ಜನ ಸಾಮಾನ್ಯರಿಗೆ ಮತ್ತೆ ದರ ಏರಿಕೆ ಬರೆ​: ಗೃಹಬಳಕೆಯ LPG ಸಿಲಿಂಡರ್​ ಬೆಲೆಯಲ್ಲಿ 50 ರೂ. ಹೆಚ್ಚಳ

ನವದೆಹಲಿ: ಈಗಾಗಲೇ ಪೆಟ್ರೋಲ್‌, ಡೀಸೆಲ್‌ ಬೆಲೆ ಏರಿಕೆಯಿಂದ ತತ್ತರಿಸಿ ಹೋಗಿರುವ ಜನರಿಗೆ ಮತ್ತೊಮ್ಮೆ ದರ ಏರಿಕೆ ಬರೆ ಬಿದ್ದಿದೆ. ಈಗಾಗಲೇ ಸಾವಿರ ರೂಪಾಯಿ ಗಡಿ ದಾಟಿ ಬಡ ಜನರಿಗೆ ಗಗನಕುಸುಮವಾಗಿರುವ ಗೃಹಬಳಕೆಯ ಎಲ್​ಪಿಜಿ ಸಿಲಿಂಡರ್​ ಬೆಲೆಯಲ್ಲಿ ಮತ್ತೆ ಏರಿಕೆಯಾಗಿದ್ದು, ಸಾಮಾನ್ಯ ಜನರ ಜೇಬಿಗೆ ಮತ್ತಷ್ಟು ಕತ್ತರಿ ಬಿದ್ದಿದೆ.

ಪೆಟ್ರೋಲಿಯಂ ಕಂಪನಿಗಳು ಇಂದು ಎಲ್​ಪಿಜಿ ದರ ಪರಿಷ್ಕರಣೆ ಮಾಡಿದ್ದು, 14.2 ಕೆಜಿಯ ಗೃಹಬಳಕೆಯ ಎಲ್​ಪಿಜಿ ಸಿಲಿಂಡರ್​ ಬೆಲೆಯಲ್ಲಿ 50 ರೂಪಾಯಿ ಏರಿಕೆ ಮಾಡಿದೆ. ದೆಹಲಿಯಲ್ಲಿ ಈ ಹಿಂದೆ 1003 ರೂಪಾಯಿ ಇದ್ದ ಸಿಲಿಂಡರ್​ ಬೆಲೆ ಇದೀಗ 1053 ರೂ. ಗೆ ಏರಿಕೆಯಾಗಿದೆ.

ಮುಂಬೈನಲ್ಲಿ 1052, ಕೊಲ್ಕತ್ತಾದಲ್ಲಿ 1079, ಚೆನ್ನೈನಲ್ಲಿ 1068 ಮತ್ತು ಬೆಂಗಳೂರಿನಲ್ಲಿ 1055 ರೂಪಾಯಿಗೆ ಬೆಲೆ ಏರಿಕೆಯಾಗಿದೆ.

ಗ್ಯಾಸ್​ ಏಜೆನ್ಸಿಗಳು ಸಿಲಿಂಡರ್​ ಅನ್ನು ಮನೆ ಸಾಗಿಸಲು ಹಲವೆಡೆ ಹೆಚ್ಚುವರಿಯಾಗಿ 50 ರೂಪಾಯಿ ತೆಗೆದುಕೊಳ್ಳುತ್ತಿದೆ. ಕೇಂದ್ರ ಸರ್ಕಾರ ಸಿಲಿಂಡರ್​ ಡಿಲಿವರಿಗೆ ಹಣ ಕೊಡಬೇಡಿ ಎಂದು ಹೇಳಿದರೂ, ಡಿಲಿವರಿ ಮಾಡುವವರು ಹಣ ಪಡೆಯುತ್ತಿದ್ದಾರೆ. ಇದರಿಂದ ಒಂದು ಸಿಲಿಂಡರ್​ಗೆ ಬರೋಬ್ಬರಿ 1100 ಆಗಲಿದ್ದು, ನಿಜಕ್ಕೂ ಇದು ಜನ ಸಾಮಾನ್ಯರಿಗೆ ಭಾರಿ ಹೊರೆಯಾಗಿದೆ.

ಗೃಹಬಳಕೆಯ 5 ಕೆಜಿ ಸಿಲಿಂಡರ್​ ಬೆಲೆಯಲ್ಲೂ ಪೆಟ್ರೋಲಿಯಂ ಕಂಪನಿಗಳು 18 ರೂಪಾಯಿ ಏರಿಕೆ ಮಾಡಿವೆ. ಆದರೆ, ವಾಣಿಜ್ಯ ಬಳಕೆಯ 19 ಕೆಜಿ ಸಿಲಿಂಡರ್​ ಬೆಲೆಯಲ್ಲಿ ಕೇವಲ 8.50 ರೂಪಾಯಿಯನ್ನು ಇಳಿಸಿದೆ.

14.2 ಕೆಜಿ ಗೃಹಬಳಕೆಯ LPG ಸಿಲಿಂಡರ್ ದರವನ್ನು ಕೊನೆಯದಾಗಿ 2022ರ ಮೇ 19ರಂದು 4 ರೂ. ಹೆಚ್ಚಿಸಲಾಗಿತ್ತು. (ಏಜೆನ್ಸೀಸ್​)

https://www.vijayavani.net/r-saral-vastu-chandrashekhar-guruji-murder-case-accused-mahantesh-wife-vanajakshi-reaction/

https://www.vijayavani.net/saral-vastu-chandrashekhar-guruji-death-hubli-saral-jeevan-hubballi-hotel-hubballi-police/

https://www.vijayavani.net/r-britain-rishi-sunak-health-minister-quit-in-huge-crisis-for-boris-johnson/