ಕೆರಿಬಿಯನ್​ ಲೀಗ್​ನಲ್ಲಿ ಟ್ರಿನ್​ಬಾಗೋ ನೈಟ್​ರೈಡರ್ಸ್​ಗೆ ಸತತ 6ನೇ ಜಯ

ಪೋರ್ಟ್​ ಆಫ್​ ಸ್ಪೇನ್​: ನಾಯಕ ಕೈರಾನ್​ ಪೊಲ್ಲಾರ್ಡ್​​ (72 ರನ್​, 28 ಎಸೆತ, 2 ಬೌಂಡರಿ, 9 ಸಿಕ್ಸರ್​) ಸ್ಫೋಟಕ ಬ್ಯಾಟಿಂಗ್​ ನೆರವಿನಿಂದ ಟ್ರಿನ್​ಬಾಗೋ ನೈಟ್​ರೈಡರ್ಸ್​​ ತಂಡ ಕೆರಿಬಿಯನ್​ ಪ್ರೀಮಿಯರ್​ ಲೀಗ್​ (ಸಿಪಿಎಲ್​) ಟಿ20 ಟೂರ್ನಿಯಲ್ಲಿ ಸತತ 6ನೇ ಜಯ ದಾಖಲಿಸಿ ಅಜೇಯ ಓಟ ಮುಂದುವರಿಸಿದೆ. ಶನಿವಾರ ನಡೆದ ಪಂದ್ಯದಲ್ಲಿ ಬಾರ್ಬಡೋಸ್​ ಟ್ರೈಡೆಂಟ್ಸ್​ ವಿರುದ್ಧ 2 ವಿಕೆಟ್​ಗಳಿಂದ ರೋಚಕ ಜಯ ದಾಖಲಿಸಿದ ಟ್ರಿನ್​ಬಾಗೋ ನೈಟ್​ರೈಡರ್ಸ್​ ತಂಡ ಸೆಮಿಫೈನಲ್​ ಸ್ಥಾನವನ್ನು ಬಹುತೇಕ ಖಚಿತಪಡಿಸಿಕೊಂಡಿದೆ. ದಿನದ ಮತ್ತೊಂದು ಪಂದ್ಯದಲ್ಲಿ ಜಮೈಕಾ ತಲ್ಲವಾಹ್ಸ್​ ತಂಡ ಸೇಂಟ್​ ಕಿಟ್ಸ್​ ಆಂಡ್​ ನೆವಿಸ್​ ಪ್ಯಾಟ್ರಿಯಾಟ್ಸ್​ ತಂಡವನ್ನು 37 ರನ್​ಗಳಿಂದ ಮಣಿಸಿತು.

ಟಾಸ್​ ಸೋತು ಬ್ಯಾಟಿಂಗ್​ಗೆ ಇಳಿದ ಬಾರ್ಬಡೋಸ್​ ತಂಡ 7 ವಿಕೆಟ್​ಗೆ 148 ರನ್​ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು. ಪ್ರತಿಯಾಗಿ ನೈಟ್​ರೈಡರ್ಸ್​ ತಂಡ ಒಂದು ಹಂತದಲ್ಲಿ 77 ರನ್​ಗೆ 6 ವಿಕೆಟ್​ ಕಳೆದುಕೊಂಡು ಸೋಲಿನ ಅಂಚಿಗೆ ತಲುಪಿತ್ತು. ಆಗ ಏಕಾಂಗಿ ಹೋರಾಟದ ಮೂಲಕ ಪಂದ್ಯದ ದಿಕ್ಕನ್ನೇ ಬದಲಾಯಿಸಿದ ಪೊಲ್ಲಾರ್ಡ್​​, ಟ್ರೈಡೆಂಟ್​ ಬೌಲರ್​ಗಳನ್ನು ಬೆಂಡೆತ್ತಿದರು. ಪೊಲ್ಲಾರ್ಡ್​ ಕ್ರೀಸ್​ಗೆ ಇಳಿದಾಗ ನೈಟ್​ರೈಡರ್ಸ್​ಗೆ 39 ಎಸೆತಗಳಲ್ಲಿ 87 ರನ್​ ಅಗತ್ಯವಿತ್ತು. ಭರ್ಜರಿ ಸಿಕ್ಸರ್​ಗಳ ಮೂಲಕ ತಂಡವನ್ನು ಗೆಲುವಿನ ಸನಿಹ ತಂದ ಪೊಲ್ಲಾರ್ಡ್​ ಅಂತಿಮ ಓವರ್​ನಲ್ಲಿ 15 ರನ್​ ಅಗತ್ಯವಿದ್ದಾಗ ಮೊದಲ ಎಸೆತದಲ್ಲೇ ಮತ್ತೆ ಸಿಕ್ಸರ್​ ಸಿಡಿಸಿದರು. ಆದರೆ ರೈಫರ್​ ಎಸೆದ ಅಂತಿಮ ಓವರ್​ನ 2ನೇ ಎಸೆತದಲ್ಲಿ 2 ರನ್​ ಕಸಿಯುವ ಯತ್ನದಲ್ಲಿ ಪೊಲ್ಲಾರ್ಡ್​ ರನೌಟ್​ ಬಲೆಗೆ ಬಿದ್ದರು. ಉಳಿದ 4 ಎಸೆತಗಳಲ್ಲಿ 8 ರನ್​ ಅಗತ್ಯವಿದ್ದಾಗ ಬಾಲಂಗೋಚಿಗಳಾದ ಖಾರಿ ಪೈರ್​ ಮತ್ತು ಜೇಡನ್​ ಸೀಲ್ಸ್​ ಇನ್ನೂ ಎಸೆತ ಬಾಕಿ ಇರುವಂತೆಯೇ ತಂಡವನ್ನು ಗೆಲುವಿನ ದಡ ಸೇರಿಸಿದರು. 4ನೇ ಎಸೆತದಲ್ಲಿ ಪೈರ್​ ಸಿಕ್ಸರ್​ ಸಿಡಿಸಿ ಗೆಲುವು ಸುಲಭಗೊಳಿಸಿದರು.

ಬಾರ್ಬಡೋಸ್​ ಟ್ರೈಡೆಂಟ್ಸ್​: 7 ವಿಕೆಟ್​ಗೆ 148 (ಶೈ ಹೋಪ್​ 4, ಚಾರ್ಲ್ಸ್​ 47, ಮೇಯರ್ಸ್​ 42, ಹೋಲ್ಡರ್​ 3, ಕೋರಿ ಆಂಡರ್​ಸನ್​ 6, ನರ್ಸ್​ 19, ರಶೀದ್​ ಖಾನ್​ 12, ಹುಸೇನ್​ 30ಕ್ಕೆ 2, ಸೀಲ್ಸ್​ 21ಕ್ಕೆ 2, ಸಿಕಂದರ್​ ರಾಜಾ 11ಕ್ಕೆ 2), ಟ್ರಿನ್​ಬಾಗೋ ನೈಟ್​ರೈಡರ್ಸ್​: 19.5 ಓವರ್​ಗಳಲ್ಲಿ 8 ವಿಕೆಟ್​ಗೆ 149 (ಸಿಮ್ಮನ್ಸ್​ 32, ವೆಬ್​ಸ್ಟರ್​ 5, ಮನ್ರೋ 0, ಡರೇನ್​ ಬ್ರಾವೊ 6, ಪೊಲ್ಲಾರ್ಡ್​ 72, ಕೈರನ್​ ಪೈರ್​ 10 *, ಹೋಲ್ಡರ್​ 27ಕ್ಕೆ 2, ರಶೀದ್​ ಖಾನ್​ 21ಕ್ಕೆ 1, ಸ್ಯಾಂಟ್ನರ್​ 13ಕ್ಕೆ 1). ಪಂದ್ಯಶ್ರೇಷ್ಠ: ಕೈರಾನ್​ ಪೊಲ್ಲಾರ್ಡ್​.

ಇದನ್ನೂ ಓದಿ:  ತಾಯಿ ಹುಟ್ಟುಹಬ್ಬ ಆಚರಿಸಿದ ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡುಲ್ಕರ್

ಜಮೈಕಾಗೆ ಜಯ ತಂದ ಫಿಲಿಪ್ಸ್​

ದಿನದ 2ನೇ ಪಂದ್ಯದಲ್ಲಿ ಆರಂಭಿಕ ಗ್ಲೆನ್​ ಫಿಲಿಪ್ಸ್ (79 ರನ್​, 61 ಎಸೆತ, 2 ಬೌಂಡರಿ, 6 ಸಿಕ್ಸರ್​) ಜವಾಬ್ದಾರಿಯುತ ಬ್ಯಾಟಿಂಗ್​ ಮತ್ತು ಸಂಘಟಿತ ಬೌಲಿಂಗ್​ ನೆರವಿನಿಂದ ಜಮೈಕಾ ತಲ್ಲವಾಹ್ಸ್​ ತಂಡ ಸೇಂಟ್​ ಕಿಟ್ಸ್​ ಆಂಡ್​ ನೆವಿಸ್​ ಪ್ಯಾಟ್ರಿಯಾಟ್ಸ್​ ತಂಡವನ್ನು ಮಣಿಸಿ ಟೂರ್ನಿಯಲ್ಲಿ ಆಡಿದ 6ನೇ ಪಂದ್ಯದಲ್ಲಿ 3ನೇ ಗೆಲುವು ಒಲಿಸಿಕೊಂಡಿತು. ಈ ಮೂಲಕ ಸೆಮಿಫೈನಲ್​ ಆಸೆ ಜೀವಂತ ಉಳಿಸಿಕೊಂಡಿತು.

ಜಮೈಕಾ ತಲ್ಲವಾಹ್ಸ್​: 6 ವಿಕೆಟ್​ಗೆ 147 (ಗ್ಲೆನ್​ ಫಿಲಿಪ್ಸ್​ 79, ಬೋನರ್​ 16, ಬ್ಲ್ಯಾಕ್​ವುಡ್​ 27, ಆಸಿಫ್​ ಅಲಿ 14, ಪೊವೆಲ್​ 1, ಬ್ರಾಥ್​ವೇಟ್​ 0, ಎಮ್ರಿಟ್​ 32ಕ್ಕೆ 3, ಕಾಟ್ರೆಲ್​ 43ಕ್ಕೆ 1, ಇಶ್​ ಸೋಧಿ 27ಕ್ಕೆ 1), ಸೇಂಟ್​ ಕಿಟ್ಸ್​ ಆಂಡ್​ ನೆವಿಸ್​ ಪ್ಯಾಟ್ರಿಯಾಟ್ಸ್​: 19.4 ಓವರ್​ಗಳಲ್ಲಿ 110(ಕ್ರಿಸ್​ ಲ್ಯಾನ್​ 8, ಕೈರಾನ್​ ಪೊವೆಲ್​ 21, ರಾಮ್​ದಿನ್​ 13, ಡಂಕ್​ 2, ಕೆಲ್ಲಿ 16, ಎವಿನ್​ ಲೆವಿಸ್​ 21, ಬ್ರಾಥ್​ವೇಟ್​ 11ಕ್ಕೆ 3, ಎಡ್ವರ್ಡ್ಸ್​ 39ಕ್ಕೆ 2, ಪೆರುಮಾಳ್​ 20ಕ್ಕೆ 2, ಲಮಿಚೇನ್​ 27ಕ್ಕೆ 2). ಪಂದ್ಯಶ್ರೇಷ್ಠ: ಗ್ಲೆನ್​ ಫಿಲಿಪ್ಸ್​.

ಭಾನುವಾರದ ಪಂದ್ಯಗಳು:

ಬಾರ್ಬಡೋಸ್​ ಟ್ರೈಡೆಂಟ್ಸ್​-ಸೇಂಟ್​ ಲೂಸಿಯಾ ಜೌಕ್ಸ್​

ಆರಂಭ: ರಾತ್ರಿ 7.30 (ಭಾರತೀಯ ಕಾಲಮಾನ)

ಗಯಾನಾ ಅಮೇಜಾನ್​ ವಾರಿಯರ್ಸ್-ಸೇಂಟ್​ ಕಿಟ್ಸ್​ ಆಂಡ್​ ನೆವಿಸ್​ ಪ್ಯಾಟ್ರಿಯಾಟ್ಸ್​

ಆರಂಭ: ರಾತ್ರಿ 11.45 (ಭಾರತೀಯ ಕಾಲಮಾನ)

ನೇರಪ್ರಸಾರ ಸ್ಟಾರ್​ ಸ್ಪೋರ್ಟ್ಸ್​

https://www.vijayavani.net/csk-player-multiple-staff-members-test-positive/