60 ವರ್ಷಗಳ ಪ್ರಯಾಣ ಕೊನೆಗೊಳಿಸಿದ ಮುಂಬೈನ ಹೆಮ್ಮೆ, ಆ ಸುಂದರ 'ಪ್ರೀಮಿಯರ್ ಪದ್ಮಿನಿ' ಟ್ಯಾಕ್ಸಿ; ಯಾಕೆ ಗೊತ್ತಾ?

ಮುಂಬೈ: ಬಾಂಬೆ ಕನಸಿನ ನಗರ. ಬಾಂಬೆ ವಿಚಾರಕ್ಕೆ ಬಂದರೆ ನಿಮ್ಮ ಕಣ್ಣ ಮುಂದೆ ಬರುವ ಮೊದಲ ಚಿತ್ರ ಯಾವುದು? ತಾಜ್ ಹೋಟೆಲ್, ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್, ಗೇಟ್‌ವೇ ಆಫ್ ಇಂಡಿಯಾ ಅಥವಾ ಮೆರೈನ್ ಡ್ರೈವ್. ಆದರೆ ಇದು ಇಲ್ಲಿಗೆ ಮುಗಿಯುವುದಿಲ್ಲ. ಏನೋ ಕಾಣೆಯಾದಂತೆ ಅನಿಸುತ್ತದೆ ಅಲ್ಲವೇ. ಹೌದು, ಅದು ಬಾಂಬೆಯ ಕಪ್ಪು ಮತ್ತು ಹಳದಿ ಟ್ಯಾಕ್ಸಿ.

ಈ ಐಕಾನಿಕ್ ಕಾರು ದಶಕಗಳಿಂದ ಬಾಂಬೆಯ ಗುರುತಾಗಿದೆ. ಬಾಂಬೆಗೆ ಹೋಗದವರು ಈ ಟ್ಯಾಕ್ಸಿಯನ್ನು ಬಾಲಿವುಡ್ ಚಿತ್ರಗಳಲ್ಲಿ ಹೆಚ್ಚಾಗಿ ನೋಡಿರಬೇಕು. ಆದರೆ ಇಂದಿನಿಂದ ಈ ಕಪ್ಪು ಮತ್ತು ಹಳದಿ ಟ್ಯಾಕ್ಸಿಗಳು ಬಾಂಬೆ ಅಂದರೆ ಮುಂಬೈನ ರಸ್ತೆಗಳಲ್ಲಿ ಕಾಣಿಸುವುದಿಲ್ಲ. ಈ ಟ್ಯಾಕ್ಸಿಯ 60 ವರ್ಷಗಳ ಪ್ರಯಾಣ ಭಾನುವಾರ ಕೊನೆಗೊಂಡಿತು.

1964 ರಲ್ಲಿ ಟ್ಯಾಕ್ಸಿ ಸೇವೆ ಪ್ರಾರಂಭ 

ಮುಂಬೈನಲ್ಲಿ ಹಳೆಯ ಡಬಲ್ ಡೆಕ್ಕರ್ ಬಸ್ ಸೇವೆ ನಿವೃತ್ತಿಯ ನಂತರ, ಈಗ ಕಪ್ಪು ಮತ್ತು ಹಳದಿ ಟ್ಯಾಕ್ಸಿಗಳು ಮುಂಬೈನ ಬೀದಿಗಳಿಂದ ಕಣ್ಮರೆಯಾಗಲಿವೆ. ಅಕ್ಟೋಬರ್ 30 ರಿಂದ (ಸೋಮವಾರ), ಕಪ್ಪು ಮತ್ತು ಹಳದಿ ಟ್ಯಾಕ್ಸಿಗಳು ಮುಂಬೈನ ರಸ್ತೆಗಳಲ್ಲಿ ಕಾಣಿಸುವುದಿಲ್ಲ. ಈ ಟ್ಯಾಕ್ಸಿ ಐದು ದಶಕಗಳಿಗೂ ಹೆಚ್ಚು ಕಾಲ ಮುಂಬೈನ ಬೀದಿಗಳಲ್ಲಿ ಸಂಚರಿಸುತ್ತಿದೆ. ಈ ಟ್ಯಾಕ್ಸಿ ಪ್ರಕಾರವು 1964 ರಲ್ಲಿ ಟ್ಯಾಕ್ಸಿ ಸೇವೆಯನ್ನು ಪ್ರಾರಂಭಿಸಿದ್ದರಿಂದ ಮುಂಬೈನ ಹೆಮ್ಮೆಯಾಗಿದೆ. ಈ ಟ್ಯಾಕ್ಸಿ ಉತ್ಪಾದನೆಯನ್ನು 2001 ರಲ್ಲಿ ನಿಲ್ಲಿಸಲಾಯಿತು.

ನಿಲ್ಲಿಸಲು ನಿರ್ಧಾರವೇನು?

ಹೊಸ ಮಾಡೆಲ್ ಮತ್ತು ಆನ್‌ಲೈನ್ ಕ್ಯಾಬ್ ಸೇವೆಗಳ ಕಾರಣ, ಈ ಕಪ್ಪು ಮತ್ತು ಹಳದಿ ಟ್ಯಾಕ್ಸಿಯನ್ನು ನಿಲ್ಲಿಸಲು ನಿರ್ಧರಿಸಲಾಗಿದೆ. ಹೌದು, ಹೊಸ ಮಾದರಿಯ ಕಪ್ಪು ಮತ್ತು ಹಳದಿ ಟ್ಯಾಕ್ಸಿಗಳು ಮುಂಬೈನ ಬೀದಿಗಳಲ್ಲಿ ಓಡುತ್ತವೆ. ಅಂದಹಾಗೆ ಅಕ್ಟೋಬರ್ 2023 ರಲ್ಲಿ, ಪ್ರಸಿದ್ಧ ಡಬಲ್ ಡೆಕ್ಕರ್ ಬಸ್ ನೀಲಾಂಬರಿಯ ಸೇವೆಯನ್ನು ಸ್ಥಗಿತಗೊಳಿಸಲಾಯಿತು. ಪ್ರವಾಸಿಗರಿಗೆ ನಿರಂತರ ಆಕರ್ಷಣೆಯಾಗಿರುವ ಮುಂಬೈ (ನೀಲಾಂಬರಿ)ಯ ಈ ಹವಾನಿಯಂತ್ರಿತವಲ್ಲದ ತೆರೆದ ಡಬಲ್ ಡೆಕ್ಕರ್ ಬಸ್ 2023 ರ ಗುರುವಾರ (ಅ.5) ಕೊನೆಯ ಬಾರಿಗೆ ಓಡಾಡಿತು.

ಅ.29 ರಂದು ನೋಂದಾಯಿಸಲಾದ ಕೊನೆಯ ಕಾರು

ಪ್ರೀಮಿಯರ್ ಪದ್ಮಿನಿ ಎಂದು ಜನಪ್ರಿಯವಾಗಿರುವ ಕಪ್ಪು-ಹಳದಿ ಟ್ಯಾಕ್ಸಿಗೆ ಭಾನುವಾರ ಕೊನೆಯ ದಿನವಾಗಿತ್ತು. ಸಾರಿಗೆ ಇಲಾಖೆಯ ಪ್ರಕಾರ, ಕೊನೆಯ ಪದ್ಮಿನಿ ಕಾರನ್ನು 29 ಅಕ್ಟೋಬರ್ 2003 ರಂದು ನೋಂದಾಯಿಸಲಾಗಿದೆ. ಮುಂಬೈನಲ್ಲಿ ಟ್ಯಾಕ್ಸಿಗಳ ವಯಸ್ಸಿನ ಮಿತಿಯನ್ನು 20 ವರ್ಷಗಳಿಗೆ ನಿಗದಿಪಡಿಸಲಾಗಿದೆ. ಅದರಂತೆ ಭಾನುವಾರ ಮುಂಬೈನಲ್ಲಿ ಈ ಟ್ಯಾಕ್ಸಿಗಳ ಜೀವನ ಅಂತ್ಯಗೊಂಡಿದೆ. ಇಂದಿನಿಂದ ನೀವು ಮುಂಬೈನ ಬೀದಿಗಳಲ್ಲಿ ಕಪ್ಪು ಮತ್ತು ಹಳದಿ ಟ್ಯಾಕ್ಸಿಗಳನ್ನು ನೋಡುವುದಿಲ್ಲ.

https://www.vijayavani.net/mumbais-iconic-kaali-peeli-padmini-taxis-to-go-off-roads-after-6-decades