ಅದೊಂದು ಕಾರ್ಯಕ್ರಮ. ಪ್ರವಚನಕಾರರು ಪ್ರತಿನಿತ್ಯ ಭಗವಂತನನ್ನು ನಾನಾವಿಧದಲ್ಲಿ ವಿವರಿಸುತ್ತಿದ್ದರು. ಅದೊಂದು ದಿನ ಒಬ್ಬ ತರುಣ, ‘ನೀವು ದೇವರನ್ನು ತೋರಿಸುವಿರಾ?’ ಎಂದು ಪ್ರಶ್ನೆ ಹಾಕಿದ. ಮಾತ್ರವಲ್ಲ, ನಾನಾ ರೀತಿಯಲ್ಲಿ ನಿಂದಿಸತೊಡಗಿದ. ಈ ವಿಚಿತ್ರ ಹಾಗೂ ಅಯೋಮಯ ಸ್ಥಿತಿಯಲ್ಲಿ ಪ್ರವಚನಕಾರನು ‘ನಾನು ನಿನಗೆ ದೇವರನ್ನು ತೋರಿಸುತ್ತೇನೆ’ ಎಂದು ಈ ಸಂದರ್ಭದಿಂದ ತಕ್ಕಣಕ್ಕೆ ಬಚಾವಾದ. ಇಲ್ಲಿ ಯುವಕ ಹಾಗೂ ಪ್ರವಚನಕಾರ ಇಬ್ಬರಲ್ಲೂ ಒಂದು ರೀತಿಯ ಅಹಂ ಇತ್ತು. ಯಾರೂ ಸೋಲನ್ನು ಒಪ್ಪುವಂತಿರಲಿಲ್ಲ. ಆಧುನಿಕ ಪ್ರಪಂಚದಲ್ಲಿ ಈ ತೆರನಾದ ನಾನಾ ಘಟನೆಗಳು ಸಂಭವಿಸುತ್ತಿರುತ್ತವೆ. ಹಾಗಾದರೆ ಯಾರು ಬೇಕಾದರೂ ಭಗವಂತನನ್ನು ಕಾಣಬಹುದೇ? ಇದು ನಿಜವೇ? ಅಥವಾ ಭ್ರಮೆಯೇ? ಎಂಬ ಸಂದೇಹಗಳು ಬರುವುದು ಸಹಜ. ಇಲ್ಲಿ ಮತ್ತೊಂದು ಅಂಶವನ್ನು ಗಮನಿಸಲೇಬೇಕು. ಭಗವಂತನ ದರ್ಶನಕ್ಕಾಗಿ ವ್ಯಾಕುಲತೆಯಿಂದ ಅಹರ್ನಿಶಿ ಪ್ರಾರ್ಥಿಸುತ್ತಾ, ಆಸೆ, ಲಾಲಸೆಗಳ ಸುಳಿಯಿಂದ ಪಾರಾಗಿರುವವನಿಗೆ ಭಗವದ್ದರ್ಶನ ಖಂಡಿತಾ ಲಭ್ಯವಾಗುತ್ತದೆ. ಭಗವಾನ್ ಶ್ರೀರಾಮಕೃಷ್ಣ ಪರಮಹಂಸರ ಪ್ರಕಾರ ಆ ಪರಮ ಪದವನ್ನು, ಪರಮಾದ್ಭುತವನ್ನು, ಪರಮ ಶಕ್ತಿಯ ದರ್ಶನ ಪಡೆದ ನಂತರ ಆ ವ್ಯಕ್ತಿಯು ಈ ಜಗತ್ತಿಗೆ ಸಂಬಂಧವಿಲ್ಲದವನಂತೆ ಇದ್ದು ಇಡೀ ಜಗತ್ತು ಬ್ರಹ್ಮಮಯವಾಗಿ ಕಾಣುವ ಸ್ಥಿತಿಗೆ ಬಂದಿರುತ್ತಾನೆ- ಉಪ್ಪಿನ ಬೊಂಬೆ ಸಮುದ್ರದ ಆಳವನ್ನು ಅಳೆದಂತೆ!- ಅಂದರೆ, ಹೇಗೆ ಉಪ್ಪಿನ ಬೊಂಬೆ ಸಂಪೂರ್ಣ ಸಮುದ್ರದಲ್ಲಿ ಲೀನವಾಗಿ ಬಿಡುತ್ತದೆಯೋ ಹಾಗೆಯೇ ಬ್ರಹ್ಮಾನಂದ ವನ್ನು ಅನುಭವಿಸಿದ ಬ್ರಹ್ಮಜ್ಞ ಪುರುಷ ಆ ಬ್ರಹ್ಮನಲ್ಲಿಯೇ ಲೀನವಾಗಿಬಿಡುತ್ತಾನೆ ಎಂದರ್ಥ.
