ಕೊಲ್ಕತ್ತಾ: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಬಗ್ಗೆ ಒಂದು ಸಿನಿಮಾ ಆಗುತ್ತಿದೆ ಎಂಬ ವಿಷಯ ಹೊಸದೇನಲ್ಲ. ಕೆಲವು ತಿಂಗಳುಗಳಿಂದ ಇಂಥದ್ದೊಂದು ಸುದ್ದಿ ಕೇಳಿ ಬರುತ್ತಿದ್ದು, ಇದೀಗ ಸೌರವ್ ಗಂಗೂಲಿ ಪಾತ್ರದಲ್ಲಿ ನಟ ರಣಬೀರ್ ಕಪೂರ್ ಕಾಣಿಸಿಕೊಳ್ಳುತ್ತಾರಾ? ಎಂಬ ಪ್ರಶ್ನೆ ಎದುರಾಗಿದೆ.
ಇದನ್ನೂ ಓದಿ: ಬರೀ ರಾಮಾಚಾರಿ ಅಲ್ಲ, ‘ರಾಮಾಚಾರಿ 2.0’; ಇದು ತೇಜ್ ಹೊಸ ಸಿನಿಮಾ
ಇಂಥದ್ದೊಂದು ಪ್ರಶ್ನೆ ಬರುವುದಕ್ಕೂ ಕಾರಣವಿದೆ. ಸದ್ಯದಲ್ಲೇ ಬಿಡುಗಡೆಯಾಗಲಿರುವ ‘ತೂ ಝೂಟಿ ಮೇ ಮಕ್ಕಾರ್’ ಚಿತ್ರದ ಪ್ರಮೋಷನ್ನಲ್ಲಿ ತೊಡಗಿಸಿಕೊಂಡಿರುವ ರಣಬೀರ್ ಕಪೂರ್, ಇತ್ತೀಚೆಗೆ ಕೊಲ್ಕತ್ತಾದ ಎಡನ್ ಗಾರ್ಡನ್ಸ್ನಲ್ಲಿ ಒಟ್ಟಿಗೆ ಕ್ರಿಕೆಟ್ ಆಡಿದ್ದಾರೆ. ಅವರಿಬ್ಬರೂ ಒಟ್ಟಿಗೆ ಕ್ರಿಕೆಟ್ ಆಡಿದ್ದು ಒಂದು ಇವೆಂಟ್ಗಾದರೂ, ಅದು ಹೊರಗಿನವರಿಗೆ ಬೇರೆಯದೇ ಅರ್ಥ ಕಲ್ಪಿಸಿದೆ.
ಪ್ರಮುಖವಾಗಿ, ಸೌರವ್ ಗಂಗೂಲಿ ಕುರಿತು ಬಯೋಪಿಕ್ ಆಗುತ್ತಿರುವ ಬಗ್ಗೆ ಚರ್ಚೆ ಆಗುತ್ತಿದೆ. ಇಂಥ ಸಂದರ್ಭದಲ್ಲಿ ಗಂಗೂಲಿ ಜತೆಗೆ ರಣಬೀರ್ ಸಹ ಕಾಣಿಸಿಕೊಂಡಿರುವುದು, ಆ ಬಯೋಪಿಕ್ನಲ್ಲಿ ಗಂಗೂಲಿ ಪಾತ್ರವನ್ನು ರಣಬೀರ್ ಮಾಡಬಹುದು ಎಂಬ ಅನುಮಾನ ಹುಟ್ಟುಹಾಕಿದೆ.
ಇದನ್ನೂ ಓದಿ: ಬಿಡುಗಡೆಗೂ ಮುನ್ನವೇ 400 ಕೋಟಿ ರೂ. ಬಾಚಿದ ವಿಜಯ್ ಅಭಿನಯದ ‘ಲಿಯೋ’
ಆದರೆ, ಇದನ್ನು ಜಾಸ್ತಿ ಎಳೆಯುವುದಕ್ಕೆ ಇಬ್ಬರೂ ಬಿಟ್ಟಿಲ್ಲ. ಈ ಕುರಿತು ಮಾತನಾಡಿರುವ ರಣಬೀರ್ ಕಪೂರ್. ‘ದಾದಾ ಬರೀ ಭಾರತದಲ್ಲಷ್ಟೇ ಅಲ್ಲ, ಇಡೀ ಜಗತ್ತಿನಲ್ಲಿ ಜನಪ್ರಿಯರು. ಅವರ ಬಗ್ಗೆ ಬಯೋಪಿಕ್ ಆಗುತ್ತಿರುವುದು ಬಹಳ ಖುಷಿಯ ವಿಷಯ. ಆದರೆ, ಅವರ ಪಾತ್ರವನ್ನು ನನಗೆ ಮಾಡಿ ಎಂದು ಯಾರೂ ಕೇಳಿಲ್ಲ. ಬಹುಶಃ ಚಿತ್ರದ ಕಥೆ ಇನ್ನೂ ಸಿದ್ಧವಾಗಿಲ್ಲವೇನೋ ಗೊತ್ತಿಲ್ಲ. ಒಟ್ಟಿನಲ್ಲಿ ಈ ವಿಷಯವಾಗಿ ಯಾರೂ ನನ್ನನ್ನು ಸಂಪರ್ಕಿಸಿಲ್ಲ’ ಎಂದು ಹೇಳುವ ಮೂಲಕ ಹಲವು ಊಹಾಪೋಹಗಳಿಗೆ ಫುಲ್ಸ್ಟಾಪ್ ಹಾಕಿದ್ದಾರೆ.
ಆಂಟಿ ಎಂಬುದು ಇಂದು ಅಶ್ಲೀಲ ಪದವಾಗಿದೆ: ಆಂಟಿ ಟ್ರೆಂಡ್ಗೆ ನಟಿ ಕಸ್ತೂರಿ ಖಡಕ್ ತಿರುಗೇಟು