ಕಟ್ಟಡ ಕಾರ್ಮಿಕರಿಗೆ ಸಂಕಷ್ಟ ಭಾಗ್ಯ! : ಮರಳು, ಕೆಂಪುಕಲ್ಲು ಪೂರೈಕೆ ಸ್ಥಗಿತದ ಪರಿಣಾಮ : ಜಿಲ್ಲಾಡಳಿತದ ನಿರ್ಧಾರಕ್ಕೆ ಭಾರಿ ವಿರೋಧ

ಸಂದೀಪ್ ಸಾಲ್ಯಾನ್ ಬಂಟ್ವಾಳ

ಕೆಂಪು ಕಲ್ಲು ಹಾಗೂ ಮರಳು ಪೂ ರೈಕೆ ಸ್ಥಗಿತಗೊಂಡಿರುವುದು ಕಟ್ಟಡ ಕಾರ್ಮಿಕ ದೈನಂದಿನ ಜೀವನದ ಮೇಲೆ ಭಾರಿ ಹೊಡೆತ ನೀಡಿದ್ದು, ಕಟ್ಟಡ ನಿರ್ಮಾಣ ಕೆಲಸಗಳು ಸ್ಥಗಿತಗೊಂಡಿದ್ದರಿಂದ ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಒಳಗಾಗಿದ್ದಾರೆ.

ಜಿಲ್ಲಾಡಳಿತ ಕೆಂಪು ಕಲ್ಲು ಹಾಗೂ ಪೂರೈಕೆ ಸ್ಥಗಿತ ಮರಳು ಪೂರೈಕೆ ನಿಷೇಧಿಸಿ ಸುಮಾರು ಒಂದೂವರೆ ತಿಂಗಳು ಕಳೆದಿದ್ದು, ಇದನ್ನೇ ಜೀವನಾಧಾರವಾಗಿ ಮಾಡಿಕೊಂಡಿರುವ ಜಿಲ್ಲೆಯೊಳಗಿನ, ಹೊಜಿಲ್ಲೆ ಹಾಗೂ ರಾಜ್ಯದ ಕಾರ್ಮಿಕರು ಕೆಲಸ ಕಳೆದುಕೊಂಡು ಸಂಕಷ್ಟಕ್ಕೆ ಒಳಗಾಗಿದ್ದು, ಕುಟುಂಬ ನಿರ್ವಹಿಸಲಾಗದೆ ಸಾಲದ ಕೂಪಕ್ಕೆ ಬೀಳುತ್ತಿದ್ದಾರೆ.

ಜಿಲ್ಲಾಡಳಿತದ ಈ ನಿರ್ಧಾರ ಕಟ್ಟಡ ಕಾರ್ಮಿಕರ ಹೊರತಾಗಿ ಕ್ಯಾಂಟೀನ್, ಸಣ್ಣ ಹೋಟೆಲ್ ಹಾಗೂ ಹಾರ್ಡ್‌ವೇರ್ ವ್ಯಾಪಾರಿಗಳ ಮೇಲೂ ಹೊಡೆತ ಬಿದ್ದಿದೆ. ಸಣ್ಣ ವ್ಯಾಪಾರಿಗಳ ವ್ಯಾಪಾರದಲ್ಲಿ ಭಾರಿ ಇಳಿಕೆಯಾಗಿದ್ದು, ಕಾರ್ಮಿಕರು ಅಂಗಡಿಗಳಿಗೆ ಬಾರದೆ ಇರುವುದರಿಂದ ವ್ಯಾಪಾರದಲ್ಲಿ ನಷ್ಟವಾಗುತ್ತಿದೆ. ಹಾರ್ಡ್‌ವೇರ್ ಅಂಗಡಿಗಳಲ್ಲಿ ಕಬ್ಬಿಣ, ಸಿಮೆಂಟ್ ವ್ಯಾಪಾರವಾಗದೆ ಇದ್ದು, ಜತೆಗೆ ದಿನಸಿ ಅಂಗಡಿಗಳಲ್ಲೂ ವ್ಯಾಪಾರ ಭಾರಿ ವ್ಯತ್ಯಾಸವಾಗಿದೆ.

ಕರೋನಾ ಅವಧಿಗಿಂತಲೂ ಕಠಿಣ

ಕೆಂಪು ಕಲ್ಲು ಹಾಗೂ ಮರಳು ಪೂರೈಕೆ ನಿರ್ಧಾರದಿಂದ ಸಂಕಷ್ಟಕ್ಕೆ ಒಳಗಾಗಿರುವ ಕಾರ್ಮಿಕರು ಈ ಕುರಿತು ದೊಡ್ಡಮಟ್ಟದಲ್ಲಿ ಅಸಮಾಧಾನ ಹೊರಹಾಕಿದ್ದು, ಕರೋನಾ ಅವಧಿಯಲ್ಲಿ ಎದುರಾಗಿದ್ದ ಸಂಕಷ್ಟಕ್ಕಿಂತಲೂ ಇದು ಭೀಕರವಾಗಿದೆ. ಜಿಲ್ಲಾಡಳಿತ ಅಥವಾ ಸರ್ಕಾರ ಈ ನಿರ್ಧಾರವನ್ನು ಮಾರ್ಪಡುಗೊಳಿಸಬೇಕಿದ್ದು, ಇಲ್ಲದಿದ್ದರೆ ಕಟ್ಟಡ ಕಾರ್ಮಿಕರ ಸಂಘ ಸಹಿತ ವಿವಿಧ ಸಂಘ, ಸಂಸ್ಥೆ ಹಾಗೂ ಸಂಘಟನೆಗಳ ಜತೆಗೂಡಿ ಜಿಲ್ಲೆಯಾದ್ಯಂತ ದೊಡ್ಡಮಟ್ಟದಲ್ಲಿ ಹೋರಾಟ ಸಂಘಟಿಸಬೇಕಾಗುತ್ತದೆ ಎಂದು ಕಾರ್ಮಿಕರು ಎಚ್ಚರಿಕೆ ನೀಡಿದ್ದಾರೆ.

ಯಾರ‌್ಯಾರ ಮೇಲೆ ದುಷ್ಪರಿಣಾಮ?

ಕಟ್ಟಡ ನಿರ್ಮಾಣ ಕಾರ್ಮಿಕರ ಜತೆಗೆ ಸಿವಿಲ್ ಗುತ್ತಿಗೆದಾರರು, ಮೇಸ್ತ್ರಿಗಳು, ಗಾರೆ ಕೆಲಸದವರು, ಟೈಲ್ಸ್ ಗ್ರಾನೈಟ್ ಅಳವಡಿಸುವವರು, ಪ್ಲಂಬರ್‌ಗಳು, ಪೈಂಟರ್‌ಗಳು, ಇಲೆಕ್ಟ್ರೀಷಿಯನ್‌ಗಳು, ಲಾರಿ ಮಾಲೀಕ ಹಾಗೂ ಕಾರ್ಮಿಕರು, ಕಲ್ಲಿನ ಕ್ವಾರಿಯಲ್ಲಿ ಕೆಲಸ ಮಾಡುವವರ ಮೇಲೆ ಭಾರಿ ದುಷ್ಪರಿಣಾಮ ಉಂಟಾಗಿದೆ.

https://www.vijayavani.net/barry-bhavana

https://www.vijayavani.net/congratulations-to-prathibha-kulai