರ ಕರ್ತವ್ಯನಿಷ್ಠೆ, ಸಮಯಪ್ರಜ್ಞೆ ಎಷ್ಟೋ ಜನರ ಪ್ರಾಣವನ್ನು ಕಾಪಾಡಲು ಸಹಾಯವಾಗುತ್ತದೆ.

ಅಂಥದ್ದೇ ಒಂದು ಘಟನೆ ಅಮೆರಿಕದ ಉರುಗ್ವೆಯಲ್ಲಿ ನಡೆದಿದೆ. ಮಗನ ಜತೆ ಐಸ್​ಕ್ರೀಂ ಸವಿಯಲು ಹೋಗಿದ್ದ ಪೊಲೀಸ್​ ಅಧಿಕಾರಿಯೊಬ್ಬರ ಸಮಯಪ್ರಜ್ಞೆಯಿಂದ ಭಾರಿ ಅನಾಹುತವೊಂದು ತಪ್ಪಿದೆ.

ತಮ್ಮ ಡ್ಯೂಟಿ ಮುಗಿಸಿ ಮಗನ ಜತೆ ಹೋಗಿದ್ದ ಪೊಲೀಸ್​ ಅಧಿಕಾರಿ ಐಸ್​ಕ್ರೀಂ ತಿನ್ನುತ್ತಿದ್ದರು. ಅದೇ ವೇಳೆ ಇಬ್ಬರು ದರೋಡೆಕೋರರು ಅಲ್ಲಿಗೆ ಬಂದಿದ್ದಾರೆ. ತಮ್ಮ ಜೇಬಿನಲ್ಲಿದ್ದ ಪಿಸ್ತೂಲ್​ ತೆಗೆಯಲು ಅದರಲ್ಲಿ ಒಬ್ಬಾತ ಅಣಿಯಾಗುತ್ತಿದ್ದಂತೆಯೇ ಈ ಪೊಲೀಸ್​ ಅಧಿಕಾರಿಗಳಿಗೆ ಅದು ಒಂದೇ ಕ್ಷಣದಲ್ಲಿ ತಿಳಿದುಹೋಗಿದೆ.

ಏನೂ ಯೋಚನೆ ಮಾಡದ ಈ ಅಧಿಕಾರಿ ತಮ್ಮ ಬಳಿ ಇದ್ದ ಪಿಸ್ತೂಲ್​ ತೆಗೆದು ಗುಂಡು ಹಾರಿಸಿಯೇ ಬಿಟ್ಟಿದ್ದಾರೆ. ಅಚ್ಚರಿ ಎಂದರೆ ಇನ್ನೊಂದು ಕೈಯಲ್ಲಿ ಅವರು ಐಸ್​ಕ್ರೀಂ ಹಿಡಿದೇ ಇದ್ದರು!

ಒಂದು ಕ್ಷಣ ಏನಾಯಿತೆಂದು ತಿಳಿಯದ ದರೋಡೆಕೋರರು ಈ ಅನಿರೀಕ್ಷಿತ ಬೆಳವಣಿಗೆಯಿಂದ ಕಕ್ಕಾಬಿಕ್ಕಿಯಾಗಿ, ಓಡಿಹೋದರು. ಐಸ್​ಕ್ರೀಂ ಹಿಡಿದುಕೊಂಡೇ ಪೊಲೀಸ್​ ಅಧಿಕಾರಿ ಅವರ ಹಿಂದೆ ಹೋದರು. ಇತ್ತ ಮಗ ಇದೇನು ಮಾಮೂಲು ಎನ್ನುವಂತೆ ಐಸ್​ಕ್ರೀಂ ತಿನ್ನುತ್ತಲೇ ಇದ್ದ.

ಇವಿಷ್ಟು ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ನಂತರ ಇಬ್ಬರೂ ದರೋಡೆಕೋರರನ್ನು ಪೊಲೀಸ್​ ಅಧಿಕಾರಿ ಬಂಧಿಸಿದ್ದಾರೆ. ಬೈಕ್​ನಲ್ಲಿ ಬಂದಿದ್ದ ಈ ದರೋಡೆಕೋರರು ಬೈಕ್​ ಬಿಟ್ಟು ಓಡಿಹೋಗಿದ್ದರು. ಇನ್ನೊಂದು ಸುತ್ತಿನ ಗುಂಡು ಹಾರಿಸಿದ ಪೊಲೀಸ್​ ಅಧಿಕಾರಿಯಿಂದಾಗಿ ಒಬ್ಬ ದರೋಡೆಕೋರನಿಗೆ ಗಂಭೀರ ಗಾಯವಾಗಿದ್ದು, ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ನಂತರ ಇನ್ನೊಬ್ಬನೂ ಸಿಕ್ಕಿಬಿದ್ದಿದ್ದಾನೆ.

https://www.vijayavani.net/s-love-jihad-law-in-mp/

https://www.vijayavani.net/s-emergency-of-1975-as-unconstitutional-and-for-compensation-of-rs-25-crores-s-supreme-court-proclamation-of-emergency-unconstitutional-compensation/

https://www.vijayavani.net/s-manifesto-congress-farmers-bill/