“ಶಾಹಿದ್’, “ಅಲಿಗಢ್’ ಸಿನಿಮಾ ಮತ್ತು “ಸ್ಕ್ಯಾಮ್ 1992′, “ಸ್ಕ್ಯಾಮ್ 2003′ ಸೇರಿ ಹಲವು ಚಿತ್ರಗಳು ಮತ್ತು ವೆಬ್ಸರಣಿಗಳಿಗೆ ಆ್ಯಕ್ಷನ್-ಕಟ್ ಹೇಳಿರುವ ಖ್ಯಾತಿ ಹನ್ಸಲ್ ಮೆಹ್ತಾಗೆ ಸಲ್ಲುತ್ತದೆ. ಇದೀಗ ಅವರು ಮಹಾತ್ಮಾ ಗಾಂಧಿ ಜೀವನಾಧಾರಿತ ಸರಣಿಯ ಸಿದ್ಧತೆಯಲ್ಲಿದ್ದು, ಗಾಂಧಿ ಪಾತ್ರದಲ್ಲಿ ಪ್ರತಿಕ್ ಗಾಂಧಿ ನಟಿಸಲಿದ್ದಾರೆ.
ಕಳೆದ ಹಲವು ದಿನಗಳಿಂದ ಹನ್ಸಲ್ ಮೆಹ್ತಾ ಮತ್ತು ತಂಡ ಕಸ್ತೂರಿ ಬಾಯಿ ಪಾತ್ರಕ್ಕಾಗಿ ನಟಿಯ ಹುಡುಕಾಟದಲ್ಲಿದ್ದರು. ಇದೀಗ ಪ್ರತಿಕ್ ಪತ್ನಿ ಭಾಮಿನಿ ಓಜಾರನ್ನೇ ಕಸ್ತೂರಿ ಬಾಯಿ ಪಾತ್ರಕ್ಕೆ ಆಯ್ಕೆ ಮಾಡಿಕೊಳ್ಳಲಾಗಿದೆ. ಆ ಮೂಲಕ ಪ್ರತಿಕ್ ಮತ್ತು ಭಾಮಿನಿ ದಂಪತಿ ಇದೇ ಮೊದಲ ಬಾರಿಗೆ ಸರಣಿಯೊಂದರಲ್ಲಿ ದಂಪತಿಯ ಪಾತ್ರದಲ್ಲೇ ಕಾಣಿಸಿಕೊಳ್ಳಲಿದ್ದಾರೆ.
ಇತ್ತೀಚೆಗಷ್ಟೇ ಭಾಮಿನಿಯ ಕಸ್ತೂರಿ ಬಾಯಿ ಲುಕ್ ಬಿಡುಗಡೆಯಾಗಿದ್ದು, “ಹನ್ಸಲ್ ಮೆಹ್ತಾ ಮತ್ತು ಅಪ್ಲಾಸ್ ಎಂಟರ್ಟೇನ್ಮೆಂಟ್ ಜತೆ ಕೆಲಸ ಮಾಡುವ ಕನಸು ಇದೀಗ ನನಸಾಗಿದೆ. ರಂಗಭೂಮಿ ದಿನಗಳಿಂದಲೂ ಒಟ್ಟಿಗೆ ತೆರೆಹಂಚಿಕೊಳ್ಳುವ ಕನಸಿತ್ತು. ಅದೂ ಕೂಡ ಈಗ ನನಸಾಗಿದೆ. ಕಸ್ತೂರಿ ಬಾಯಿ ಪಾತ್ರ ನನ್ನ ಕರಿಯರ್ಗೆ ಸಿಕ್ಕ ಒಂದು ಸುಂದರ ಟ್ವಿಸ್ಟ್ ಎನ್ನಬಹುದು. ಪ್ರಾಮಾಣಿಕವಾಗಿ ಈ ಪಾತ್ರವನ್ನು ನಿಭಾಯಿಸುತ್ತೇನೆ’ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.
