ಜೆನ್ಝಿ ಪ್ರತಿಭಟನೆಯ ತೀವ್ರತೆಗೆ ಪ್ರಧಾನಿ ಕೆ.ಪಿ. ಶರ್ಮ ಓಲಿ ತಮ್ಮ ಹುದ್ದೆಗೆ ರಾಜೀನಾಮೆ ಘೋಷಿಸುವ ಮೂಲಕ ಹಿಂದೆ ಸರಿದರು. ಇದು ಸರ್ಕಾರ ಪತನಕ್ಕೆ ಕಾರಣವಾಗಿದೆ. ಪ್ರತಿಭಟನಾಕಾರರ ಮೇಲೆ ಪೊಲೀಸರು ನಡೆಸಿದ ದಮನ ಕಾರ್ಯಾಚರಣೆಯಲ್ಲಿ ಕನಿಷ್ಠ 31 ಮಂದಿ ಸಾವನ್ನಪ್ಪಿದ್ದು, 1,000ಕ್ಕೂ ಅಧಿಕ ಜನರು ಗಾಯಗೊಂಡಿದ್ದಾರೆ. ಯುವಜನತೆಯ ಆಕ್ರೋಶದ ಕಿಚ್ಚಿಗೆ ನೇಪಾಳದ ಸರ್ಕಾರಿ ಕಟ್ಟಡಗಳು, ಹಿರಿಯ ರಾಜಕಾರಣಿಗಳ ಖಾಸಗಿ ನಿವಾಸಗಳು ಮತ್ತು ಪ್ರವಾಸಿ ಕೇಂದ್ರಗಳಲ್ಲಿರುವ ಹೋಟೆಲ್ಗಳು ಸಹ ಬೆಂಕಿಗೆ ಆಹುತಿಯಾಗಿವೆ. ನೇಪಾಳದ ಸಂಸತ್ತು ಬೆಂಕಿಯಲ್ಲಿ ಸುಟ್ಟು ಕರಕಲಾಗಿದೆ. ಇಂದು, ದೇಶವು ಕಾರ್ಯನಿರ್ವಹಿಸುವ ಸರ್ಕಾರವಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದು, ಕರ್ಫ್ಯೂ ವಿಧಿಸಲು ಮತ್ತು ಪ್ರತಿಭಟನಾಕಾರರೊಂದಿಗೆ ಮಾತುಕತೆ ನಡೆಸಲು ಸ್ವತಃ ಸೇನೆಯೇ ಮಧ್ಯಪ್ರವೇಶಿಸಿದೆ.
