ಪಬ್​ಜಿ ಗೇಮ್​ ಬ್ಯಾನ್​: ಟೆನ್ಸೆಂಟ್ ಕಂಪನಿಗಾದ ನಷ್ಟವೆಷ್ಟು ಗೊತ್ತಾ?

ಭಾರತದಲ್ಲಿ ಪಬ್​ಜಿ ಗೇಮ್​ಗೆ ಕೇಂದ್ರ ಸರ್ಕಾರ ನಿಷೇಧ ವಿಧಿಸಿರುವುದರಿಂದಾಗಿ ಪಬ್​ಜಿ ಒಡೆತನದ ಚೀನಾದ ಟೆನ್ಸೆಂಟ್ ಹೋಲ್ಡಿಂಗ್ಸ್ ಲಿಮಿಟೆಡ್ ಕಂಪನಿ ತನ್ನ ಮಾರುಕಟ್ಟೆ ಮೌಲ್ಯದಲ್ಲಿ 14 ಬಿಲಿಯನ್ ಡಾಲರ್ (ಸುಮಾರು 1 ಲಕ್ಷ ಕೋಟಿ ರೂ.) ನಷ್ಟ ಅನುಭವಿಸಿದೆ.

ಗುರುವಾರ ಷೇರುಪೇಟೆ ವಹಿವಾಟಿನಲ್ಲಿ ಟೆನ್ಸೆಂಟ್ ಷೇರುಗಳ ಮೌಲ್ಯ ಶೇ. 2 ಕುಸಿತ ಕಂಡಿದೆ. ಇದಕ್ಕೂ ಮೊದಲು ಎರಡು ವಹಿವಾಟು ದಿನಗಳಲ್ಲಿ ಟೆನ್ಸೆಂಟ್ ಷೇರುಗಳ ಮೌಲ್ಯ ಸತತವಾಗಿ ಏರಿಕೆ ಕಂಡಿತ್ತು.

ಚೀನಾ ಆಪ್​ಗಳು ಭದ್ರತೆಗೆ ಮಾರಕ

ನಿಷೇಧಿತ 118 ಅಪ್ಲಿಕೇಷನ್​ಗಳು ದೇಶದ ಭದ್ರತೆಗೆ ಮಾರಕವಾಗಿದ್ದವು ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಅನುರಾಗ್ ]ೕವಾಸ್ತವ್ ಹೇಳಿದ್ದಾರೆ. ಇಂಟರ್​ನೆಟ್ ಮತ್ತು ಡಿಜಿಟಲ್ ತಂತ್ರಜ್ಞಾನ ಕಂಪನಿಗಳನ್ನು ಒಳಗೊಂಡಂತೆ ವಿದೇಶಿ ನೇರ ಹೂಡಿಕೆಗೆ (ಎಫ್​ಡಿಐ) ಭಾರತವು ಅತ್ಯಂತ ಮುಕ್ತ ಆಡಳಿತ ಹೊಂದಿದೆ. ಆದರೆ ಕೇಂದ್ರ ಹೊರಡಿಸಿದ ನಿಯಮಗಳನ್ನು ಪಾಲಿಸಬೇಕಾದ ಜವಾಬ್ದಾರಿ ಕಂಪನಿಗಳ ಮೇಲಿದೆ.

ನಾವು ಎಲ್ಲ ಕಂಪನಿಗಳನ್ನು ಸ್ವಾಗತಿಸುತ್ತೇವೆ. ಆದರೆ ಅವುಗಳು ನಮ್ಮ ನಿಯಮಗಳನ್ನು ಒಪ್ಪಿಕೊಳ್ಳಬೇಕು. ಭಾರತದ ಸಾರ್ವಭೌಮತ್ವ, ಸಮಗ್ರತೆ ಹಾಗೂ ಸುರಕ್ಷತೆಗೆ ಧಕ್ಕೆ ತರುವ ಚಟುವಟಿಕೆಗಳಲ್ಲಿ ತೊಡಗಿದ್ದ ಕಾರಣ ಈ ಆಪ್​ಗಳನ್ನು ನಿಷೇಧಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.