ಕ್ಷಮೆ ಕೇಳಲ್ಲ ಎಂದ ಪಾಯಲ್​ ಕೊನೆಗೂ ಮಾಡಿದ್ದೇನು? ಇಲ್ಲಿದೆ ನೋಡಿ ಉತ್ತರ ...

ಮುಂಬೈ: 'ನಾನು ಯಾರಲ್ಲೂ ಕ್ಷಮೆ ಕೇಳಿಲ್ಲ. ಕೇಳೋದೂ ಇಲ್ಲ. ಏಕೆಂದರೆ, ನಾನು ಯಾವ ತಪ್ಪನ್ನೂ ಮಾಡಿಲ್ಲ ...' ಎಂದು ಇತ್ತೀಚೆಗೆ ನಟಿ ಪಾಯಲ್​ ಘೋಶ್​ ಸೋಷಿಯಲ್​ ಮೀಡಿಯಾದಲ್ಲಿ ಘೋಷಿಸಿದ್ದರು. ಹೀಗೆ ಹೇಳಿದ ಮರುದಿನವೇ, ರಿಚಾ ನ್ಯಾಯಾಲಯದ ಆದೇಶವೊಂದನ್ನು ಬಿಡುಗಡೆ ಮಾಡಿದ್ದು ಅದರಲ್ಲಿ ಪಾಯಲ್​ ಕ್ಷಮೆ ಕೇಳಿದ್ದು ನಮೂದಾಗಿದೆ. ಈ ವಿಷಯವನ್ನು ಸೋಷಿಯಲ್​ ಮೀಡಿಯಾದಲ್ಲಿ ಹಂಚಿಕೊಂಡಿರುವ ಅವರು, ತಾನು ಗೆದ್ದೆ ಎಂದು ಖುಷಿಪಟ್ಟಿದ್ದಾರೆ.

ಏನಿದು ಪ್ರಕರಣ ಎಂದು ತಿಳಿದುಕೊಳ್ಳುವುದಕ್ಕೆ ಒಂದು ಸಣ್ಣ ಫ್ಲಾಶ್​ಬ್ಯಾಕ್​ಗೆ ಹೋಗಬೇಕು ಕಳೆದ ತಿಂಗಳಷ್ಟೇ, ನಟ-ನಿರ್ದೇಶಕ ಅನುರಾಗ್​ ಕಶ್ಯಪ್​ ವಿರುದ್ಧ ನಟಿ ಪಾಯಲ್​ ಘೋಶ್​ ಲೈಂಗಿಕ ಕಿರುಕುಳ ಆರೋಪ ಹೊರಿಸಿದ್ದರು. ಈ ಸಂದರ್ಭದಲ್ಲಿ ಅನುರಾಗ್​ ಕಶ್ಯಪ್​ ಖುದ್ದು ತಮ್ಮ ಬಳಿ ತಮಗೆ ನಟಿಯರಾದ ರಿಚಾ ಚಡ್ಢಾ, ಮಾಹಿ ಗಿಲ್​ ಮತ್ತು ಹ್ಯೂಮಾ ಖುರೇಷಿ ಮುಂತಾದವರು ಸಹಕರಿಸಿದ್ದಾಗಿ ಹೇಳಿಕೊಂಡಿದ್ದರು.

ಇದನ್ನೂ ಓದಿ: ಸರ್​ಪ್ರೈಸ್ ಕೊಡ್ತೀನಿ ಎಂದ ಶರಣ್​ ಮಾಡಿದ್ದೇನು?

ಈ ಪ್ರಕರಣದಲ್ಲಿ ತಮ್ಮ ಹೆಸರನ್ನು ಅನಾವಶ್ಯಕವಾಗಿ ತರಲಾಗುತ್ತಿದೆ ಎಂದು ರಿಚಾ ಬೇಸರ ವ್ಯಕ್ತಪಡಿಸುವುದರ ಜತೆಗೆ, ಪಾಯಲ್​ ವಿರುದ್ಧ ಮುಂಬೈ ಹೈಕೋರ್ಟ್​ನಲ್ಲಿ ರಿಚಾ ಮಾನನಷ್ಟ ಮೊಕ್ಕದ್ದಮೆಯನ್ನು ಹೂಡಿದ್ದಾರೆ. ಅಷ್ಟೇ ಅಲ್ಲ, ಈ ಪ್ರಕರಣದಿಂದ ತಮ್ಮ ಮಾನಹಾನಿಯಾಗಿರುವುದರಿಂದ ಒಂದು ಕೋಟಿ 10 ಲಕ್ಷ ರೂಪಾಯಿಗಳನ್ನು ಕಟ್ಟಿಕೊಡಬೇಕು ಎಂದು ಕೇಸ್​ ಹಾಕಿದ್ದಾರೆ.

ಇತ್ತೀಚೆಗೆ ಈ ಪ್ರಕರಣವವು ನ್ಯಾಯಾಲಯದಲ್ಲಿ ವಿಚಾರಣೆಗೆ ಬಂದ ಸಮಯದಲ್ಲಿ, ಪಾಯಲ್​ ಕ್ಷಮೆ ಕೇಳಿದ್ದಾರೆ ಎಂದು ಅವರ ವಕೀಲರು ಹೇಳಿದ್ದಾರೆ ಎಂದು ಸುದ್ದಿಯಾಗಿತ್ತು. ಪಾಯಲ್​ ಅವರು ತಾವು ರಿಚಾ ವಿರುದ್ಧ ನೀಡಿರುವ ಹೇಳಿಕೆಯನ್ನು ಹಿಂಪಡೆಯುವುದಕ್ಕೆ ಸಿದ್ಧರಾಗಿರುವುದರ ಜತೆಗೆ, ಕ್ಷಮೆಯನ್ನೂ ಕೇಳಿದ್ದಾರೆ ಎಂದು ಪಾಯಲ್​ ಪರ ವಕೀಲ ನಿತಿನ್​ ಸಾತ್​ಪುಟೆ ಅವರು ನ್ಯಾಯಾಲಯಕ್ಕೆ ಹೇಳಿದ್ದಾರೆ ಎಂದು ಹೇಳಲಾಗಿತ್ತು.

ಇದನ್ನೂ ಓದಿ: PHOTOS/ VIDEO| KGF-2 ಮೇಕಿಂಗ್​ ಫೋಟೋಗಳು ವೈರಲ್​…

ಆದರೆ, ಇದು ಅಪ್ಪಟ ಸುಳ್ಳು ಎಂದು ಪಾಯಲ್​ ಹೇಳಿದ್ದರು. ಈ ಕುರಿತು ಟ್ವೀಟ್​ ಮಾಡಿರುವ ಅವರು, 'ನಾನು ಕ್ಷಮೆ ಕೇಳಿಲ್ಲ. ನನಗೂ ರಿಚಾಗೂ ಸಂಬಂಧವಿಲ್ಲ. ಕಷ್ಟದಲ್ಲಿರುವಾಗ ಮಹಿಳೆಯರು ಪರಸ್ಪರ ಒಬ್ಬರಿಗೊಬ್ಬರು ಹೆಗಲು ನೀಡಬೇಕು. ನಾನು ರಿಚಾ ವಿರುದ್ಧ ಯಾವುದೇ ಕೆಟ್ಟ ಮಾತೂ ಆಡಿಲ್ಲ. ನನ್ನ ಹೋರಾಟವೇನಿದ್ದರೂ ಅನುರಾಗ್​ ಕಶ್ಯಪ್​ ವಿರುದ್ಧ. ಆತನ ನಿಜವಾದ ಮುಖವನ್ನು ಜಗತ್ತಿಗೆ ತೋರಿಸುವುದಕ್ಕೆ ಹೊರಟಿದ್ದೇನೇ ಹೊರತು ಬೇರೆ ಯಾರ ವಿರುದ್ಧವೂ ಪೈಪೋಟಿ ಮಾಡುವುದಕ್ಕೆ ನನಗೆ ಇಷ್ಟವಿಲ್ಲ' ಎಂದು ಸೋಷಿಯಲ್​ ಮೀಡಿಯಾದಲ್ಲಿ ಬರೆದುಕೊಂಡಿದ್ದರು.

ಇದಕ್ಕೆ ಪ್ರತಿಯಾಗಿ ರಿಚಾ ಇದೀಗ ಕೋರ್ಟ್​ ಆದೇಶವನ್ನು ಬಿಡುಗಡೆ ಮಾಡಿದ್ದು, ಅದರಲ್ಲಿ ಪಾಯಲ್​ ಬೇಷರತ್​ ಕ್ಷಮೆ ಕೇಳಿದ್ದಾರೆ ಎಂದು ನಮೂದಾಗಿದೆ. ಅಷ್ಟೇ ಅಲ್ಲ, ಮುಂದಿನ ದಿನಗಳಲ್ಲಿ ರಿಚಾ ವಿರುದ್ಧ ಏನೂ ಮಾತಾಡುವುದಿಲ್ಲ ಎಂದು ಅವರು ನ್ಯಾಯಾಲಕ್ಕೆ ಹೇಳಿರುವುದು ಸಹ ದಾಖಲಾಗಿದೆ. ಈ ಪ್ರತಿಯನ್ನು ಬಿಡುಗಡೆ ಮಾಡಿರುವ ರಿಚಾ, ಗೆಲುವು ತಮ್ಮದಾಗಿದೆ ಎಂದು ಹೇಳಿಕೊಂಡಿದ್ದಾರೆ.

https://www.vijayavani.net/tharun-sudeer-birthday-celebration/