ರಸ್ತೆ ಕಿರಿದು ಅವಾಂತರ ಹಿರಿದು

ನರೇಂದ್ರ ಎಸ್.ಮರಸಣಿಗೆ ಹೆಬ್ರಿ

ಸಿದ್ದಾಪುರ ಹಾಗೂ ಹೆಬ್ರಿ ಸಂಪರ್ಕಿಸುವ ಬಡ್ತಾನಬೈಲಿನಿಂದ ಹಾಲಿಕೋಡ್ಲು ತನಕ ಸುಮಾರು ಒಂದು ಕಿಲೋಮೀಟರ್ ರಸ್ತೆ ಕಿರಿದಾಗಿದ್ದು, ಬೃಹತ್ ವಾಹನಗಳು ಎದುರಾದಾಗ ಸಂಚಾರವೇ ದುಸ್ತರವಾಗುತ್ತದೆ.

ರಸ್ತೆಯ ಇಕ್ಕೆಲಗಳಲ್ಲಿ ಚರಂಡಿಗಳೂ ಇದ್ದು, ಸೈಡ್ ಕೊಡುವ ಸಂದರ್ಭ ವಾಹನಗಳು ಚರಂಡಿಗೆ ಬೀಳುವ ಅಪಾಯವಿದೆ. ಜತೆಗೆ ಬೃಹತ್ ಗುಂಡಿಗಳೂ ಇದ್ದು, ಇವುಗಳನ್ನು ಮುಚ್ಚುವ ಸಲುವಾಗಿ ಮಣ್ಣು ಸುರಿದಿರುವುದುರಿಂದ ಕೆಸರು ತುಂಬಿಕೊಳ್ಳುತ್ತಿವೆ. ಇದು ಅಪಘಾತಗಳಿಗೂ ಕಾರಣಗಳಾಗುತ್ತಿವೆ.

ರಸ್ತೆಗೆ ವಾಲಿದ ಮರಗಳು

ರಸ್ತೆಗೆ ಹೊಂದಿಕೊಂಡು ಹಲವೆಡೆ ಅಪಾಯಕಾರಿ ಮರಗಳು ವಾಲಿಕೊಂಡಿವೆ. ಇಂತಹ ಮರಗಳ ತೆರವುಗೊಳಿಸುವಂತೆ ಅರಣ್ಯ ಇಲಾಖೆಗೆ ಹಲವು ಬಾರಿ ಮನವಿ ಸಲ್ಲಿಸಿದರೂ ಇದುವರೆಗೆ ಸ್ಪಂದನೆ ದೊರೆತಿಲ್ಲ. ವಾಹನ ಸಂಚರಿಸುವ ಸಂದರ್ಭ ಮರ ಉರುಳಿ ವಾಹನ ಮೇಲೆ ಬೀಳುವ ಅಪಾಯವೂ ಇದೆ.

ಪ್ರತಿಭಟನೆಗೂ ಜಗ್ಗದ ಅಧಿಕಾರಿಗಳು

ಬಡ್ತಾನಬೈಲಿನಿಂದ ಹಾಲಿಕೋಡ್ಲು ರಸ್ತೆಯು ಅರಣ್ಯ ಇಲಾಖೆಗೆ ಸೇರಿದ್ದು, ಅರಣ್ಯ ಇಲಾಖೆಯಿಂದ ರಸ್ತೆ ಅಗಲೀಕರಣಕ್ಕೆ ಅನುಮತಿ ದೊರೆತಿಲ್ಲ. ಈ ಹಿನ್ನೆಲೆಯಲ್ಲಿ ಊರಿನವರು ಜತೆಗೂಡಿ ಪ್ರತಿಭಟನೆ ನಡೆಸಿದ್ದರು. ಬಳಿಕ ಸಂಬಂಧಪಟ್ಟವರು ಅರಣ್ಯ ಇಲಾಖೆಯಿಂದ ನಿರಾಕ್ಷೇಪಣಾ ಪತ್ರ ಪಡೆಯದೇ ಕಾರ್ಯ ಆರಂಭಿಸಿ ಸಮಸ್ಯೆ ತಂದೊಡ್ಡಿದ್ದರು. ಪ್ರಸ್ತುತ ಮತ್ತೊಮ್ಮೆ ಅರಣ್ಯ ಇಲಾಖೆಗೆ ಪತ್ರ ಬರೆಯಲಾಗಿದ್ದು, ನಿರಾಕ್ಷೇಪಣಾ ಪತ್ರಕ್ಕೆ ಮನವಿ ಮಾಡಲಾಗಿದೆ.