ದೇವರ ಮೇಲೆ ಆಣೆ ಮಾಡ್ತೀನಿ, ಇದು ಜೋಕ್​ ಅಲ್ಲ ...

ಸೋಷಿಯಲ್​ ಮೀಡಿಯಾದಲ್ಲಿ ಸಖತ್​ ಸಕ್ರಿಯವಾಗಿರುವ ಸೆಲೆಬ್ರಿಟಿಗಳ ಪೈಕಿ ರಾಮ್​ಗೋಪಾಲ್​ ವರ್ಮಾ ಸಹ ಒಬ್ಬರು. ಸದಾ ಒಂದಲ್ಲಾ ಒಂದು ವಿಷಯದ ಕುರಿತಾಗಿ ಮಾತನಾಡುತ್ತಾ, ಹಲವು ಬಾರಿ ಠೀಕೆಗೊಳಗಾಗುತ್ತಾ ಇರುವ ವರ್ಮಾ, ಜನ ತಮ್ಮನ್ನು ಟ್ರೋಲ್​ ಮಾಡುತ್ತಿದ್ದಾರೆ ಎಂದು ಯಾವತ್ತೂ ತಲೆ ಕೆಡಿಸಿಕೊಂಡಿಲ್ಲ. ತಮಗೆ ಅನ್ನಿಸಿದ್ದನ್ನು ನೇರವಾಗಿ ಹೇಳುವ ಅವರು, ಇದೇ ಕಾರಣಕ್ಕೆ ಹಲವರಿಂದ ಮೆಚ್ಚುಗೆ ಗಳಿಸಿದ್ದಾರೆ.

ಇದನ್ನೂ ಓದಿ: ಉಪ್ಪಿಗೆ ಅಭಿಮಾನಿಗಳು ಕಳುಹಿಸಿದ ಮಾಸ್ಕ್​ ಹೀಗಿದೆ ನೋಡಿ …

ಈಗ ವರ್ಮಾ ಮತ್ತೊಮ್ಮೆ ಟ್ರೋಲ್​ಗೊಳಗಾಗಿದ್ದಾರೆ. ಟಾಲಿವುಡ್​ನ ಜನಪ್ರಿಯ ನಟ ನಂದಮೂರಿ ಬಾಲಕೃಷ್ಣ ಅವರ ಅಭಿಮಾನಿಗಳ ಅವಕೃಪೆಗೆ ಪಾತ್ರರಾಗಿದ್ದಾರೆ. ಅದಕ್ಕೆ ಕಾರಣ, ಬಾಲಕೃಷ್ಣ ಅವರ ಕುರಿತಾಗಿ ವರ್ಮಾ ಟ್ವೀಟ್​ ಮಾಡಿರುವುದು. ಇಷ್ಟಕ್ಕೂ ವರ್ಮಾ ಅವರು ಬಾಲಕೃಷ್ಣ ಅವರನ್ನು ಹೊಗಳುತ್ತಿದ್ದಾರಾ ಅಥವಾ ಕಾಲೆಳೆಯುತ್ತಿದ್ದಾರಾ ಎಂಬುದೇ ಹಲವರಿಗೆ ಗೊತ್ತಾಗದಂತಾಗಿದೆ. ಆ ರೀತಿ ಬಹಳ ನಾಜೂಕಾಗಿ ವರ್ಮಾ ಅವರು ಟ್ವೀಟ್​ ಮಾಡಿದ್ದಾರೆ.

ಇಷ್ಟಕ್ಕೂ ಆಗಿದ್ದೇನೆಂದರೆ, ಬಾಲಕೃಷ್ಣ ಅವರು ಇತ್ತೀಚೆಗೊಂದು ಹಾಡನ್ನು ಹಾಡಿ, ಅದನ್ನು ಯೂಟ್ಯೂಬ್​ನ ತಮ್ಮ ಚಾನಲ್​ನಲ್ಲಿ ಬಿಡುಗಡೆ ಮಾಡಿದ್ದಾರೆ. ಎನ್​.ಟಿ.ಆರ್​ ಅಭಿನಯದ ಜಗದೇಕವೀರುನಿ ಕಥಾ ಚಿತ್ರದ ಶಿವಶಂಕರಿ ಶಿವಾನಂದ ಲಹರಿ ಎಂಬ ಜನಪ್ರಿಯ ಹಾಡನ್ನು ಹಾಡುವ ಪ್ರಯತ್ನ ಮಾಡಿದ್ದಾರೆ. ಬಹಳ ಕ್ಲಿಷ್ಟಕರವಾದ ಈ ಹಾಡನ್ನು ಬಾಲಕೃಷ್ಣ ಅವರು ತಮ್ಮದೇ ರೀತಿಯಲ್ಲಿ ಹಾಡಿದ್ದಾರೆ. ಕೆಲವರು ಈ ವಯಸ್ಸಿನಲ್ಲೂ ಬಾಲಕೃಷ್ಣ ಇಂಥದ್ದೊಂದು ಹಾಡು ಹಾಡಿರುವುದು ಬಹಳ ಖುಷಿಯಾಗಿದೆ ಎಂದರೆ, ಇನ್ನೂ ಕೆಲವರು ಚೆಂದದ ಹಾಡನ್ನು ಕೆಟ್ಟದಾಗಿ ಹಾಡುವ ಮೂಲಕ ಅದನ್ನು ಕೆಡಿಸಿರುವುದಷ್ಟೇ ಅಲ್ಲ, ದೊಡ್ಡ ಪಾಪ ಮಾಡಿದ್ದಾರೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: ಅಪ್ಪನ ಜನ್ಮದಿನಕ್ಕೆ ದೀಪಿಕಾ ಪಡುಕೋಣೆ ವಿಶೇಷ ಸಂದೇಶ

ಇದಕ್ಕೆ ಆರ್​ಜಿವಿ ಸಹ ತಮ್ಮದೇ ರೀತಿಯಲ್ಲಿ ವಿಶ್ಲೇಷಣೆ ಮಾಡಿದ್ದಾರೆ. ಇವರು ಹಾಡುವುದನ್ನು ಕೇಳಿದರೆ, ಮೊಹಮ್ಮದ್​ ರಫಿ ಮತ್ತು ಎಸ್​.ಪಿ.ಬಿ ಗಾಯನದಲ್ಲಿ ಜ್ಯೂನಿಯರ್​ಗಳೆಂದನಿಸುತ್ತದೆ. ಈ ಹಾಡು ಕೇಳಿ ಕೇಳುಗರ ಹೃದಯದ ಬಡಿತ ಇನ್ನೂ ಹೆಚ್ಚಾಗುತ್ತದೆ. ಒಥೆಲ್ಲೋನ ಬಲಾಡ್​ ಮತ್ತು ಶಂಕರ ಶಾಸ್ತ್ರಿಗಳು ಜತೆಯಾದರೆ, ಹೇಗಿರುತ್ತದೋ ಹಾಗಿರುತ್ತದೆ ಎಂದು ಆರ್​ಜಿವಿ ಅಭಿಪ್ರಾಯಪಟ್ಟಿದ್ದಾರೆ.

ಆರ್​ಜಿವಿ ಅವರ ಈ ಟ್ವೀಟ್​ ನೋಡಿ, ಬಾಲಕೃಷ್ಣ ಅವರ ಅಭಿಮಾನಿಗಳು ಸಿಟ್ಟಾಗಿದ್ದಾರೆ. ಬಾಲಕೃಷ್ಣ ಅವರ ಗಾಯನದ ಬಗ್ಗೆ ಈ ರೀತಿ ಜೋಕ್​ ಮಾಡುವುದು ತರವಲ್ಲ ಎಂದು ಹೇಳಿದ್ದಾರೆ. ಇದಕ್ಕೆ ಇನ್ನೊಂದು ಟ್ವೀಟ್​ನಲ್ಲಿ ಪ್ರತಿಕ್ರಿಯಿಸಿರುವ ಆರ್​ಜಿವಿ, ಕೆಲವು ಕೆಟ್ಟ ಜನರು ನಾನು ಜೋಕ್​ ಮಾಡುತ್ತಿದ್ದೀನಿ ಅಂದುಕೊಂಡಿದ್ದಾರೆ. ಬಾಲಯ್ಯ (ನಂದಮೂರಿ ಬಾಲಕೃಷ್ಣ) ಮತ್ತು ದೇವರ ಮೇಲೆ ಪ್ರಮಾಣ ಮಾಡಿ ಹೇಳುತ್ತಿದ್ದೀನಿ, ಇದು ಜೋಕ್​. ಸಂಗೀತದ ಅನ್ವೇಷಣೆಯಾದ ಮೇಲೆ, ನಾನು ಕೇಳಿರುವ ಅತ್ಯಂತ ಅದ್ಭುತವಾದ ಹಾಡಿದು. ಬಹುಶಃ ಇದನ್ನು ಕೇಳಿ, ಸ್ವರ್ಗದಲ್ಲಿರುವ ಎನ್​ಟಿಆರ್​ ಖುಷಿಯಿಂದ ಕುಣಿದಾಡುತ್ತಿರಬಹುದು ಎಂದು ಬರೆದುಕೊಂಡಿದ್ದಾರೆ.

ಈಗ ಹೇಳಿ ರಾಮ್​ಗೋಪಾಲ್​ ವರ್ಮಾ ಹೊಗಳ್ತಿದ್ದಾರಾ ಅಥವಾ ಕಾಲೆಳೆಯುತ್ತಿದ್ದಾರಾ ಎಂದು?

https://www.vijayavani.net/will-dhruva-dub-for-chiranjeevis-films/