ಕಡಿಮೆ ದರದಲ್ಲಿ ಗುಣಮಟ್ಟದ ಸೇವೆ

ವಿಜಯವಾಣಿ ಸುದ್ದಿಜಾಲ ಕುಂದಾಪುರ

ಕುಂದಾಪುರ ಭಾಗಕ್ಕೆ ಬರುವ ಪ್ರವಾಸಿಗರು ಹೆಚ್ಚಾಗಿ ಮೀನು ಊಟಕ್ಕೆ, ಮೀನಿನ ಖಾದ್ಯ ಇಷ್ಟಪಡುತ್ತಾರೆ. ಕುಂದಾಪುರ ಪರಿಸರದಲ್ಲಿ ಅತಿ ಕಡಿಮೆ ದರದಲ್ಲಿ ಗುಣಮಟ್ಟದ ಮೀನು ಊಟ ಹಾಗೂ ಮೀನಿನ ಖಾದ್ಯ ದೊರೆಯುವ ಹೋಟೆಲ್‌ಗಳು ಕಡಿಮೆ ಇದೆ. ಉತ್ತಮ ಮೀನು ಊಟ ಜನರು ಹುಡುಕಿಕೊಂಡು ಹೋಗುತ್ತಿದ್ದಾರೆ ಎಂದು ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಕೆ.ಬಾಬು ಶೆಟ್ಟಿ ಹೇಳಿದರು.

ಕೋಟೇಶ್ವರ ಅಂಕದಕಟ್ಟೆಯಲ್ಲಿ ರಾಷ್ಟ್ರೀಯ ಹೆದ್ದಾರಿ 66ರ ಸಮೀಪದ ಸಹನಾ ಎಸ್ಟೇಟ್‌ನಲ್ಲಿ ಸಹನಾ ಗ್ರೂಪ್‌ನ ಸಹನಾಸ್ ಫಿಶ್ ನ್ ಕರಿ ರೆಸ್ಟೋರೆಂಟ್ ಗುರುವಾರ ಉದ್ಘಾಟಿಸಿ ಮಾತನಾಡಿದರು.

ಕುಂದಾಪುರದಲ್ಲಿ 10 ವರ್ಷಗಳಿಂದ ಹೋಟೆಲ್ ಉದ್ಯಮದಲ್ಲಿ ಯಶಸ್ಸು ಗಳಿಸಿ ಪ್ರಸಿದ್ಧಿಯಾಗಿರುವ ಸುರೇಂದ್ರ ಶೆಟ್ಟಿ ನೇತೃತ್ವದ ಸಹನಾ ಗ್ರೂಪ್ ಸಂಸ್ಥೆ, ಕುಂದಾಪುರ ಕೋಟೇಶ್ವರ ಪರಿಸರದಲ್ಲಿ ಇನ್ನೊಂದು ಮೀನು ಖಾದ್ಯಗಳ ಹೊಸ ಫಿಶ್ ನ್ ಕರಿ ರೆಸ್ಟೋರೆಂಟ್ ಪ್ರಾರಂಭಿಸುತ್ತಿರುವುದು ಶ್ಲಾಘನೀಯ ಎಂದರು.

ಮುಖ್ಯ ಅತಿಥಿಯಾಗಿದ್ದ ಕೋಟೇಶ್ವರ ಗ್ರಾಪಂ ಅಧ್ಯಕ್ಷೆ ರಾಗಿಣಿ ದೇವಾಡಿಗ ಶುಭಾಶಂಸನೆಗೈದರು. ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನ ವ್ಯವಸ್ಥಾಪನಾ ಸಮಿತಿ ಸದಸ್ಯ ರಘುರಾಮ ದೇವಾಡಿಗ, ಮಾರ್ಕೋಡು ಸುಧೀರ್ ಕುಮಾರ್ ಶೆಟ್ಟಿ, ಸಹನಾ ಗ್ರೂಪ್ ಆಡಳಿತ ನಿರ್ದೇಶಕಿ ಸಹನಾ ಎಸ್.ಶೆಟ್ಟಿ ಮೊದಲಾದವರು par ಉಪಸ್ಥಿತರಿದ್ದರು.