ಬರೇಲಿಯ ಮಿಷನರಿ ಶಾಲೆಯಲ್ಲಿ ವಿದ್ಯಾರ್ಥಿಗಳ ರಾಖಿಗೆ ಕತ್ತರಿ; ಪೋಷಕರ ಗಲಾಟೆ, ಕ್ಷಮೆಯಾಚಿಸಿದ ಪ್ರಾಂಶುಪಾಲರು

ಬರೇಲಿ: ರಾಖಿ ಹಬ್ಬವನ್ನು ಎಲ್ಲೆಡೆ ಸಡಗರದಿಂದ ಆಚರಿಸಲಾಗುತ್ತಿದ್ದರೆ, ಬರೇಲಿಯ ಮಿಷನರಿ ಶಾಲೆಯೊಂದರಲ್ಲಿ ಬಾಲಕರ ರಾಖಿಯನ್ನು ಕಟ್ ಮಾಡಿಸಲಾಗಿದೆ. ಕ್ರಿಶ್ಚಿಯನ್ ಮಿಷನರಿ ನಡೆಸುತ್ತಿರುವ ಹೋಲಿ ಫ್ಯಾಮಿಲಿ ಕಾನ್ವೆಂಟ್ ಶಾಲೆಯಲ್ಲಿ ರಕ್ಷಾ ಬಂಧನವನ್ನು ಆಚರಿಸುವ ಸಂದರ್ಭದಲ್ಲಿ, ವಿದ್ಯಾರ್ಥಿಗಳ ಕೈಗಳಿಂದ ರಾಖಿಗಳನ್ನು ತೆಗೆಸಲಾಯಿತು.

ಮಂಗಳವಾರ ಮಧ್ಯಾಹ್ನ ಮನೆಗೆ ಬಂದ ವಿದ್ಯಾರ್ಥಿಗಳು ಪೋಷಕರಿಗೆ ಮಾಹಿತಿ ನೀಡಿದಾಗ ಕೋಪಗೊಂಡ ಪೋಷಕರು ಪ್ರತಿಭಟನೆಗೆ ಮುಂದಾದರು. ಹಿಂದೂ ಸಂಘಟನೆಗಳು ಸಹ ಘೋಷಣೆಗಳನ್ನು ಕೂಗಿದವು. ವಿವಾದ ಹೆಚ್ಚುತ್ತಿರುವುದನ್ನು ಕಂಡು ಶಾಲಾ ಆಡಳಿತ ಮಂಡಳಿ ಹಿಂದೆ ಸರಿದಿದೆ. ಕೊನೆಗೆ ಲಿಖಿತವಾಗಿ ಕ್ಷಮೆ ಕೇಳಿದ ಬಳಿಕ, ಕೆಲ ಹುಡುಗ ಹುಡುಗಿಯರನ್ನು ಕರೆಸಿ ರಕ್ಷಾ ಬಂಧನ ಆಚರಿಸಲಾಯಿತು.

ರಾಖಿ ಕಟ್ ಮಾಡಿಸಿದ ಶಿಕ್ಷಕರು
ನಿನ್ನೆ ಮತ್ತು ಇಂದು ದೇಶದಾದ್ಯಂತ ರಕ್ಷಾಬಂಧನ ಹಬ್ಬವನ್ನು ಆಚರಿಸಲಾಗುತ್ತಿದೆ. ಈ ಹಬ್ಬದ ಸಂಭ್ರಮದಲ್ಲಿರುವ ಹಲವು ವಿದ್ಯಾರ್ಥಿನಿಯರು ರಾಖಿಗಳೊಂದಿಗೆ ಮಂಗಳವಾರ ಶಾಲೆಗೆ ಆಗಮಿಸಿದ್ದರು. ತರಗತಿಯಲ್ಲಿ ಕೆಲ ವಿದ್ಯಾರ್ಥಿಗಳು ರಾಖಿ ಕಟ್ಟಿ ಹಬ್ಬ ಆಚರಿಸಿದ್ದಾರೆ. ಆದರೆ ಮಧ್ಯಾಹ್ನದ ವೇಳೆಗೆ ಕೆಲ ಶಿಕ್ಷಕರು ಹಾಗೂ ಇತರೆ ಸಿಬ್ಬಂದಿಗೆ ಈ ವಿಷಯ ತಿಳಿದಾಗ ರಾಖಿ ಕಟ್ಟಿದ ಎಲ್ಲ ವಿದ್ಯಾರ್ಥಿಗಳನ್ನು ಕರೆಸಲಾಯಿತು. ಶಾಲೆಯಲ್ಲಿ ಹಬ್ಬಗಳನ್ನು ಆಚರಿಸುವಂತಿಲ್ಲ ಎಂದು ಹೇಳಿದರು. ಇದಾದ ಬಳಿಕ ಅವರ ಕೈಗೆ ಕಟ್ಟಿದ್ದ ರಾಖಿಯನ್ನು ಕತ್ತರಿಯಿಂದ ಕತ್ತರಿಸಲಾಯಿತು.

ಗದ್ದಲ ಸೃಷ್ಟಿಸಿದ ಹಿಂದೂ ಸಂಘಟನೆಗಳು
ಮಧ್ಯಾಹ್ನದ ವೇಳೆಗೆ ವಿದ್ಯಾರ್ಥಿಗಳು ಮನೆಯಲ್ಲಿ ಘಟನೆಯ ಬಗ್ಗೆ ವಿವರಿಸಿದಾಗ ಪೋಷಕರು ಹಾಗೂ ಹಿಂದೂ ಸಂಘಟನೆಗಳ ಪದಾಧಿಕಾರಿಗಳು ಶಾಲೆಗೆ ಆಗಮಿಸಿದರು. ಹಿಂದೂ ಮಕ್ಕಳನ್ನು ಏಕೆ ಟಾರ್ಗೆಟ್ ಮಾಡಲಾಗುತ್ತಿದೆ ಎಂದು ಡಾ.ಸಂಜಯ್ ಸಕ್ಸೇನಾ ಶಾಲೆಯ ವೈಸ್ ಪ್ರಿನ್ಸಿಪಾಲ್ ಸೋಫಿ ಮರಿಶ್ ವಿರುದ್ಧ ಆಕ್ಷೇಪ ವ್ಯಕ್ತಪಡಿಸಿದರು. ಗಲಾಟೆ ಹೆಚ್ಚುತ್ತಿರುವುದನ್ನು ಕಂಡು ಶಾಲೆಯ ಆಡಳಿತ ಮಂಡಳಿ ಪೊಲೀಸರಿಗೆ ಕರೆ ಮಾಡಿದೆ. ಎರಡು ಗಂಟೆಗಳ ನಂತರ, ವೈಸ್ ಪ್ರಿನ್ಸಿಪಾಲ್ ಸೋಫಿ ಮಾರಿಯಾ ಲಿಖಿತವಾಗಿ ವಿಷಾದ ವ್ಯಕ್ತಪಡಿಸಿದರು. ಮುಂದೆ ಇಂತಹ ಘಟನೆ ಮರುಕಳಿಸುವುದಿಲ್ಲ ಎಂದು ಹೇಳಿದ ನಂತರ ವಿವಾದ ಶಮನವಾಯಿತು.

ದೂರವಾಣಿ ಮೂಲಕ ಕ್ಷಮೆಯಾಚಿಸಿದ ಪ್ರಾಂಶುಪಾಲರು
ಸಂಜೆ ಪ್ರಿನ್ಸಿಪಾಲ್ ಸಿಸ್ಟರ್ ಶಾಲು ಸೆಬಾಸ್ಟಿಯನ್ ಅವರು ರಜೆಯಲ್ಲಿದ್ದಾರೆ ಎಂದು ಫೋನ್‌ನಲ್ಲಿ ತಿಳಿಸಿದರು. ಭಾವನೆಗಳನ್ನು ನೋಯಿಸುವ ಉದ್ದೇಶ ನಮಗಿಲ್ಲ. ಹಬ್ಬಕ್ಕೂ ಮುನ್ನ ರಾಖಿ ಕಟ್ಟಬೇಡಿ ಎಂದು ಶಿಕ್ಷಕರು ಹೇಳಿದ್ದರು ಎಂದರು.

https://www.vijayavani.net/amazon-manager-murder-two-accused-nabbed