ಶಿಸ್ತು, ಸಂಸ್ಕಾರ ಸಾಧನೆಗೆ ಮೆಟ್ಟಿಲು: ನನಗೆ ತಾಯಿಯೇ ಮೊದಲ ಗುರು. ಅವರು ಕೊಟ್ಟ ಸಂಸ್ಕಾರದಿಂದ ನಾನು ಈ ಎತ್ತರಕ್ಕೆ ಬೆಳೆಯಲು ಸಾಧ್ಯವಾಯಿತು ಎಂದು ವಾಣಿ ಸಂಕೇಶ್ವರ ಹೇಳಿದರು. ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಅವರು, ಹಾಸ್ಟೆಲ್ನಲ್ಲಿ ಕಲಿತ ನನಗೆ ಮನೆಗೆ ಬಂದಾಗ ಸಂಪ್ರದಾಯಕ್ಕೆ ಒಗ್ಗಿಕೊಳ್ಳುವುದು ಆರಂಭದಲ್ಲಿ ಕಷ್ಟವಾಯಿತು. ಆದರೆ, ತಾಯಿ ನನಗೆ ಉತ್ತಮ ಸಂಸ್ಕಾರ ಕಲಿಸಿಕೊಟ್ಟರು. ಚಿಕ್ಕ ವಯಸ್ಸಿಗೆ ವಿವಾಹವಾದ ನಾನು ಸೊಸೆಯಾಗಿ ಅತ್ತೆ-ಮಾವ, ಪತಿ, ಕುಟುಂಬಸ್ಥರಿಂದ ಶಿಸ್ತು, ಸಂಸ್ಕಾರ ಕಲಿತೆ. ನನ್ನ ಮೂವರು ಮಕ್ಕಳಿಗೂ ಅದನ್ನೇ ಕಲಿಸಿರುವೆ. ಹಾಗಾಗಿಯೇ ಅವರು ಚಿಕ್ಕ ವಯಸ್ಸಿಗೇ ತಮ್ಮದೇ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದರು. ದೇವರ ಬಗ್ಗೆ ಅಪಾರ ನಂಬಿಕೆ ಹೊಂದಿರುವ ನಾನು ಶಕ್ತಿಪೀಠವನ್ನು ಬಹಳ ನಂಬುತ್ತೇನೆ. ಜೀವನ ಸುಲಭದ ಹಾದಿಯಲ್ಲ. ಆದರೆ, ದೇವರ ಆಶೀರ್ವಾದ, ಕುಟುಂಬದ ಹಾರೈಕೆಯ ಜತೆಗೆ ಪ್ರಾಮಾಣಿಕ ಪ್ರಯತ್ನ ಮಾಡಿದಲ್ಲಿ ಯಶಸ್ಸು ಸಾಧ್ಯ. ಹಾಗಾಗಿ ನಾನು ಒಳ್ಳೆಯ ಮಗಳಾಗಿ, ಪತ್ನಿಯಾಗಿ, ಸೊಸೆಯಾಗಿ, ತಾಯಿಯಾಗಿ ಎಲ್ಲ ಪಾತ್ರವನ್ನು ಅಚ್ಚುಕಟ್ಟಾಗಿ ನಿರ್ವಹಿಸುವ ಜತೆಗೆ ಈ ಸಾಧನೆ ಮಾಡಲು ಸಾಧ್ಯವಾಗಿದೆ. ಇದರಲ್ಲಿ ನನ್ನ ಕುಟುಂಬದ ಸಹಕಾರ ಪ್ರಮುಖವಾಗಿದೆ ಎಂದ ಅವರು, ಸ್ತ್ರೀಯರು ಕುಟುಂಬ ನಿರ್ವಹಣೆ, ಕರ್ತವ್ಯದ ಜತೆಗೆ ಆರೋಗ್ಯದ ಬಗ್ಗೆಯೂ ಗಮನಹರಿಸಬೇಕಿದೆ ಎಂದು ಕಿವಿಮಾತು ಹೇಳಿದರು.
