ಯೋಗಕ್ಷೇಮ | ಮನಸ್ಸಿಗೆ ಶಾಂತತೆ ಮತ್ತು ಸ್ಥಿರತೆಗೆ ಪ್ರಾಣಾಯಾಮ

ಪ್ರಾಣಾಯಾಮದ ಮಹತ್ವವನ್ನು ಸಂಕ್ಷಿಪ್ತವಾಗಿ ತಿಳಿಸಿ.

| ರುದ್ರೇಶ್ ಹಾವೇರಿ

ಅಷ್ಟಾಂಗಯೋಗದ ನಾಲ್ಕನೆಯ ಪ್ರಮುಖ ಹಂತವೆಂದರೆ ಪ್ರಾಣಾಯಾಮ. ಪ್ರಾಣಾಯಾಮವನ್ನು ಯೋಗದ ಆತ್ಮ ಎಂದು ಕರೆಯಲಾಗುತ್ತದೆ. ಅದಿಲ್ಲದ ಯೋಗವು ಯೋಗವಲ್ಲ. ಅದು ದೇಹವನ್ನು ಶುದ್ಧೀಕರಿಸುತ್ತದೆ, ಆಮ್ಲಜನಕದ ಪರಿಚಲನೆಯನ್ನು ಸುಗಮಗೊಳಿಸುತ್ತದೆ, ಮನಸ್ಸಿಗೆ ಸ್ಥಿರತೆ ಮತ್ತು ಶಾಂತತೆಯನ್ನು ತರುತ್ತದೆ. ಏಕಾಗ್ರತೆಯನ್ನು ಹೆಚ್ಚಿಸುತ್ತದೆ. ವಯಸ್ಸಾಗುವಿಕೆಯನ್ನು ನಿಯಂತ್ರಿಸುತ್ತದೆ. ಮಲಬದ್ಧತೆ ಮತ್ತು ಅಜೀರ್ಣ ಸಮಸ್ಯೆಗಳನ್ನು ದೂರಮಾಡುತ್ತದೆ.

ಹೆಚ್ಚಿನ ಆಮ್ಲಜನಕವು ಹೆಚ್ಚು ಕೊಬ್ಬನ್ನು ಸುಡುವುದರಿಂದ ಕೆಲವು ಪ್ರಾಣಾಯಾಮಗಳು ಕೊಬ್ಬನ್ನು ಕರಗಿಸುವ ಮೂಲಕ ತೂಕವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತವೆ. ಶ್ವಾಸಕೋಶದ ವಿಸ್ತರಣೆಗೆ ಸಹಾಯ ಮಾಡುತ್ತದೆ ಮತ್ತು ಆ ಮೂಲಕ ಅದರ ಕಾರ್ಯಕ್ಷಮತೆಯನ್ನು ಸುಧಾರಿಸುತ್ತದೆ ಮತ್ತು ಆರೋಗ್ಯವಾಗಿರಿಸುತ್ತದೆ. ರಕ್ತದೊತ್ತಡ ಮತ್ತು ಹೃದಯ ಕಾಯಿಲೆಗಳನ್ನು ಎದುರಿಸಲು ಸಹಾಯ ಮಾಡುತ್ತದೆ. ಇದು ಕಫ, ಲೋಳೆಯ ಗ್ರಂಥಿಯ ಸಮಸ್ಯೆಗಳನ್ನು ಗುಣಪಡಿಸುತ್ತದೆ. ದೈಹಿಕ, ಮಾನಸಿಕ ಮತ್ತು ಆಧ್ಯಾತ್ಮಿಕ ಸಂತೋಷಕ್ಕೆ ಒಳ್ಳೆಯದು. ಖಿನ್ನತೆ, ಮಂದತೆ ಮತ್ತು ಆಲಸ್ಯವನ್ನು ಸಹ ನಿವಾರಿಸುತ್ತದೆ. ಒತ್ತಡ, ಆತಂಕ ಮತ್ತು ಉದ್ವೇಗವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ಧೂಳು, ಮಾಲಿನ್ಯಕಾರಗಳು, ಹೊಗೆ ಮತ್ತು ಹೊಲಸು ವಸ್ತುಗಳಿಂದ ಮುಕ್ತವಾಗಿರುವ ಸ್ಥಳದಲ್ಲಿ ಪ್ರಾಣಾಯಾಮವನ್ನು ಅಭ್ಯಾಸ ಮಾಡಿ. ಕುಳಿತುಕೊಳ್ಳುವ ಸ್ಥಳ ಸಮತಟ್ಟು ಮತ್ತು ಮೃದುವಾಗಿರಲಿ. ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಪ್ರಾಣಾಯಾಮ ಮಾಡುವುದರಿಂದ ಸರಿಯಾದ ಪ್ರಯೋಜನಗಳನ್ನು ಪಡೆಯಬಹುದು.

ಪ್ರಾಣಾಯಾಮದ ನಂತರ ದೇಹದಲ್ಲಿ ರಕ್ತಪರಿಚಲನೆ ಉತ್ತಮವಾಗುತ್ತದೆ. ಉಸಿರಾಟವು ಮೂಗಿನ ಮೂಲಕ ಇರಲಿ ಮತ್ತು ಅದು ನಿಧಾನವಾಗಿ ಮತ್ತು ಲಯಬದ್ಧವಾಗಿರಲಿ. ಪ್ರಾಣಾಯಾಮದ ಸಮಯದಲ್ಲಿ ಮನಸ್ಸು ಮತ್ತು ದೇಹವನ್ನು ನಿಯಂತ್ರಿಸಲು ಕಣ್ಣು ಮುಚ್ಚಿಕೊಳ್ಳಿ.

? ನನಗೆ ಯೋಗ-ಪ್ರಾಣಾಯಾಮ ಕಲಿಯಲು ಆಸಕ್ತಿ ಇದೆ. ಹೇಗೆ ಆರಂಭಿಸಬೇಕು?

| ಗುರುಬಸವರಾಜ ಎಂ. ಹೂವಿನಹಡಗಲಿ

ಯೋಗ-ಪ್ರಾಣಾಯಾಮ ಕಲಿಯಲು ಇಚ್ಛಿಸಿರುವುದಕ್ಕೆ ಅಭಿನಂದನೆಗಳು. ಮನಸ್ಸಿನ ಏರಿತಗಳನ್ನು ಶಮನಗೊಳಿಸಲು ಪ್ರಾಣಾಯಾಮ ಸಹಕಾರಿ. ನೀವು ಆರಂಭದಲ್ಲಿ 28 ದಿನಗಳ ಯೋಗ ಕೋರ್ಸ್​ಗೆ ಭಾಗವಹಿಸಿ. ಯೋಗದೊಂದಿಗೆ ಹಂತಹಂತವಾಗಿ ಅಡಿಪಾಯವನ್ನು ಕರಗತಗೊಳಿಸಿ. ಯೋಗಬೋಧಕರೊಂದಿಗೆ ಸಮಾಲೋಚಿಸಿ.

ಪ್ರಾಣಾಯಾಮಕ್ಕೆ ಮೊದಲು ಆರಾಮದಾಯಕ ಆಸನಗಳನ್ನು ಗುರುಮುಖೇನವೇ ಕಲಿಯಿರಿ. ಪ್ರಾಣ ಎಂದರೆ ಜೀವವನ್ನು ಅಥವಾ ದೇಹವನ್ನು ಉಳಿಸಿಕೊಳ್ಳುವ ಉಸಿರು. ಆಯಾಮ ಎಂದರೆ ವಿಸ್ತರಿಸಲು ಅಥವಾ ಹೊರತೆಗೆಯಲು ಎಂದರ್ಥ. ನೀವು ಪ್ರಾಣಾಯಾಮಕ್ಕೆ ಹೊಸಬರಾಗಿದ್ದ ಕಾರಣ ಅನುಭವಿ ಶಿಕ್ಷಕರನ್ನು ವೈಯಕ್ತಿಕವಾಗಿ ಭೇಟಿ ಮಾಡಿ.

https://www.vijayavani.net/police-recruitment-kalyana-karnataka-candidates-neglected/