ಹರಿಪ್ರಸಾದ್ ನಂದಳಿಕೆ ಕಾರ್ಕಳ
ಆಂಗ್ಲ ಮಾಧ್ಯಮದ ವ್ಯಾಮೋಹ, ಕನ್ನಡ ಮಾಧ್ಯಮದ ತಾತ್ಸಾರ, ಶಿಕ್ಷಕರ ಹಾಗೂ ವಿದ್ಯಾರ್ಥಿಗಳ ಕೊರತೆ ಕಾರಣಗಳಿಂದ ಸಾವಿರಾರು ವಿದ್ಯಾರ್ಥಿಗಳಿಗೆ ಶಿಕ್ಷಣ ನೀಡಿದ ಸರ್ಕಾರಿ ಶಾಲೆಯೊಂದಕ್ಕೆ ಎರಡು ವರ್ಷಗಳ ಹಿಂದೆ ಬೀಗ ಜಡಿಯಲಾಗಿದೆ.
ಬೆಳ್ಮಣ್ ದುರ್ಗಾಪರಮೇಶ್ವರಿ ದೇಗುಲದ ಸಮೀಪದಲ್ಲಿರುವ ಹೊಸಮಾರು ಸರ್ಕಾರಿ ಪ್ರಾಥಮಿಕ ಶಾಲೆಗೆ ಎದುರಾದ ಶೋಚನೀಯ ಪರಿಸ್ಥಿತಿ ಇದು. 1ರಿಂದ 7ನೇ ತರಗತಿ ತನಕ ತರಗತಿಗಳಿದ್ದು, ಅಬ್ಬನಡ್ಕ, ಹೊಸಮಾರು, ನಡಿಗುತ್ತು ಸಹಿತ ಹತ್ತಾರು ಗ್ರಾಮಗಳ ವಿದ್ಯಾರ್ಥಿಗಳು ಇದೇ ಶಾಲೆಯಲ್ಲಿ ಕಲಿಯುತ್ತಿದ್ದರು. ಅಲ್ಲದೇ ಈ ಭಾಗದಲ್ಲಿರುವ ಗಣ್ಯ ವ್ಯಕ್ತಿಗಳೆಲ್ಲರೂ ಬಹುತೇಕ ಇದೇ ಶಾಲೆಯಲ್ಲಿ ಕಲಿತವರು.
ಇದೇ ಶಾಲೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಶಿಕ್ಷಕರು ಒಬ್ಬೊಬ್ಬರೇ ವರ್ಗಾವಣೆಯಾಗುತ್ತಿದ್ದು, ಪಾಲಕರೂ ತಮ್ಮ ಮಕ್ಕಳನ್ನು ಆಂಗ್ಲಮಾಧ್ಯಮ ಶಾಲೆಗಳಿಗೆ ದಾಖಲಿಸುತ್ತಿದ್ದಾರೆ. ಎರಡು ವರ್ಷಗಳ ಹಿಂದೆ ಹತ್ತಕ್ಕಿಂತಲೂ ಕಡಿಮೆ ಸಂಖ್ಯೆಯ ವಿದ್ಯಾರ್ಥಿಗಳ ದಾಖಲಾತಿ ಇದ್ದುದರಿಂದ ಶಾಲಾ ಕಾರ್ಯವೈಖರಿ ಮೇಲೆ ಭಾರಿ ಹೊಡೆತ ಬಿದ್ದಿತ್ತು. ಈ ಹಿನ್ನೆಲೆಯಲ್ಲಿ ಶಿಕ್ಷಣ ಇಲಾಖೆಯೂ ಶಾಲೆ ಮುಚ್ಚಲು ನಿರ್ಧರಿಸಿತ್ತು.
*ಪಾಳು ಬಿದ್ದ ಕಟ್ಟಡ: ಕೆಲವು ಪಾಲಕರು, ಸ್ಥಳೀಯರು ಹಾಗೂ ದಾನಿಗಳ ನೆರವಿನಿಂದ ಶಾಲೆಯಲ್ಲಿ ವ್ಯವಸ್ಥೆಗಳನ್ನು ಅಳವಡಿಸಲಾಗಿದೆ. ಬಹಳ ವರ್ಷಗಳ ಹಿಂದೆ ನಿರ್ಮಾಣವಾದ ಶಾಲೆಯ ಒಂದು ಭಾಗ ಶಿಥಿಲಗೊಂಡಿದ್ದು, ಅಸಮರ್ಪಕ ನಿರ್ವಹಣೆಯಿಂದಾಗಿ ಮೇಲ್ಛಾವಣಿಯ ಭಾಗಗಳು, ಹಂಚುಗಳು ಮುರಿದು ಬೀಳಲಾರಂಭಿಸಿದೆ. ಇದೇ ಕಟ್ಟಡಕ್ಕೆ ತಾಗಿಕೊಂಡು ಅಂಗನವಾಡಿಯೂ ಕಾರ್ಯನಿರ್ವಹಿಸುತ್ತಿದೆ. ಬೀಗ ಜಡಿದು ಇತಿಹಾಸ ಪುಟ ಸೇರುವ ಮೊದಲೇ ಈ ಶಾಲೆಯ ಉಳಿವಿಗೆ ಜನಪ್ರತಿನಿಧಿಗಳು, ಶಿಕ್ಷಣ ಇಲಾಖೆ ಮುಂದಾಗಬೇಕು ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.
