'ಸದನ ಬಿಟ್ಟು ಹೋಗಿ'! ಹೇಳಿಕೆ ಪತ್ರ ಹರಿದು ಚೆಲ್ಲಾಡಿದ ಸಂಸದ ಸಸ್ಪೆಂಡ್!

ನವದೆಹಲಿ : ನಿನ್ನೆಯ ರಾಜ್ಯಸಭಾ ಕಲಾಪದ ವೇಳೆಯಲ್ಲಿ ಐಟಿ ಸಚಿವ ಅಶ್ವಿನಿ ವೈಷ್ಣವ್ ಅವರು ಪೆಗಾಸಸ್​ ಬಗ್ಗೆ ಹೇಳಿಕೆ ನೀಡಲು ಹೊರಟಾಗ, ಅಹಿತಕರ ಘಟನೆಯೊಂದು ನಡೆಯಿತು. ಸಚಿವರ ಕೈಯಿಂದ ಪತ್ರವನ್ನು ಕಸಿದ ತೃಣಮೂಲ ಕಾಂಗ್ರೆಸ್ ಸಂಸದ ಡಾ.ಶಂತನು ಸೇನ್​, ಅದನ್ನು ಹರಿದು, ಕಾಗದದ ತುಂಡುಗಳನ್ನು ಪೀಠಾಸೀನರಾಗಿದ್ದ ಡೆಪ್ಯುಟಿ ಚೇರ್​ಮನ್​ ಹರಿವಂಶ್​ ಎನ್​.ಸಿಂಗ್ ಅವರ ಮೇಲಕ್ಕೇ ಚೆಲ್ಲಿದರು.

ಈ ಪ್ರಸಂಗದ ಹಿನ್ನೆಲೆಯಲ್ಲಿ, ರಾಜ್ಯ ಸಂಸದೀಯ ವ್ಯವಹಾರಗಳ ರಾಜ್ಯ ಸಚಿವ ವಿ.ಮುರಳೀಧರನ್ ಅವರು ಇಂದು ಡಾ. ಸೇನ್ ಅವರನ್ನು ಸದನದ ಸೇವೆಯಿಂದ ಸಸ್ಪೆಂಡ್ ಮಾಡಬೇಕೆಂಬ ಪ್ರಸ್ತಾಪ ಮಾಡಿದರು. "ರಾಜ್ಯಸಭಾ ಸದಸ್ಯರು ನಡೆದುಕೊಳ್ಳಬೇಕಾದ ರೀತಿಯನ್ನು ಬಿಟ್ಟು, ದುರ್ವರ್ತನೆ ತೋರಿದ್ದಾರೆ" ಎಂದರು. ಕೆಲವೇ ನಿಮಿಷಗಳಲ್ಲಿ ಈ ಪ್ರಸ್ತಾವನೆ ಅಂಗೀಕರಿಸಲ್ಪಟ್ಟು, ಮುಂಗಾರು ಅಧಿವೇಶನದ ಉಳಿದ ಅವಧಿಗೆ ಡಾ.ಸೇನ್ ಅವರು, ಸದನ ಕಲಾಪಗಳಲ್ಲಿ ಭಾಗವಹಿಸದಂತೆ ಸಸ್ಪೆಂಡ್ ಮಾಡಲಾಯಿತು.

ಇದನ್ನೂ ಓದಿ: ಸದನದ ಬಾವಿಗೆ ನುಗ್ಗಿ ಗದ್ದಲ; ಸಚಿವರ ಕೈಯಿಂದ ಹೇಳಿಕೆ ಪತ್ರ ಕಸಿದ ಟಿಎಂಸಿ ಸಂಸದ!

ಈ ಹಿನ್ನೆಲೆಯಲ್ಲಿ ಚೇರ್​ಮನ್ ಎಂ.ವೆಂಕಯ್ಯ ನಾಯ್ಡು ಅವರು, ಸಂಸದ ಡಾ.ಸೇನ್ ಅವರಿಗೆ "ಸದನ ಬಿಟ್ಟು ಹೋಗಿ" ಎಂದು ಮನವಿ ಮಾಡಿದರು. ತೃಣಮೂಲ ಕಾಂಗ್ರೆಸ್​ನ ಇತರ ಸಂಸದರು ಎಬ್ಬಿಸಿದ ಗದ್ದಲದಿಂದಾಗಿ ರಾಜ್ಯಸಭಾ ಕಲಾಪವನ್ನು ಮುಂದೂಡಲಾಯಿತು. (ಏಜೆನ್ಸೀಸ್)

https://www.vijayavani.net/change-of-cm-during-floods-unfortunate-says-hdk/

https://www.vijayavani.net/video-navjot-singh-sidhus-batting-in-punjab/