ಹೆಣ್ಣು ಮಕ್ಕಳಿಗೂ ಕಸೂತಿ ಕಲೆಗೂ ಅವಿನಾಭಾವ ನಂಟು. ಕಸೂತಿ ಕೆಲಸದಲ್ಲೇ ಬದುಕು ರೂಪಿಸಿಕೊಂಡ ಗಂಡು ಮಕ್ಕಳ ಸಂಖ್ಯೆಗೇನೂ ಕೊರತೆ ಇಲ್ಲ. ಕೆಲ ಶಾಲೆಗಳಲ್ಲಿ ಎಂಬ್ರಾಯಿಡರಿ ಬಗ್ಗೆಯೂ ಹೇಳಿ ಕೊಡಲಾಗುತ್ತಿದೆ. ಮಕ್ಕಳೇ ನಿಮ್ಮ ಕರವಸ್ತ್ರ, ಅಂಗಿಯ ಜೇಬಿಗೊಂದು ಚಂದದ ಚಿತ್ತಾರ, ಹೆಣ್ಮಕ್ಕಳ ದಾವಣಿ ಅಂಚಿಗೂ ಎಂಬ್ರಾಯಿಡರಿ ಮಾಡಬಹುದು. ಕಸೂತಿ ಕಲೆಗಳ ಬಗ್ಗೆ ಇಂಟರ್ನೆಟ್ ಮೂಲಕವೇ ತಿಳಿದುಕೊಳ್ಳಬಹುದು. ಅಮ್ಮನೋ, ಪಕ್ಕದ ಮನೆ ಆಂಟಿಯೋ ಟೈಲರಿಂಗ್ ಮಾಡುವಾಗ ಕೂತು ಗಮನಿಸಿ. ಮಣಿ, ದಾರ, ತಂತಿ, ಬಣ್ಣದ ಕಾಗದ... ಇತ್ಯಾದಿ ಬಳಸಿ ಬಳೆ, ಸರ, ಕಿವಿಯೋಲೆ ತಯಾರಿಸಿ ಸೋದರ-ಸೋದರಿಯರಿಗೆ ಉಡುಗೊರೆ ಕೊಡಿ. ಹೇಗಿದ್ದರೂ ಶಾಲೆಗೆ ರಜೆ ಇದೆ. ಕರೊನಾ ಅಂತ ಮನೆಯಲ್ಲೇ ಇದ್ದೀರಿ. ಇದು ಒಳ್ಳೆಯ ಅವಕಾಶ. ಸ್ವೆಟರ್, ಬ್ಯಾಗ್, ಕೈ ಚೀಲ ಹೆಣೆಯೋದನ್ನೂ ಕಲಿಯಬಹುದು.
