ಕೇಂದ್ರ ಯುವಜನ ಸೇವೆ ಹಾಗೂ ಕ್ರೀಡಾ ಸಚಿವಾಲಯ ಪ್ರತಿ ವರ್ಷ ಒಂದೊಂದು ರಾಜ್ಯದಲ್ಲಿ ಆಯಾ ರಾಜ್ಯ ಸರ್ಕಾರಗಳ ಸಹಕಾರದೊಂದಿಗೆ ರಾಷ್ಟ್ರೀಯ ಯುವ ಜನೋತ್ಸವ ಆಯೋಜಿಸುತ್ತಿದೆ. 2014ರಲ್ಲಿ ಮೋದಿ ಪ್ರಧಾನಿಯಾದ ಬಳಿಕ ಈ ಉತ್ಸವ 5 ದಿನಗಳಿಗೆ ವಿಸ್ತಾರಗೊಂಡಿದೆ. 25ನೇ ರಾಷ್ಟ್ರೀಯ ಯುವ ಜನೋತ್ಸವ ಪುದುಚೇರಿಯಲ್ಲಿ ನಡೆದಿದ್ದರೆ, 26ನೇ ಉತ್ಸವಕ್ಕೆ ಹುಬ್ಬಳ್ಳಿ- ಧಾರವಾಡಕ್ಕೆ ಆತಿಥ್ಯ ವಹಿಸುವ ಅವಕಾಶ ಸಿಕ್ಕಿದೆ. ರಾಷ್ಟ್ರಮಟ್ಟದ ಉತ್ಸವದಿಂದ ವಿದ್ಯಾಕಾಶಿಯಲ್ಲಿ ಯುವಕರ ಕಲರವ ಹೆಚ್ಚಾಗಿದೆ. 5 ದಿನಗಳ ಕಾಲ ಸಾಹಸ ಕ್ರೀಡೆ, ದೇಸಿ ಕ್ರೀಡೆಗಳು, ಸಾಂಸ್ಕೃತಿಕ ಕಾರ್ಯಕ್ರಮಗಳ ಜತೆಗೆ ಕೌಶಲ ಬೆಳೆಸಿಕೊಳ್ಳಲು ಒಂದಿಷ್ಟು ಚಿಂತನೆ ನಡೆಸಲು ಸದಾವಕಾಶ ಸಿಕ್ಕಂತಾಗಿದೆ.
