ಟ್ರಂಪ್ ಸುಂಕಗಳನ್ನು ಖಂಡಿಸಿದ ರಷ್ಯಾ: ನಾವು ಭಾರತದೊಂದಿಗೆ ದೃಢವಾಗಿ ನಿಲ್ಲುತ್ತೇವೆ ಎಂದ ರೋಮನ್ ಬಾಬುಷ್ಕಿನ್ | Roman Babushkin

Roman Babushkin: ಭಾರತದ ಮೇಲೆ ಅಮೆರಿಕದ ಸುಂಕ ವಿಧಿಸಿರುವುದು ನ್ಯಾಯಸಮ್ಮತವಲ್ಲ ಎಂದು ರಷ್ಯಾದ ಉಪ ಮುಖ್ಯಸ್ಥ ಮಿಷನ್ ರೋಮನ್ ಬಾಬುಷ್ಕಿನ್ ಬುಧವಾರ ಭಾರತಕ್ಕೆ ತಮ್ಮ ಬೆಂಬಲವನ್ನು ವ್ಯಕ್ತಪಡಿಸಿದ್ದಾರೆ.

ಈ ಬಗ್ಗೆ ಮಾತನಾಡಿದ ಬಾಬುಷ್ಕಿನ್, ಅಮೆರಿಕವು ಭಾರತದ ಮೇಲೆ ಆರ್ಥಿಕತೆಯನ್ನು ಅಸ್ತ್ರವನ್ನಾಗಿ ಮಾಡಿಕೊಂಡು ನಿರ್ಬಂಧ ವಿಧಿಸಿದೆ. ಆದರೆ, ರಷ್ಯಾ ಎಂದಿಗೂ ಭಾರತದ ಮೇಲೆ ನಿರ್ಬಂಧಗಳನ್ನು ವಿಧಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಮುಂದುವರೆದು ಮಾತನಾಡಿದ ರೋಮನ್, ಭಾರತಕ್ಕೆ ನಿರಂತರ ಕಚ್ಚಾ ತೈಲ ಪೂರೈಕೆಯನ್ನು ಖಚಿತಪಡಿಸಿಕೊಳ್ಳಲು ರಷ್ಯಾ ವಿಶೇಷ ಕಾರ್ಯವಿಧಾನವನ್ನು ರಚಿಸಿದೆ. ಪ್ರಸ್ತುತ ಭಾರತವು ತನ್ನ ತೈಲ ಅಗತ್ಯಗಳಲ್ಲಿ ಸುಮಾರು 40 ಪ್ರತಿಶತವನ್ನು ಮಾಸ್ಕೋದಿಂದ ಸರಾಸರಿ ಶೇ5 ರಷ್ಟು ರಿಯಾಯಿತಿಯಲ್ಲಿ ಪಡೆಯುತ್ತಿದೆ ಎಂದು ತಿಳಿಸಿದ್ದಾರೆ.

ಇದನ್ನೂ ಓದಿ: ಉಪರಾಷ್ಟ್ರಪತಿ ಚುನಾವಣೆ; ಎನ್‌ಡಿಎ ಅಭ್ಯರ್ಥಿ ‘ಸಿ.ಪಿ. ರಾಧಾಕೃಷ್ಣನ್’​ರಿಂದ ನಾಮಪತ್ರ ಸಲ್ಲಿಕೆ| CP RADHAKRISHNAN

ಅಲ್ಲದೆ, 2030ರ ವೇಳೆಗೆ ಭಾರತ ಮತ್ತು ರಷ್ಯಾ ದ್ವಿಪಕ್ಷೀಯ ವ್ಯಾಪಾರದಲ್ಲಿ 100 ಶತಕೋಟಿ ಡಾಲರ್ ಗುರಿಯನ್ನು ಸಾಧಿಸುವ ಹಾದಿಯಲ್ಲಿವೆ ಎಂದು ಹೇಳಿದರು. ಭಾರತದ ಯಂತ್ರೋಪಕರಣಗಳು, ಔಷಧಗಳು, ಚಹಾ ಮತ್ತು ಅಕ್ಕಿ ರಫ್ತುಗಳನ್ನು ಹೆಚ್ಚಿಸುವ ಮೂಲಕ ವ್ಯಾಪಾರ ಅಸಮತೋಲನವನ್ನು ಕಡಿಮೆ ಮಾಡಲು ಮಾಸ್ಕೋ ಕೆಲಸ ಮಾಡುತ್ತಿದೆ ಎಂದು ತಿಳಿಸಿದರು. ರಷ್ಯಾ, ಭಾರತದ ಅತಿದೊಡ್ಡ ಇಂಧನ ಮತ್ತು ರಸಗೊಬ್ಬರ ಪೂರೈಕೆದಾರರಲ್ಲಿ ಒಂದಾಗಿ ಉಳಿದಿದೆ ಎಂದು ಬಾಬುಷ್ಕಿನ್ ಹೇಳಿದ್ದಾರೆ.

ಮುಂಬರುವ ಸವಾಲುಗಳನ್ನು ಎದುರಿಸಲು ಮತ್ತು ಅವುಗಳನ್ನು ತೆಗೆದುಹಾಕಲು ನಾವು ಭಾರತದೊಂದಿಗೆ ದೃಢವಾಗಿ ಇರುತ್ತೇವೆ ಎಂದು ಹೇಳಿದರು. ಭಾರತಕ್ಕೆ ರಷ್ಯಾ ಆಯ್ಕೆಯ ಪಾಲುದಾರ, ಜಂಟಿಯಾಗಿ ಬ್ರಹ್ಮೋಸ್ ಕ್ರೂಸ್ ಕ್ಷಿಪಣಿಯನ್ನು ಅಭಿವೃದ್ಧಿಪಡಿಸಿದೆ, ಜೆಟ್ ಎಂಜಿನ್‌ಗಳು ಸೇರಿದಂತೆ ಇತರ ಅತ್ಯಾಧುನಿಕ ಉಪಕರಣಗಳಲ್ಲಿ ಕೆಲಸ ಮಾಡುತ್ತಿದೆ ಎಂದು ಬಾಬುಷ್ಕಿನ್ ಬಹಿರಂಗಪಡಿಸಿದ್ದಾರೆ.

ಚೀನಾದ ವಾಂಗ್​ ಯಿ ಭಾರತ ಭೇಟಿಯನ್ನು ಸ್ವಾಗತಿಸಿದ ಬಾಬುಷ್ಕಿನ್

ರಾಜಕೀಯ ವಿಷಯಗಳ ಕುರಿತು ಮಾತನಾಡಿರುವ ಬಾಬುಷ್ಕಿನ್, ಚೀನಾದ ವಿದೇಶಾಂಗ ಸಚಿವ ವಾಂಗ್ ಯಿ ಅವರ ಭಾರತ ಭೇಟಿಯನ್ನು ಅತ್ಯಂತ ಯಶಸ್ವಿ ಎಂದು ಸ್ವಾಗತಿಸಿದರು, ರಷ್ಯಾ-ಭಾರತ-ಚೀನಾ ಕಾರ್ಯವಿಧಾನವನ್ನು ಪ್ರಮುಖ ವೇದಿಕೆ ಎಂದು ಬಣ್ಣಿಸಿದರು.

ಟಿಯಾಂಜಿನ್‌ನಲ್ಲಿ ನಡೆಯಲಿರುವ ಶಾಂಘೈ ಸಹಕಾರ ಸಂಸ್ಥೆ (ಎಸ್‌ಸಿಒ) ಶೃಂಗಸಭೆಯ ಹೊರತಾಗಿ ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ದ್ವಿಪಕ್ಷೀಯ ಸಭೆ ನಡೆಸಲಿದ್ದಾರೆ ಎಂದು ದೃಢಪಡಿಸಿದರು. ಆದರೆ, ಪುಟಿನ್​ ಭಾರತ ಭೇಟಿಗೆ ಯಾವುದೇ ದಿನಾಂಕಗಳನ್ನು ನಿಗದಿಪಡಿಸಲಾಗಿಲ್ಲ ಎಂದು ತಿಳಿಸಿದ್ದಾರೆ.(ಏಜೆನ್ಸೀಸ್​)

https://www.vijayavani.net/the-white-house-said-that-tariffs-were-imposed-on-india-to-end-the-russia-ukraine-war